في المستشفى وبعد ما الدكتور كشف علي حورية
سألو موسي بقلق…طمني يا دكتور في كسور او حاجة
الدكتور… لا الحمدلله. مفيش كسر، بس هي الوقعة شكلها كانت جامدة حصل جزع بسيط في رجلها، دلوقتي هلفلها
رجلها برباط ضاغط. اسبوع وهتكون تمام
وبعد ما انتهي الدكتور نزلت حورية من السرير بتعب وخرجت وهي بتسند علي الممرضة
كان موسي مستنيها برا، اول ماخرجت قرب عليها بلهفة وقالها… سلامتك يابطل
بصتله بغيظ واحراج من الممرضة
ابتسمت الممرضة وقالت.. علي فكرة جوزك شكله بيحبك جدا
حورية…. جوزي مين
الممرضة… مش الاستاذ يبقي جوزك
لسه حورية هترد قال موسي بسرعة… جوزها طبعا وابو عيالها كمان
الممرضة… ربنا يخليكو لبعض
عن اذنكو وراحت تمشي لكن قالها استني
وطلع فلوس واداهلها وهو بيقولها… عاوزك بقا تدعيلنا كتير
الممرضة ابتسمت وقالت…. ربنا يسعدكم دايما ويخليلكم ولادكم
ومشيت وهي عمالة بتدعيلهم
كانت خورية بتبصله بدهشة وغيظ وبمجرد ما قرب عليها قالت بعصبية… هو ايه اللي انت قولته ده.. ازاي تقول انك جوزي
موسي.. مانا قريب هبقي جوزك مفرقتش
بصتله حورية بضيق وهو قال… يلا عشان نمشي ولا هتباتي هنا
وقبل ما تتكلم ميل يشيلها
لكن حورية بسرعة بصتله بتحذير و قالت… لو عملتها اقسم بالله..
قاطعها بعد ما ضحك بشدة وقال… طب قوليلي هتمشي ازاي علي رجلك
حورية… متشغلش دماغك. هتسند علي الحيطة
موسي… طب مش هشيلك. بس اسندي عليا
بصتله بتردد لكن مكانش قدامها حل غير انها تسند عليه
……
: انا مش فاهماكي بصراحة. مش طلب منك تفضلي معاه في القاهرة عشان تبقي جمبه وياخد بالو منك. ليه رفضتي!!
منار… عشان مينفعش .. انا مش عاوزة امجد يكمل معايا لمجرد انه خايف عليا
بصتلها وقالت… انا عاوزاه يكمل معايا عشان بيحبني وميقدرش يستغني عني وده مش هيحصل غير لو انا بعدت
صاحبتها بتردد… انا مش عاوزة احبطك. بس ممكن ميحصلش.. امجد
قاطعتها وقالت بثقة .. امجد بيحبني. انا متاكده من ده. بس هو فاكر انو لما يكمل معايا يبقي كده بيظلمني. شايف اني استاهل حد احسن منو ميكونش سبقله الزواج ولا معاه اولاد. ميعرفش انه بالنسبالي احسن راجل في العالم وكل الحجات دي متفرقش معايا.هو شايف ان المفروض احب حد من سني. ميعرفش اني اصلا مبشوفش غيره ولا عمري في حياتي هقدر اشوف راجل غيره.. هو كل حياتي. مش عاوزه غيره.
…..
تاني يوم
: عملت ايه في الحتة لسه بردو ملففاك حوالين نفسك
قالها حمزة بسخرية ل موسي قاعد بيشيش بشرود
بصله وقال بتعب … لسه..شكلها هتتعبني
حمزة…. انا مستغربك بصراحة ياجدع. من امتا وواحدة بتعمل فيك كده.. انت حبيتها يلا بجد ولا ايه
موسي… انا فعلا حبيتها
حمزة…. لا بجد.انت حبيت.. صلاة النبي
لكن كمل بستغراب…بس ازاي..واشمعنا هي يعني..دا انت قايلي انها متطلقة..من امتا وانت بتتجوز واحدة متطلقة. دانت لو مكانتش الواحدة بالغلاف وبالتيكت كمان مابتخدهاش. ايه اللي جري
موسي… ياعم كسرت القاعدة بس هي تلين
حمزة… للدرجادي.. هي حلوة اوي كدة
موسي… وتكايـ..
