بقلم منه الثانى

بعتله تمام ماشي هقابلك..

شريف بصدمه : اء.. انا مش فاهم حاجه

دمتم في امان الله و رعايته..

البارت السابع..
حب غير مقصود…
تاني يوم بعد كتب الكتاب صحيت من النوم ع صوت اتصال من شريف.. ابتسمت و رديت عليه : الوو.. السلام عليكم .
شريف : وعليكم السلام ورحمة الله وبركاته.. صباح الخير انت لسه نايمه لحد دلوقتي ولا اي.
-صباح النور.. انا قومت الفجر و بعدها نمت تاني بما ان انهارده اجازه يعني.
شريف : ماشي ي حبيبتي نوم الهنا.. قومي كده فوقي وافطري وانا شويه كده واكلمك.
-تمام ماشي سلام..
شريف : سلام ي قلبي.
قفلت الفون وقومت دخلت الحمام وخرجت اشوف الكل صحى ولا لسه حد نايم.. خرجت ولقيت عمرو قاعد قدام التلفزيون قربت وقعدة جنبه صباح الخير..
عمرو : صباح النور.
اتكلمت بابتسامه : فطرت ولا ندخل نحضر الفطار مع بعض..
عمرو : لا لسه مافطرتش ويلا نحضر الفطار قبل ما هدهدتي تصحي هي وادهوم..
اتكلمت بضحكه : ي اخي انت ليه محسسني انهم اصغر منك دول امك وابوك.
عمرو مسك ايد نسمه و راحوا ع المطبخ : وانتِ ليه محسساني اني بشتمهم ده انا بدلعهم يعني غرض شريف..
-ماشي ي عم الملاك.. روح شوف ف اي ف التلاجه نحضره ع الفطار..
عمرو و نسمه ساعدوا بعض وجهزوا الفطار و ادهم و هدى صحيوا و قعدوا يفطروا مع بعض..
بعد الفطار قعدين بيشربوا الشاي..
ادهم : هو ايمن مش جاي انهارده..
هدى : لا ي حبيبي عايده قالت هي كانت هنا امبارح فقالت تقعد ف البيت هي والعيال.
ادهم بتفهم : فعلا ايمن و عايده بقالهم فتره معانا هنا باستمرار ولازم يقضوا وقت مع بعض كعيله..
عمرو اتكلم بتلقائيه: مش هتجوزوني شهد بقا..
ادهم بضحكه : وانا بقول الواد ساكت من الصبح مرخمش عليا ليه.. وكمل كلامه بخبث : ي بني شهد متنفعش ليك شهد دي واحده هاديه عايزه واحد هادي.. اكيد مش هتوافق بيك ولا حتى الراجل الطيب ابوها عم سعد هيوافق.
عمرو : صدقني هيوافقوا بس انت ارضى عننا شويه بس ي حج.. عايزين نتجوز.
هدى : طب اصبر ي بني لما نسمه تروح ع بيت جوزها الاول وبعدين نشوف موضوع شهد ده..
عمرو قام قعد جنب امه : يا ماما ي حبيبتي هو انا اول مره اتكلم ف الموضوع ده.. انا قايل اني عايزها من قبل ما اروح الجيش.. بس انتم قولتوا اي اصبر ي عمرو اما تروح الجيش علشان متعلقهاش معاك.. صح.
هدى : ايوه ي بني حصل بس..
قطع كلامها ادهم..
ادهم اتكلم بحب : خلاص سيبني بعد الصلاة اشوف سعد واقوله و لو ف خير ربنا يقدمه.. واهو نعمل فرحك انت واختك ف يوم واحد ونخلص..
اتكلمت بسرعه : لا مستحيل اعمل فرحي مع الاهبل ده.. انا عايزه فرحي يكون هادي.
عمرو : طبعاااا ي حبيبتي الفرح لازم يكون هادي ولا اي.
– والله ي بني مانا مرتحالك..
عمرو : ليه بس ي نسوم هو انا قولت حاجه..
