بنات القس.وة بقلم الاء محمد

رحيم بزعيق / يعني مانتيش عارفه حصل ايه فجاه سمعت صوت غريب ف الاوضه دخلت اشوف فيه ايه لقيتك بتحاولي تخنقي بنتك .. انا مش فاهم انتي ازاي تعملي كده ..

سميره قالت بتوهان / انت بتقول ايه انا مستحيل اعمل كده .. انا مش فاكره حاجه ابدا من اللي انت بتقوله ده ..

رحيم / والله فاكره مش فاكره مش موضوعي انا مش هسمحلك تقعدي في بيتي اكتر من كده .. قومي معايا يلا اوديكي عند هند ..

سميرة بصتله بانكسار وقامت من علي السرير .. وقربت اللي بنتها اللي بعدت عنها بخوف …

سميرة/ سامحيني يا بنتي والله انا مكنش قصدي آذيكي بس انا والله مش فاكره اي حاجه وعموما انا همشي عشان اريحك من همي انا عارفه ان انا حامل تقيل اوي عليكوا يا حبيبتي انا اسفه …

سميره مشيت مع رحيم وركبت معاه العربيه وطول الطريق كانت بتفكر ازاي ده حصل ..

سميره بصت لرحيم بدموع / رحيم يا ابني انا عايزاك تحجزلي عند دكتور عشان اعرف مالي انا دايما بنسى حاجات كتير وفي حاجات بتقع مني ..

رحيم من غير ما يبصلها / طيب طيب هبقى اشوف الموضوع ده …

فضلوا ساكتين وشوية ووصلوا بيت هند اللي استقبلتهم ببرود ..

هند بضيق / تعالوا ادخلوا ..

رحيم / لا انا مستعجل ورايا شغل .. خديها اهي ودي شنطتها ..

هند اخدت الشنطه وقفلت الباب .. كانت سميرة قاعده علي الكنبه ف الصاله ..

هند بصت لها بحده وقالت / اسمعي بقى طول ما انتي قاعده هنا ملكيش دعوه بجوزي او بعيالي تخليك قاعده في الاوضه وخلاص وانا هدخلك الاكل والشرب لحد عندك .. ولو عوزتي تروحي الحمام تقوليلي وانا اجي ادخلك انما انتي متتحركيش في الشقه كده بمزاجك ..

سميرة / حاضر يا بنتي ..

هند/ انا النهارده عازمه اهل جوزي على الغداء هتدخلي الاوضه ومش هتطلعي منها طول ما هما موجودين واياك تخرجي منها .. سامعه..

سميرة / حاضر والله .. طيب انتي مش عايزة اساعدك ف الأكل بدل ما انتي واقفه لوحدك ..

هند/ لا مش عايزة منك حاجة .. اهل جوزي لو عرفوا ان انتي اللي عاملة الاكل هيقرفوا منك ..

سميرة/ خلاص يا حبيبتي .. انا هدخل الاوضه ..

سميرة دخلت الاوضه وفضلت قاعده فيها طول اليوم .. كانت حزينه انها بقيت لوحدها بالشكل ده .. وف نفس الوقت هي عارفه ان بناتها مشغولين ..
أما هند خلصت الأكل ولبست وفضلت مستنيه اهل جوزها ..

هند / احمد كل حاجة جاهزة .. اهلك فين ..

احمد/ جايين اهو .. اسمعي اوعي امك تطلع من الأوضه مش ناقصين وجع دماغ ..

هند / لا يا حبيبي ما تقلقش انا نبهت عليها وما تطلعش بره الاوضه ..

احمد / طب اقفلي عليها الباب من بره بالمفتاح احتياطي محدش عارف ايه اللي ممكن يحصل ..

هند بدلع/ حاضر يا قلبي ..

هند فعلا قفلت الباب بالمفتاح بالراحه .. وشوية وأهل جوزها جم .. فضلوا يتكلموا ويضحكوا وياكلوا .. أما سميرة كانت سامعه صوت ضحكهم وبتبتسم من قلبها وبتدعي لبنتها بالسعاده بس فجأة حست انها عايزة تخش الحمام ..

سميره / يا دي الحوسه طب اعمل ايه انا .. هحاول اخرج من غير ما احد منهم يشوفني وكده كده الحمام جنبي على طول ..

