ابتسمت مايان بخجل وكأنها كانت مستنية بس تشوف رد فعل سالم علي اكلها ووقتها قامت بخجل وكانت بدور قاعدة متغاظة اوي
بدور بغيظ / وهو وكل مصر هيبجي حلو برضك زي وكلنا يا واد عمي،، كيف ده بجي
مايان بصت لبدور بضيق ومردتش بس اللي رد سالم لما لقته بيقرب منها وبيمسك ايديها بحب وهو بيرد علي بدور
سالم بتلقائية / الوكل كله واحد يا بت عمي بس النَفس اللي بيفرج وانا كفايا عليا ان مرتي اللي عاملاه ،، دي اهم حاجة عندي
ابتسمت مايان بخجل وهي باصة لسالم بفخر وبدور كانت قاعدة هطق وخصوصا اما سالم اخد مايان وطلع قدامها
…………………….
في الاوضة كانت رايحة جاية مايان بتوتر لحد ما خرج سالم من الحمام فكانت بصاله هي بغموض وهو بيسرح شعره لحد ما لقت نفسها بتقرب منه
مايان بتلقائية/ هو انت كان في حاجة بينك وبين بدور؟
سالم بتكشيرة/ ايه اللي بتجوليه ده يا مايان؟ الحديت ده عندينا عيب وميصحش،، كيف يعني كان في حاجة بيناتنا
مايان باندفاع/ ماهو انت مشوفتش كلامها معايا عامل ازاي وكمان نظراتها ليا كأني خاط*فاك منها
سالم بتنهيدة/ اسمعي يا مايان،، مش رايدك تشغلي بالك ببدور دي لساتها صغيرة وعيلة
مايان بضيق / بس بتفهم،، وبعدين منا كمان عيلة بس عارفة كويس افهم نظرات وكلام اللي قدامي،، وبعدين انت بتهرب ليه من الاجابة؟ انتو كنتو بتحبو بعض صح؟ ولما اتجوزتني اضطريت تسيبها مش كدة؟
سالم بصدمة / كل ده الفتيه براسك،، انتي تنفعي مؤلفة تصدجي بجي؟ وبعدين انتي ليه مش رايدة تفهمي اني كبير اهنه وصدجيني لو رايد اتجوزها من انهاردة مش من بكرة هعمل اكده
مايان بخنقة/ اومال معملتش كدة ليه؟
سالم بتنهيدة وهو بيقرب من مايان/ عشان اني مش رايد يا مايان،، عشان اني متجوز ومكتفي بيكي،، حتي لو ده غصب عنك بس اني مبسوط اكده وانتي معايا،، وايوة بدور عاشجاني وانا خابر ده من زمان بس عمري ما بليت ريجها بكلمة عشان متتعشمش لاني بعتبرها خيتي،،فهمتي بجي؟
مايان ابتسمت بتلقائية ومحستش بنفسها غير وهي بتدخل في حض*ن سالم فاتصدم وقلبه دق اوي فابتسم بتلقائية وحاوطها بايديه
سالم بهمس / لو اعرف ان بدور هي اللي هتخليكي تعملي اكده كنت جبتها من زمان
بعدت مايان بخجل عن سالم لما استوعبت اللي هي عملته وسابته وجريت علي الحمام فابتسم هو وخرج بفرحة بعد ما حس ان في امل من ناحية مايان وشوية وخرجت مايان لما سمعت صوت قفل باب الاوضه وكانت فرحانة اوي وبتلف في الاوضة بسعادة لحد ما وقفت قدام تليفون سالم اللي كان عالترابيزة فابتسمت بتلقائية واخدته وخرجت وهي متأكدة مليون مرة انها حبت سالم