قطع كلامه لما انتبه لنفسه وقالو بغضب… ولااا اياك اسمعك بتجيب سيرتها. هوقعلك صف اسنانك
حمزة بقي يضحك بشدة وهو بيقول… ااه لما الحب يبهدل صاحبه
موسي بصله بغيظ وبقي يشرب في الشيشة
…..
بعد اسبوع
فتح عماد باب شقته ودخل يشوف سهي لكنه اتصدم لما ملاقاش موجودة
….
كانت سهي في بيت اهلها، قاعدة بتبكي ووالدتها قاعدة قصادها وهي بتقولها بحيرة وحزن عليها…. طب ليه عملتي في نفسك كده من الاول.. كنتي عارفة انك هتتعذبي وبردو اتجوزتيه
لترد سهي وتقول بدموع… بحبه ياماما. بحبه
والدتها…يعني عشان بتحبيه توجعي قلبك بالشكل ده.. وبعدين انتي غلتطي ياحبيبتي.. مكانش ينفع تاخديه من مراته
بصتلها سهي بدهشة وقالت باندفاع… لا ياماما انا مغلتطش.. هي اللي اخدته مني في الاول. ولا نسيتي
بقت تبكي بمرارة وتقول… انا اكتر واحدة اتظلمت. لما ابويا فرقنا عن بعض في الاول عشان مشاكل بينو وبين عماد. مكانتش تستاهل انه يكسر قلبي بسببها..و ظلمتوني بعدها لما اجبرتوني اتخطب لواحد مش عايزاه
بصتلها وقالت بألم … انتو ظلمتوني وهي خا، نتني. انا كتر واحدة اتظلمت وفي الاخر تقوليلي بتخطفيه منها.!! وهي اللي عملتو كان ايه!!
كانت دموعها بتنزل بالم شديد وهي بتقول… دي كانت اقرب واحدة ليا. مكنتش بعتبرها صاحبتي ولا بنت خالتي. كنت بعتبرها اكتر من اختي.. دا يوم ما سيبنا بعض انا وعماد هي اول واحدة جريت اشتكيلها واترمي في حضنها.. كانت اكتر واحدة عارفة وشايفة قد ايه كنت بتعذب بعد مابعدتونا عن بعض
ابتسمت من بين دموعها بسخرية وقالت… كانت بتطبطب عليا وتواسيني وفي نفس الوقت كانت بتحاول تقرب منه
. فضلت وراه لحد ما خلته يتجوزها. وبكل بجاحه قالتلي. مادام ماحصلش بينكم نصيب ايه المشكلة اني اتجوزه
كانت بتتذكر الموقف وهي بتبكي بشدة وبتقول … كانت عارفة اني بحبه. واني مستحيل هنساه.ومع ذالك مفرقتش معاها واتجوزته وبقت معاه قدام عيني بكل بجاحة.. متعرفيش لما كنت بشوفها معاه كنت ببقي عاملة ازاي..كنت ببقي موجوعة اووي. لانه من حقي انا وانا المفروض ابقي مكانها مش هي.
مسحت دموعها وكملت بغل… انا مش ندمانه ابدا اني وافقت يتجوزني عليها. كان لازم تحس باللي حسيت بيه يوم ماخطفته مني. كان لازم اردلها اللي عملته فيا
والدتها.. طيب ليه سيبتي بيتك دلوقتي. ماهي كده هترجعله. واكيد هتحاول تخليه يطلقك
اتنهدت سهي وقالت …انا مش هستني لما تعمل كده
كملت بجمود … لاني انا اللي هطلب الطلاق
والدتها… وليه وافقتي بيه من الاول
اتجمعت الدموع في عيون سهي تاني وقالت…مش هقدر اكمل بالوضع ده
قربت والدتها ضمتها وبقت تطبطب عليها بحزن
….
علي القهوة، كان يوسف قاعد مع واحد صاحبه، بص لقي
حور خارجة من بيتهم، بمجرد ماشافها قام واتحرك ناحيتها
: علي فين يامزة
حور… رايحة السنتر
كملت وقالت… اسكت يايوسف. دانا طلع كان فايتني كتير جداً.