سميرة جت تفتح الباب لقيته مقفول .. ف قالت تستني شوية أما بنتها تدخلها الاكل تبقي تروح .. فات ساعه وسميرة مستنيه .. مكنتش قادرة تمسك نفسها .. قامت و حاولت تاني ..

سميرة / هند .. هند يا بنتي افتحيلي .. مش قادرة استني اكتر من كده .. يارب .. هند ..

فضلت تخبط علي الباب وتنادي يمكن حد يسمعها بس هما كان صوتهم عالي ف مكنوش سمعينها .. و فجأة حست انها مش قادرة تمسك نفسها اكتر وهدومها اتبهدلت .. قعدت علي الارض وفضلت تعيط ..

سميرة بعياط / اعمل ايه يا ربي .. السجادة اتبهدلت وهند هتزعل .. هي قفلت الباب ليه بس .. طيب اطلع هدومي واحاول اغير .. بس ممكن اعمل صوت و يعرفوا اني هنا .. بس لا مش هعمل صوت ..

سميرة قامت تشوف هدومها فين وغيرت فعلا .. شوية و الناس مشيوا وهند راحت فتحت الأوضه واول ما دخلت ..

هند / ايه ده .. ايه الريحه الوحشه دي .. انتي عملتي ايه هنا ..

سميره بصتلها بدموع / يا بنتي كنت عايزه اخش الحمام قعدت احاول افتح الباب لقيتك قفلاه والله مقدرتش امسك نفسي ..

هند اتعصبت / يعني ايه مقدرتيش تمسكي نفسك وانتي صغيره نونه عشان تعملي كده في الارض .. ايه الارف ده ..

سميرة/ سامحيني يا بنتي أنا اسفه ..

وهند / اعمل بيها ايه اسفه دي … طب عقابا ليكي انتي اللي هتقومي تغسلي السجاده دي ودلوقت …

سميره / حاضر يا بنتي هغسلهالك عيني بس خليها الصبح ده الجو دلوقت برد اوي ..

هند / لا هتعمليها دلوقتي مليش فيه .. قومي يلا …

هند خلت سميره فعلا تغسل السجادة .. كانت بتعملها وهي بتتالم بسبب رجلها .. وحاسه انها دايخه من قلة الاكل ونفسها بيضيق .. لكن جت علي نفسها و خلصتها ..

هند / حتي بعد ما عملتيها منضفتش اوي .. انا هبقي اعملها قومي يلا ملكيش لازمه اصلا ..

سميرة قامت وهي تعبانه اوي ومش قادرة تقف ..

سميرة / طيب انا جعانه اوي .. ممكن تديني اكل يا هند ..

هند / اوووف طيب حاضر .. ادخلي الاوضه وانا جايه ..

سميرة دخلت الاوضه وهي فرحانه انها هتاكل .. شوية وهند دخلت عليها ب طبق جبنه وبيضة ..

هند/ اتفضلي كلي يلا ..

سميرة/ ما انتي عارفه يا بنتي اني عندي حساسية من البيض .. لو كلته اتعب ..

هند / وانا مالي .. هو ده اللي عندي .. الاكل اللي فاضل من العزومه يدوب علي قدي انا وجوزي وعيالي ..

سميرة ابتسمت / وماله يا بنتي بالهنا والشفا علي قلبكوا .. انا هاكل الجبنه ..

فات كذا يوم وهند بتعامل امها بطريقه صعبه اوي .. مش بتديها اكل غير مرة واحده ف اليوم وبتكلمها وحش و منعاها تقرب من عيالها .. لحد ما ف يوم سميرة صحيت من النوم وخرجت من اوضتها مستغربة ومش عارفه هي فين .. لقيت هند وقفه ف المطبخ بتعمل الاكل ..

سميرة جريت عليها ومسكتها جامد / انا فين .. انتي فين .. انتوا خطـ،ـ،ـفتوني صح ..

هند باستغراب/ مالك ف اي .. انتي بتحلمي ولا ايه .. روحي اغسلي وشك هتفوقي ..

سميرة / انتي مين بقولك .. انا فين ..

هند بخوف / لا ده منال كان عندها حق أما قالت انك اتجننتي .. ابعدي عني بقي ..

سميرة بعدت عنها وقالت / ااااه دماغي مش قادرة ..

سميرة وقعت علي الارض .. وهند فضلت تنادي علي جوزها ..

احمد جه علي صوت صويتها / في ايه يا هند مالها ..

هند بعياط / مش عارفه فجأة لقيتها اتجننت وبتقولي انتي مين ..

