_وليا رجاء عندك ان احنا ما نخرجش انا والبنات من الشقه وهدفع لك ايجارها كل شهر لان انا مش هسيب بناتي انا متعلقه بيهم جدا وانت عارف .
ما كانش متوقع انها هتتقبل سماع كلمه انت طالق بكل هدوء كده وكمان كملت عليه بالجمود الرسميه على وشها وهنا حس يزيد ان ال 15 سنه اللي قضاهم معاها بيعشقها وبيتمنى لها الرضا ترضى راحوا هباء،
اتنهد بتعب بعد ما استوعب طلبها وطمنها:
_اطمني يا مريم مش انا الراجل اللي يرمي بناته في الشارع الشقه هسيبها لك باللي فيها وهخرج بهدومي ولا ايجار ولا يحزنون انتي عارفه اني الحمد لله مش محتاج .
حست مريم ساعتها في اللحظه دي إنها غلطت في حق يزيد وفي حق حياتها وفي حق بيتها لكن هي ما كانتش مرتاحه هتعمل كل اللي هي عايزاه من غير تحكمات يزيد وغيرته الزايده عن اللازم،
وفي نفس اليوم بالليل بعت يزيد لوالدتها تروح لها علشان خاطر الماذون هيجي يطلعهم هم الاتنين واول ما والدتها عرفت انصعقت من الخبر وراحت لها فورا وكلمتها بصدمة :
_نفذتي اللي في دماغك يا بنت بطني وعملتي اللي على كيفك يا رب تكوني مستريحه دلوقتي لما خسرتي راجل عمرك ما هتعرفي تعوضيه وخسرتي بيتك اللي كان يزيد محتويكي فيه على الاخر وعمره ما قصر في حقك ولا في حق بناتك .
كلام والدتها أثر فيها بس اتعاملت بعند مع الموضوع وردت على مامتها:
_انتو ليه بتعملوا فيا كده ربنا سبحانه وتعالى حلل الطلاق انا مش مرتاحه حاسة إني بطلع لفوق ويزيد زي ما هو مش عايز يتغير بقى منظري مش لطيف قدام صاحباتي كل لما يشوفوني يا ماما انا بقيت في السما وهو لسه في الارض زي ما هو .
ابتسمت والدتها بسخريه وقالت لها:
_بصي حواليكي يا حبيبتي هتلاقينا كلنا على الارض زي ما احنا علشان لما الارض تنشق بيكي ساعتها مش هتعرفي ترجعي الغالي اللي راح فكري تاني قبل ما يجيب الماذون ما تهديش بيتك يا بنتي،
وكملت كلامها وهي بتستنكر عليها الحجج اللي عماله تقولها :
_وبعدين منظر ايه اللي انت بتتكلمي عنه ده انت متجوزه راجل محترم وابن ناس وشياكه لما بيخلص الورشه بتاعته وبيقفلها بعد تعب طول اليوم بيطلع ياخد شاوره وبيلبس احسن لبس وبياخدكم احسن اماكن يخرجكم فيها وعنده عربيه محترمه وعلى الموضه زي ما بتتكلمي صدقيني يا بنتي هتندمي في وقت ما ينفعش فيه الندم انتي دلوقتي تروحي تعتذري له وتطلبي منه السماح وهو طيب وهيقدر كده .
يزيد سمعها وهي بتقول لها الكلمتين إللي في الاخر وكان بعت للماذون يجي وراه ورد على حماته :
_ما بقاش طيب يا حاجه ومش هسامح،
