كان صوت اغاني رمضان في كل مكان في حارة من الحارات الشعبيه اللي موجوده في محافظه اسكندريه
الحاره كان شكلها مُبهج بشكل يخطف قلبك وعقلك
فوانيس وزينه في كل مكان ،ياميش رمضان اللي مرصوص عند كل العطارين في الحاره
ناس رايحه جايه تشتري علشان تخزن لرمضان ،اطفال بتلعب كوره في الشارع ،ناس واقفه تعلق زينه علي البلكونات ،اللي رايح واللي جاي يبتسم في وش التاني ويهنيه برمضان ،قاعده صُلح علي القهوه بين اتنين كان ما بينهم مصانع الحداد طول السنه!
في الحقيقه ياجماعه زي ما غني الفنان حسين الجسمي رمضان في مصر حاجه تانيه والسر في التفاصيل
رمضان بيجي ويجيب معاه الخير والرزق والهنا لكل الناس،يكفي بس أن في رمضان بيصحي ضمير كل شخص فينا لو كان مأثر في حق ربنا أو حق نفسه أو حق أشخاص تهمه ،فعلاً رمضان فرصه كبيره للجميع تمحي ذنوب في حجم الجبل
في رُكن بعيد كانت واقفه بنت في البلكونه بتتفرج وبتملي عينيها بكل التفاصيل اللي عمرها ما شافت زيها غير هنا!
-الجميل سرحان في ايه؟
فاقت من شرودها بخضه وهي بتبص علي البلكونه اللي جنب بلكونه بيتهم:
-ايه بتحبي جديد ؟
قالتها “ملك” وهي بتغمزلها بمشاكسه ،ملك جارتها وصاحبتها الوحيده في المكان ده واللي ممتنه لوجودها وطيبتها وجمال قلبها في الحقيقه
اتنهدت وهي بتهز رأسها بابتسامه :
-جو رمضان هنا لطيف اوي
ردت بغرور مصطنع :
-طبعا يابنتي رمضان في مصر حاجه تانيه
سندت ايديها علي السور وهي بتتنهد :
-امريكا كان بيجي فيها رمضان ويخلص وانا معرفش
ملك بذهول :
-ايه ده معقوله يعني انتي عُمرك ما صومتي!
هزت راسها بأحراج وحزن:
-لا
-ازاي مع أن انتي بتقولي انك مُسلمه
“مُسلمه بالاسم ياقلب اخوكي”
بصت للكائن اللي ظهر فجأه من ورا أخته وردت بضيق:
-وانت مالك اصلا يابتاع انت
رد بضيق :
-بت انتي احترمي نفسك
-بقولك ايه اقسم بالله لو ما خفيت من قدامي هجبلك “آدم” اخويا ينفخك
رد وهو يبتسم بسخريه:
-آدم هه ده انتي غلبانه اوي فكراني هخاف
ملك بهمس :
-ريان حبيبي متنساش أنه نفخك قبل كده
رد بهمس وهو بيضربها في كتفها :
-بس اخرسي وبعدين اصلا هو اخدني علي غفله
-يعني مش أنت اللي بوق علي الفاضي
-توء توء هو غفلني
“صباح الخير روما”
قالها “آدم” وهو بيدخل البلكونه وبيفرد دراعاته وبيتاوب
-صباح النور ياودما
-الا قوليلي يابت يالوكه مش روما دي اسم مدينه في إيطاليا باين ودوما ده اللي هو الدوم بتاع رمضان هو ليه اسم دلع!
آدم برفعه حاجب وبرود:
-جايه معاك بأيه علي الصُبح
بلع ريقه بتوتر ورد بابتسامه مهزوزه:
-لا ده انا بسأل بس صباح الخير يامعلم كل سنه وانت طيب
رد بقرف :
-وانت طيب
روميساء برفعه حاجب :
-الا قوليلي ياملك راحت فين الشجاعه اتبخرت!
ملك وهي بتدفعه بهمس :
-الله يكسفك فضحتنا
آدم وهو بيحاوط كتف أخته بحنان :
-فطرتي ياروما
-لا ياحبيبي مستنياك نفطر سوا
-طب يلا
-يلا
-باي يالوكه
ملك :
-متنسيش النهارده هنروح نجيب حاجات رمضان سوا
-اوكي اتفقنا
ريان وهو بيتنهد براحه :
-يخربيتك بتسحب الأكسجين من الهواء
ملك بهيام وهي بتبص لأثرهم:
-شايف الجنتله والشجاعه
ضربها علي قفاها وشدها من طرف هدومها :
-طب يلا قدامي ياختي هوريكي احلي جنتله
-ياااااه عليك ده انا كنت بهزر!
-رياااان انزل يلا علشان تعلق معانا الزينه
ملك بلهفه:
-الله هتعلقوا زينه النهارده
رد وهو بيقفل القميص بتاعه :
-اه ولو لمحت وشك في البلكونه هنفخك
ردت بضيق :
-هو ايه أصله ده انا عايزه اتفرج
-مينفعش تخرجي في شباب كتير هتبقي تحت وفي البلكونات
-خلاص هلبس الطرحه
-لا
نفخت بضيق وهي بتهبد برجلها في الأرض :
-يوووووه بقي ده انت بارد اوي
رفع صباعه في وشها بتحذير:
-احترمي نفسك ياملك متخلنيش اتغابي عليكي
“في ايه ياولاد صوتكم عالي ليه”
-شايفه ابنك ياماما مش راضي يخليني اطلع البلكونه اتفرج وهما بيعلقوا الزينه!
-مش راضي ليه؟!
اتنهد ورد بضيق :
-كده وخلاص ياماما انا نازل ولو لمحتك واقفه هتزعلي مني تمام
-اوف اوف ده انت غتت
فتح الباب واول ما فتحه كانت …….. يتبع