احمد شالها ودخلها اوضتها وقفلوا عليها .. شوية وفاقت وقامت ..

سميرة فتحت الباب وخرجت لقيت هند قاعده بتعيط / مالك يا حبيبتي بتعيطي ليه ؟

هند بعدت عنها ف احمد قال بزعيق / يعني مش عارفه عملتي ايه .. انا مش فاهم انتي ازاي كده ..

سميرة/ والله يا ولاد انا مش فاكرة حاجة هو حصل ايه بس ..

هند / ولا حاجة خشي اوضتك بقي …

سميرة دخلت اوضتها و فضلت تعيط .. شوية وقامت اتوضت وصلت وفضلت قاعده ف اوضتها بتسبح و بتبص لقيت فريدة حفيدتها واقفه علي الباب وبتبصلها ..

سميرة ابتسمت/ تعالي يا حبيبتي .. تعالي اقعدي جنبي .. عاملة ايه يا فريده …

فريدة / الحمد لله يا تيتا .. حضرتك ليه مش بتيجي تقعدي معانا …

سميره / علشان معطلكوش على المذاكرة يا حبيبتي وبعدين انا هنا مبسوطه قوليلي انت عامله ايه في المذاكره ..

فريدة ابتسمت/ انا بقيت شاطرة اوي و حفظت جدول الضرب كله وبقي عندي صحاب كمان ..

سميرة ابتسمت وحضنتها / برافو عليكي يا حبيبتي … أنا عيزاكي تكبري كده و تبقي شاطرة و ناجحه زيي .. حكم انا بدأت من الصفر لحد ما عملت محلات و عماير ..

هند دخلت الاوضه واول ما شافتهم بصت لسميره بحده وقالت … فريده اطلعي بره ..

فريده/ ليه يا مامي انا عايزه اقعد مع تيتا شويه ..

هند / بقولك اطلعي بره ..

فريده طلعت بره وهند بصت لامها / انا مش قولتلك قبل كده ملكيش دعوه ببنتي .. انت ايه غبيه مبتفهميش ..

سميره / يا بنتي انا مش قصدي حاجه انا لقيتها واقفه على باب الاوضه فقلتها تيجي تقعد معايا شويه بدل ما انا قاعده لوحدي طول النهار ..

هند / انا زهقت منك بقي .. بصي انا هتصرف بس خليكي عارفه انك مش هتقعدي هنا تاني ..

سميرة قامت وقالت / لا يا حبيبتي انا اسفه خلاص .. مش هضايقك تاني بس متخلنيش امشي من هنا ..

هند / يا شيخه اوعي بقي .. جتك الارف أنا تعبت منك .. بس انا عارفه كويس اوي هعمل معاكي ايه ..

هند زقتها وخرجت برا الاوضه وقفلت الباب …

هند مسكت التليفون وكلمت منال / منال انا زهقت من الست دي .. اسمعي انا معنديش استعداد اتحمل كل ده .. واعتقد لا انتي ولا نيفين كمان هتشيلوا ..

منال/ اشيل ايه انا مصدقت خلصت منها ومش هقدر اخدها عندي تاني ..

هند / ….

#يتبع ..
#آلاء_محمد ..
#بنات_القسوة ..

رأيكوا بقي ولو جابت تفاعل كويس هنزل الجزء التاني بالليل ..

البارت التاني و الاخير ..

منال/ اشيل ايه انا مصدقت خلصت منها ومش هقدر اخدها عندي تاني ..

هند / يبقي نوديها درار مسنين .. انا اعرف دار كويسه هي صحيح غالية بس مش مشكلة المهم نخلص من القرف ده ..

منال/ انا موافقه يا ستي بس تبعد عننا وواثقه ان نيفين هتوافق …

هند / خلاص انا اكلمهم و نوديها بكرا ..

هند فقلت مع اختها وكلمت دار المسنين واتفقت معاهم علي كل حاجة .. وتاتي يوم راحت لامها و ف ايديها كوبايه شاي ..

هند / خدي اشربي ..

سميرة فرحت اوي واخدتها وشربت / تسلميلي يا بنتي .. دي احلي كوباية شاي شربتها من فترة كبيرة ..

هند ابتسمت ابتسامه صفرا وقعدت قدامها .. شوية ودخل اسر ابنها ..

أسر / ماما انا مش عارف احل المسألة دي ..

هند / طيب روح دلوقتي وانا شوية وجاية ..

