ولف بوشه يبصلي وانا واقفه ابكي وراه وقالي: انتوا عايزين تبيعوا شقتكم؟
رديت عليه وانا ببكي وحكيت له كل حاجة وكنت حاسه اني زي طفلة صغيرة واخيرا باباها جه عشان يجيب لها حقها.
احلام: انا مبعتش حاجة ومش هبيع دا شاكر هو اللي غصب على اختي عشان تبيع وهي باعت نصيبها للراجل ده وعايز يشاركني في الشقة.
طارق بدهشة: يشاركك ازاي يعني!!
بصيتله وانا ببكي وقولتله: دي شقة ابويا وامي الشقة اللي عشنا فيها عمرنا وماما لو كانت عايشة مستحيل كانت توافق على البيع.
شوفت في عينيه نظرات حنيه عمري ما شوفتها في عيون حد غيره وهز راسه بتفهم وقالي: والشقة مش هتتباع زي ما انتي عايزه.
رد اللي اشترى نصيب بسمه في الشقة وهو ماسك في ايديه العقد اللي بسمه مضت عليه: بس انا اشتريت يا استاذ خلاص والانسه لو عايزة تبيع انا شاري ولو مش عايزة انا مش هتنازل عن العقد ده.
طارق بصله وقرب منه بخطوات واثقه جدا وفي لحظة كان اخد العقد من ايديه وقطعه قدام عينيه واتكلم بصوت قوي يرعب اي حد: والعقد اتقطع خلاص اتفضلوا امشو من هنا حالا ونصيحة مني تمشو على رجليكم افضل.
بصوا ل طارق بصدمة وشاكر اتكلم بتوتر: انت عملت ايه يا استاذ انت جاي تبوظ لينا البيعه ولا ايه.
طارق اتجاهل شاكر وكأنه مش موجود وبص للاتنين الرجاله بتحذير وقالهم: قررتوا ايه هتمشوا على رجليكم ولا اطلع رجالتي ينزلوكم بمعرفتهم.
بصوا ل طارق بخوف وفهموا انه شخص مش عادي ويقدر يأذيهم فعلا وخرجوا من الشقة بسرعه وبسمه قربت مني وهي بتزعق فيا: ايه اللي انتي عملتيه ده يا احلام؟ بقى بتتجوزي من ورانا؟ انا بجد اتصدمت فيكي!! دا لو ماما كانت عايشة وعرفت بالفضيحة دي كانت ماتت من القهرة.
مقدرتش ارد على بسمه وبكيت بحزن وشاكر اتكلم بسخرية: بقى هي الحكايه كده! وانا اقول قلبها مستقوي ليه واتاري الهانم متجوزه في السر وياترى بقى متجوزة عرفي ولا شرعي؟
طارق بصله بغضب واتكلم معاه بتحذير: كلامك معايا انا واحلام اشرف بنت انا قبلتها في حياتي.. ولو انت راجل قوي كده كنت ازاي بتشجع مراتك تبيع نصيبها في الشقة لراجل غريبه وتدخله شريك في الشقة مع اخت مراتك البنت؟
شاكر اتوتر من زعيق طارق وقال: والله دا حق مراتي وهي عايزة تبيع حقها والشرع…
قاطعه طارق بغضب: بدون دخول في تفاصيل عشان انا مبحبش الكلام الكتير..
وبص لاختي بسمه وقالها: حضرتك عايزة تبيعي نصيبك في الشقة؟
بسمه بصت لجوزها بخوف وهزت راسه وقالت: ااه.
طارق: تمام وعايزة تبيعي نصيبك ده بكام؟
اتكلم شاكر بجشع: 500 الف جنيه يا باشا الراجل اللي انت قطعت عقده كان هيدفعلنا المبلغ ده.
طارق بصله بسخرية وبص ل بسمه وقالها: واختك هتشتري منك ب 600 الف ايه رأيك؟
شاكر بسعادة وطمع: موافقين طبعا يا باشا بس احلام هتجيب الفلوس دي منين؟
طارق بثقة: دا شئ ميخصكش.
ومسك تليفونه واتصل على شخص وقاله: عشر دقايق وتكون عندي ومعاك 600 الف كاش والمحامي بتاعنا…
وبصلي وهو بيتكلم وكمل كلامه: وتجيب مأذون شرعي معاك على العنوان اللي هبعتهولك.
قفل التليفون وهو بيبصلي وشاكر بيبص ل مراته بسعادة وفرحان انه هياخد مبلغ اكتر من اللي كان هيبيع بيه وطارق قرب مني وهمس ليا وهو واقف قدامي: اهدي كل اللي انتي عايزاه هيحصل دلوقتي حالا والشقة كلها هتبقى بتاعتك.
بصيت علي بسمه وجوزها اللي واقفين يبصوا علينا بفضول وصدمة وقولتله: انت طلبت مأذون ليه؟
ابتسم وقالي: عشان هتجوزك رسمي دلوقتي.
بصتله بصدمة واه انا فرحت بس مصدومة ومش عايزة اتجوزه بالطريقة دي انا كنت حاسه ان جوازه مني مقابل كل اللي بيعمله عشاني! يعني انا كده ببيع نفسي ليه مقابل الدين اللي عليا له. حصري على صفحة الكاتبة .
دقايق قليله ووصل اللي طارق كلمه ومعاه المحامي والمأذون وقعدوا كلهم والمحامي جهز ورق التنازل من بسمه ليا وكان معاهم شنطة فيها 600الف وشاكر خد الفلوس وعينيه بتلمع بالفرحة وهو بيعد الفلوس وانا ببصله باستحقار والمحامي خلص كل الورق والشقة كلها بقت بأسمي واتكلم طارق مع شاكر وبسمه: المأذون موجود وانا واحلام هنتجوز دلوقتي.
بسمه بستغراب: هو مش حضرتك قولت انكم متجوزين؟
بصتله وانا منتظره اسمع رده عليها وقال بثقة: مش مهم انا قولت ايه .. المهم دلوقتي اني هتجوزها رسمي وقدامكم.. انا عارف ان مينفعش نتجوز في الظروف دي بس عشان ترجعوا اسوان وانتي مطمنه على اختك.
بسمه ابتسمت وقالت: حضرتك عندك حق.
المأذون اتكلم معايا: مين وكيلك يا عروسة؟
رد شاكر تلقائيا: انا طبعا.
بصتله بستحقار وقولتله: لا طبعا انا وكيلة نفسي.
