انا فضلت خاطب خطيبتى

سمعت خناقة كبيرة أوي ما بينهم، ولقتها بتزعق لأمي إنها بتتكلم معاها في أمور خاصة زي دي، وملقتش حل غير إني كلمت أهلها وفعلًا حضروا وحكتلهم كل حاجة، واتكلموا معاها ووعدوني إن خلاص المشكلة هتتحل تمامًا، وعلى بالليل لقيت نفس الموضوع، ونفس الحِجج الغريبة اللي خلتني خلاص هتجنن، لحد ما قررت أوديها عند أهلها تقعد فترة عشان تتعلم الأدب لأن واضح إنها بنت متعرفش معنى الأدب..

وفضلت هنا يمكن شهر كامل والكلام كتر في البلد عليها واضطر أهلها يرجعوها مع وعد جديد إن كل حاجة هتكون تمام، لكن كالعادة كان وعد زائف تمامًا، وقررت أديها أخر فرصة وروحت بيها على دكتورة لعل وعسى نفهم فين المشكلة، ووقت ما كنا عند الدكتورة اتفاجئت بيها عايزة تدخل لوحدها وأصرت على كدا، وفعلًا دخلت لوحدها اتكلمت مع الدكتورة وبعد شوية دخلت والدكتورة قالت إنها عندها التهابات شديدة وكتبتلنا على أدوية، بس صدمتي الكبيرة لما بالصدفة سألت الصيدلي وقالي إن الأدوية دي بتعالج الضعف الجسدي عند الرجل، حسيت وقتها بغليان في راسي..

روحت للدكتورة لوحدي وقالتلي إن مراتي قالت إن المشكلة عندي ومقولش قدامك كدا عشان متتحرجش، حكتلها كل حاجة وخدت مراتي مرة تانية بدون ما افتح معاها الموضوع والدكتورة قررت كلامها، التهابات شديدة وممنوع أقرب من مراتي بأي طريقة..

وهنا بس كان الشك وصل بيا لدرجة إني بقيت بحلم بكوابيس كتير أوي كل ليلة حاولت أكتر من مرة أمسك موبايلها بس كانت بترفض رفض قاطع، وهنا اتأكدت إن فيه حاجة غلط، وإنها مخبية سر كبير في حياتها ولازم أعرفه، ما أنا خلاص جبت أخري، وعشت في عذاب وقرف بسببها، وفضلت وراها لحد ما عرفت الباسوورد وقدرت أفتش في موبايلها، ولقيت محادثة قصيرة فيها كلام غريب بينها وبين واحد ولما سألتها عليه قالتلي ده صاحب مكتبة الملخصات بتاعة الكلية وكنت بسأله على حاجة..

بس كلامها كان واضح عليه إن كله كذب، عشان كدا قررت أبعت للرقم وأطلب ملخصات، واتقالي إن الرقم غلط وإنه مجرد طالب في سنة 4، وروحت الكلية مخصوص لما عرفت اسم الطالب وبدأت اسأل عليه في أكتر من مكان واسأل على مراتي اللي كانت معروفة في أكتر من مكان، ومن هناك عرفت إنها كانت على علاقة عاطفية بالشاب ده، ولما كملت مراقبتي ليها من الموبايل عرفت إنها بتجيبه الشقة كمان لما بخرج أروح الشغل، بتجيبه وده يعتبر بيت عيلة وبكل سهولة ويُسر..

لما واجهتها بالكلام وفيديو كاميرا المراقبة بتاع العمارة بدأت تبكي وانهارت قدامي وطلبت مني أستر عليها وإنها تتغير وعملت تمثلية خلتني أشفق عليها وازاي كانت أيام صعبة عليها وهو اللي ضحك عليها والكلام ده كله، وأول ما نزلت ورجعت لقتها خدت الدهب وفلوسي كلها من الدولاب وأي حاجة غالية قدامها وراحت بيت أهلها..

وبعد أيام بدأت ترفع قواضي خُلع واسترداد منقولات، وكمان طلعت سُمعة عليا إني عاجز جسديًا في البلد كلها، معرفش ليه أيامها كرهت أمي، كرهت ضعفي، وكرهت كل الكلام الغبي اللي اتربيت عليه، كل حاجة كانت ظاهرة قدام عنيا زي الشمس لمدة سنة ونص، ازاي بنقول دلع بنات، وليه جداتنا وأمهاتنا كانوا بيعاملوا رجالتهم أحسن معاملة، وليه كان زمان الراجل راجل ودلوقتي بقا الراجل اللي يتحمل قلة أدب بنت مشافتش أي نوع من أنواع التربية..

الدنيا اسودت في عنيا تمامًا، ولما عملنا قعدات عُرفية موصلناش لأي حلول، لحد ما بدأت أخطط فعلًا أتخلص منها نهائيًا، أنتقم لشرفي وحياتي والأيام القاسية اللي عشتها بسببها، لعل وعسى الناس يفهموا، لعل وعسى كتير من الشباب يفوقوا ويعرفوا معنى القوامة والرجولة، فرق شاسع بين احتواء أهل بيتك وبين إنك تتحمل قلة الأدب وقلة التربية، فرق شاسع بين إنك تعرف قيمتك كراجل وتحافظ على البنت اللي عاوزاك، وبين إنك تبقا ساذج وتتحمل واحدة مشوفتش منها ربع موقف كويس..

فرق كبير بين راجل فاهم يعني أيه زواج ويختار بنت واعية محترمة ومتدينة وتعرف قيمته في حياتها، وبين واحد بيتعامل مع مراته أو خطيبته من خلال مبادئ حطتها البنات أو الستات اللي ميعرفوش يعني أيه معنى الرجولة الحقيقية، فهمت كل ده هترتاح، تختار صح وتتعامل مع فترة الخطوبة إنها اختبار كامل مش تحمل من طرف واحد، ومتتعاملش مع البنت اللي معاك على إنها آخر بنت في الدنيا لأن دايمًا فيه أحسن منها إلا لو كانت على خُلق ودين وقتها تشيلها في عينك من جوة..

لو فهمت المعادلة دي وفهمت دورك كراجل هتبني بيت صح، بيت قوي أنت القائد فيه، إنما لو سمحت للتمرد أو سمحت إنك تلغي دورك في البداية فلا تلومن إلا نفسك..
(مستوحاة من قصة حقيقية)
بقلم: أحمد محمود شرقاوي
……………….
لو عندك أي حكاية غريبة أو مخـ,ـيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص على أكاونت أحمد محمود شرقاوي كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..
بقلم: أحمد محمود شرقاوي
…………
متنساش لو عجبتك القصة تعمل لاف وتعليق برأيك في كومنت..

ومتنساش تمنشن أقرب صديق لك عشان يتابع معانا القصة أو تشاركها مع أصحابك..

وفولو لصفحتي الشخصية لو أول مرة تتابعني عشان يوصلك كل جديد.

بقلم: أحمد محمود شرقاوي