كملت وهي محتاسة… انا مش عارفة هلم المنهج ازاي
يوسف… طب انتي ايه اللي واقف قدامك
حور… كلو.. انا محتاسة اوي.. الكيميا يعني عرفت الم منها شوية.. بس الفيزيا والاحياء مش فاهمة فيهم اااي حاجة
يوسف… لا الاحياء دي متشليش همها
غمزلها وقال… هبقي اذاكرهالك انا
اتكسفت وقالت… سافل اوي
ضحك يوسف بشدة وهي قالت بغيظ.. طب ايه هتوصلني للسنتر ولا اروح لوحدي
يوسف… روحي اركبي العربية وانا جايلك
بعد مرور ثلاثة اشهر
موسي كان طول الفترة دي بيحاول يقرب من حورية وميأسش ابداا رغم انها كانت بتصده دايما لكن هو فضل وراها لحد ما بقت تستلطفه وتقبلتو في حياتها وابتدت كمان تعجب بشخصيته
…..
امجد كان طول الوقت بيتطمن علي منار لكن كان بعيد عنها بحكم ظروفه وتعب قدرية لانه كان معظم الوقت معاهم وكان قليل لما بيسافر الغردقة. لكن كان متابع منار دايما وبيطمن عليها كل يوم، دا غير انه كان مكلف حرس تبعو يحموها لو حد من اعمامها حاول يقربلها
…
قدرية كانت حالتها استقرت لكن ماتحسنتش كتير غير انها ابتدت تتكلم بسيط لكن مازالت طريحة الفراش
…
سمر كانت اجهضت الجنين، اما زواجها من عاصم فكان متوقف علي انهاء عدتها من جانب ومن جانب اخر كان متأجل نظرا للظروف اللي مرو بيها. اذا كان موت محمد ورشا او تعب قدرية
….
اما عماد ففضل طول ال3 شهور بيحاول يرجع نورا وسهي
لحد ما اخيرا وافقو يرجعو،
سهي حبها ليه غلبها ، اما نورا كانت شايفة ان طلاقها منه مش هيكون في صالحها.من ناحية ولادها اللي محبتش تحرمهم من ابوهم، ومن ناحية تانية كانت شايفة انها لو اتطلقت هتكون بتحقق ل سهي امنيتها.،لكن هي كانت مصرة متهنيش سها بيه ابدا وهي تتقهر فرجعتله
اما هو فكان بيحاول علي قد ما يقدر يرضيهم الاتنين
…
في بيت قدرية
حضر المأذون ليعقد قران عاصم وسمر
: فين العروسة
كريم… دقيقة ياعم الشيخ
ومال علي هنا وقالها.. ادخلي شوفي البت اتأخرت ليه
هنا… حاضر
وراحت تشوف سمر اللي كانت قاعدة في الاوضة بتبكي
دخلت هنا وهي بتستعجلها… يلا يا سمر اتاخرتي ليـه
وقربت عليها لما لاقتها بتبكي… هتفضلي تعيطي كده كتير.. امسحي دموعك ويلا اخرجي معايا. المأذون مستعجل
سمر بدموع… يعني خلاص
بصتلها وقالت… انا خايفة
هنا… من ايه ياحبيبتي
سمر بدموع… عاصم مش هيرحمني انا عارفة
مسكت هنا ايديها وهي بتحاول تطمنها وقالت… عاصم كويس متقلقيش. وبعدين انتي في الاول والاخر بنت عمه.
يلا بقا عشان كريم وامجد بره متعصبين.
قامت سمر معاها وخرجت بخطوات مرتعشة
زكريا… قربي
قربت سمر وقعدت جمب عمها
وابتدي المأذون في كتب الكتاب، كانت قاعدة كاتمة دموعها، اما عاصم فكان قاعد مغلوب علي امره
….
……..
تاني يوم
في الغردقة
فتحت منار الباب لتتفاجا ب امجد، فضلت تبصله وهي ساكته
امجد…. تقبلي تكملي حياتك معايا
يتبع…..