سميرة بصتلها وقالت / هو مين ده يا بنتي ..

هند باستغراب / ده اسر ابني الكبير .. انتي مش عرفاه ..

سميرة بتوهان/ لا مش فاكرة والله .. طيب انتي اتجوزتي امتي ..

هند / من سبع سنين .. دا انتي اللي كنتي مختارة تاريخ الجواز …

سميرة / وجوزك شغال ايه طيب ..

هند / احمد ماسك البوتيك بتاعك اللي ف التجمع .. و رحيم و ياسر ماسكين بقيه الفروع ..

سميرة / مين دول يا بت ..

هند / هو فيه ايه .. رحيم جوز منال وياسر جوز نيفين ..

سميره / و هما اخواتك اتجوزوا امتى !!

هند / لا بقى ده انت فعلا خرفتي واضح ان انا كان عندي حق لما فكرت في الحل ده .. اشربي الشاي يلا ..

سميرة شربت الشاي وشوية وراحت ف النوم … هند دخلت عليها هي وجوزها ..

هند / يلا يا احمد هتلاقي التاكسي تحت مستنيك ..

احمد شال سميرة واخدها ف التاكسي .. شوية ووصل قدام دار المسنين .. دخلها ومشي .. فات ٤ ساعات كانت سميرة نايمه فيهم مش دريانه بالدنيا .. لدرجة انها صعبت علي الناس اللي ف الدار ..

ممرضه / هي مين دي يا الهام …

ممرضه ٢ / اسكتي يا نوال دي ست كبيره جوز بنتها جابها الصبح وهي نايمه كده الظاهر محدش قالها ان هما هيجيبوها هنا ….

ممرضه / لا حول ولا قوه الا بالله هي الدنيا جرى فيها ايه يعني بنتها هي اللي رميتها كده .. أما قليلة الأصل صحيح ..

ممرضه ٢ / لا وانتي الصادقه دول ٣ .. واضح كده ان التلاته مش طايقينها معاهم فرموها هنا ..

ممرضه / يا حسره قلبها لما تصحى وتتفاجئ بالوضع اللي هي بقيت فيه وحتى محدش منهم عرفها ..

ممرضه ٢ / ربنا يتولاها ..

شويه وسميره صحيت تاني يوم واتفاجئت بالمكان اللي هي فيه .. اوضه هادية وبسيطه وواحده قاعده علي الكرسي اللي قدامها ..

الممرضه قامت قعدت علي السرير قدامها اول ما صحيت / صباح الخير يا ست سميرة .. ازيك انهارده ..

سميرة / صباح النور يا بنتي .. هو انا فين .. فين بنتي ..

ياسمين قعدت قدامها على السرير ومسكت ايديها / اسمعي يا سميره انتي واضح عليكي ست مؤمنه وعارفه ان ” لن يصيبنا إلا ما كتب الله لنا ” ..

سميرة/ ونعم بالله بس برضه مقولتليش انا فين وانتي مين ..

ياسمين / احنا هنا في دار مسنين يا حجه سميره .. جوز بنت حضرتك جه وسابك هنا امبارح .. وانا ممرضه هنا واسمي ياسمين ..

سميره بصت لها بصدمه ودموعها نزلت .. مكنتش مصدقه ان بناتها يعملوا فيها كده بعد ما تعبت وشقيت عليهم العمر ده كله كانت حاسه ان قلبها بيتخلع من مكانه .. فضلت تعيط كتير من غير صوت وساكته ..

ياسمين / وحدي الله يا حجه .. ومتعمليش ف نفسك كده .. والله ما فيه حد يستاهل انك تزعلي نفسك عشانه ..

سميرة فضلت كذا يوم بتعيط ومش بتنام غير ساعه واحده ف اليوم .. وكل ما تنام تصحي مفزوعه .. ومش عايزة تندمج مع اي حد من الناس اللي ف الدار … ودايما قاعده ف اوضتها ساكته بس ياسمين بتقعد معاها عشان تونسها ..

كانوا قاعدين ف البلكونه بيشربوا شاي ..

ياسمين بحرج / حضرتك مش ملاحظه انك بتنسي كتير جربتي تروحي لدكتور …

سميره دموعها نزلت /عارفه يا بنتي وطلبت من جوز بنتي يشوفلي دكتور قال لي طيب ومردش عليا ..

ياسمين / طب ايه رايك انا عندي دكتور كويس اوي اوي ممكن يشوفك .. هو يبقى ابن خالتي ومش هياخد اي فلوس ..

