كنت صايمه النهارده وروحت لماما وكنا هنطلع اي فراخ او لحمه نطبخها ليا انا و ماما و بنتي و ماما قالت مرات اخويا صايمه نادي عليها هنعمل حسابها ونفطر كلنا
ف مرات اخويا نزلت سلمت علينا وحلفت ما احنا طابخين حاجه وقالت هتعمل حسابنا ف المحشي وتنزلنا الصينيه قبل المغرب بشوية لان مامتها عندها فوق ف هتفطر معاها احنا مرضناش بس حلفت لان اللي هحكيه دا مش اول مره يتكرر
اتفاجئنا بالصينيه بالشكل ده طبعا دي مش اول مره
كذا مره تعملها و تحط الصينيه وتقول معلش اصل معنديش الا كده ف حين بالله ما حد بيطلب منها حاجه واحنا عارفينها علي كده بس مش وقت صيام تعملي معانا كده
لاقيناها منزله الصينيه و بتعتذر كالعادة معلش اصل معنديش الا كده و انتو قيمتكم اكتر من كده
ماما قالتلها يابنتي ادام الدنيا معاكي مش متظبطه ما انا كنت هطبخ و خلاص و ادام مامتك معاكي كنت هعمل حسابها عادي ونفطر سوا قالتلها قصدك ايه يعني اني كدا مش بقدر بنتك وانتي هتقدري ماما
و اتقمصت و طلعت شقتها
و خلينا بنتي تاكل هي لان مفيش اكل يكفي 3 اشخاص من ضمن انا و ماما صايمين
وقومت لحقت طلعت كيس فول و سلقت بيض وفطرنا انا و ماما
لاقينا اخويا متصل لان اخويا مسافر قالها لية كدا يا ماما تزعلني دينا ليه يعني هي عامله واجب لاختي وانتي تكسفيها
راحت ماما شايلة ايد بنتي من المحشي وصورتلة قالت احنا مغصبناش حد ع حاجه و من الاول قولتلها هتنزلي نفطر سوا زيها زي بنتي ف دا منظر تنزلو ل 3
ادام مش عندها حاجه بتعشم الصايم باكله لية
قالها من امتي يا ماما وانتي مربيانا نتكلم ف اكل ولا شرب انتو كسفوتني قدام مراتي و قفل السكه
ماما عماله ترن عليه مبيردش
سمعنا صوت ع السلم
ببص من العين السحرية الاقي مرات اخويا شايلة شنطه صغيره ف ايديها كدا بتحط فيها هدومها لما بتروح لمامتها و امها معاها و ماشيين
و عماله مرات اخويا تنزل استوريهات غريبه من ساعه ما مشيت
واخويا منزل بوستات حزينه عن الخذلان
ماما مصممه تروح لمرات اخويا تتأسف ليها وانا بطلب منها متروحش
دا الموضوع كله من رأيكم ماما تروح ؟
نزلي من غير اسم لو سمحت
لا حول ولا قوه الا بالله العلي العظيم