سميرة ابتسمت بسخرية / مش بالفلوس يا بنتي والله ..

ياسمين / انا حاسه ان انت وراكي حكايه كبيره اوي يا حجه سميره ..

سميره / حكايه العمر يا بنتي .. سنين شبابي كلها .. تعبت وشقيت وربيت وكبرت وجوزت وفي الاخر اديني مرميه هنا لا حول ليا ولا قوه … انتي عارفه يا ياسمين انا عندي فلوس كتيره اوي بس صدقيني مال الدنيا كله مش ممكن يمحي كسره القلب اللي انا حاسه بيها ..

ياسمين / بكره ربنا يعوضك انا واثقه والله ان ربنا عمل ده كله علشان مخبيلك فرحه كبيره ..

سميرة جتلها فكرة و بصت ل ياسمين / بت يا ياسمين انتي معاكي التليفون الصغير ده اللي بتخرجوا بيه ..

ياسمين / قصدك موبايل ..

سميرة/ ايوا ايوا عايزة اعمل منه مكالمة ..

ياسمين / عينا بس والله مش معايل فيه غير خمس دقائق رصيد خديهم كلهم لو عايزة .. وانا هقعد برا خلصي ونادي عليا ..

سميره ابتسمت اوي على طيبه قلبها وقالت / تسلميلي يا حبيبتي ..

سميره اخدت التليفون وطلبت رقم شويه و حد رد عليها …

سميره / الو الحاج حسين معايا …

حسين / ايوه انا حسين مين …

سميره / ايوه يا حسين انا سميره .. سميره بنت الحاج محمود .. جارتك زمان ف الحسين ..

حسين / ياااا عاش من سمع صوتك يا سميره انتي عامله ايه واخبارك ايه ….

سميره / انا واقعه في مش مشكله كبيره يا حسين وعايزاك تساعدني ..

حسين / عيني قوليلي في ايه بالضبط …

حكيت سميره حكيت لك كل اللي حصل من بناتها …

حسين / يا ساتر يا رب على القسوه طب هي كل المحلات بتاعتك … باسمك يعني ..

سميره / ايوه كلهم باسمي انا عندي ٤ فروع .. وكلهم ناجحين اوي ومن اكبر البوتيكات ف البلد .. وكل محل فوقيه العمارة بتاعته ..

حسين/ حلو اوي .. انتي عايزة تعملي ايه بقي ..

سميرة / هقولك ..

شويه وسميره خلصت التليفون ونادت على ياسمين ..

سميره / الا قوليلي يا بت انتي عايشه فين …

ياسمين / انا عايشه في بيت ايجار قديم كده .. امي وابويا الله يرحمهم كانوا ماجرينوا و الناس كتر خيرهم مطردونيش بس بدفعلهم ايجار اعلى شويه من اللي مكتوب في العقد ..

سميره / طب انا عايزه اجي اقعد معاكي في بيتك يومين ومحدش مهما كان يعرف اني عندك ..

ياسمين / يا اهلا وسهلا بس هو بصراحه يعني البيت قديم شويه والحيطان مشققه وكده فده مش مقامك برضه …

سميره / بطلي هبل يا بت ده انتي غلاوتك عندي بقت كبيره اوي بعد كل اللي انتي عملتيه معايا يا بنتي .. ده بناتي ما عملوش معايا كده …

ياسمين ابتسمت / والله ربنا اللي يعلم اني من ساعه ما شوفتك وانتي دخلتي قلبي حسيتك زي امي الله يرحمها .. بس بكره هنروح للدكتور الأول..

تاني يوم ياسمين استأذنت من المديرة واخدت سميرة وراحت لابن خالتها في العياده بتاعته .. وصلوا واول ما راحوا دخلوا علي طول ..

ياسمين / عبد عامل ايه يا اسطى ..

عبد الرحمن / يا اسطى !! سبع سنين في كليه طب و امتياز وتكليف ومرمطة عشان في الاخر تقولي لي يا اسطى ..

ياسمين/ متزعلش يا عم مجدي يعقوب .. وبعدين مش عجبك ولا ايه ..

عبدالرحمن غمزلها / وانا اقدر اعترض .. انتي تقولي اللي انتي عيزاه يا قلبي ..

ياسمين ضحكت بكسوف / احم .. شايف بقي القمر دي تعبانه سيكا وعايزين نطمن عليها ..