ادهم قام : هشوف عم سعد واقوله وان شاء الله خير وسابهم ودخل اوضته و هدى قامت تنظم البيت و نسمه قامت تساعدها..
عمرو قام دخل اوضته و هو فرحان و قلبه بيدعى ان ابو شهد يوافق و هو كده كده واثق من موافقة شهد..
(شهد عندها 19 سنه محجبه ف كلية حقوق بيتها قدام بيت عمرو… عمرو يعرفها من زماان و كان طلب انه يطلب ايدها قبل ما يروح الجيش بس قالوا هي صغيره وغير كده بلاش يعلقها معاه و زي ما عمرو بيحبها هي كمان معجبه بشخصيته جداا )
عند شريف..
شريف مستغرب ليه ياسر مرجعش البيت المفروض انه يكون رجع من بدري..
شريف مسك فونه ورن عليه و مفيش رد.. قلق و رن تاني ياسر رد وكان باين من صوته انه نايم: الوو.. السلام عليكم.
شريف : وعليكم السلام ورحمة الله وبركاته.. اي يا ياسر مرجعتش البيت ليه.
ياسر : معلش ي شريف مش هاجي البيت انهارده..
شريف : ليه ي ياسر انت عارف كويس ان لما مش بترجع ماما بتزعل.
ياسر : معلش ي شريف.. صحابي كلهم اللي من ايام الجامعه جاين يقضوا معايا يوم و هنتغدى مع بعض..
شريف : تمام ي حبيبي.. تتهنى بيومك وقفل معاه..
شريف قام وشاف ابتسام اخته بتنظم ف الشقه قعد ع الكنبه وهي بتنظم وقعدوا يتكلموا مع بعض..
عند شهد..
دعاء اخت شهد اكبر منها بسنتين..
شهد اخده دعاء ف حضنها : ي بنتي اهدي بس انا مش فاهمه حاجه..
اتكلمت دعاء بعياط : بقولك بيخوني ي شهد بيخوني…
شهد بتحاول تهديها : طب اهدي كده.. ما انت ممكن تكوني ظلماه.
دعاء : انا شوفته بعيني و هو حاضنها و بيقولها و حشتيني.. كان كل المده دي بيضحك عليا انا مش هكمل معاه.. وقلعت الدبله من ايدها وسابتها ع السرير جنب شهد: هو من طريق وانا من طريق و قامت جريت ع اوضتها بتعيط.
شهد مسحت وشها بزهق : بقا انت ي حيوان بتلعب باختي و بتوهمها انك بتحبها.. انا اصلا من الاول ماكنتش مرتاحلك..
عند ايمن ف بيته..
ايمن كان بياخد شاور و خارج من الحمام و شاف عايده قاعدة ع الارض ف نص الاوضه بتزعق… ي بني تعالى بقا الله يهديك تعبتني معاك انا معتش قادره اقوم.. تعالي البس يلا علشان تروح مع بابا تصلي.
رحيم و هو بيجري منها ف الاوضه وهي قاعدة ف الارض بتعب : لا ي ماما مش هاجي.. انا مش عايز اروح مع بابا انا عايز اروح لنورهان..
عايده : ي بني مانا قولتلك بعد الصلاة خد اختك وروحوا عند نورهان..
رحيم باصرار : لا الوقتي..
عايده اتكلمت بعصبيه : مش انا قولت كلمه.. ف حاجه اسمها حاضر وتعالى هنا..
رحيم قرب منها بعياط..
عايده لبسته و خلصت و هو خرج بره الاوضه علشان يلعب مع ريم.
ايمن قفل باب الاوضه وقرب من عايده مسكها من ايدها و قيمها من ع الارض و ضمها ليه وعايده فاجاة عيطت..
ايمن بخضه : عايده مالك ي حبيتي فيكِ اي..
عايده ضمته اكتر واتكلمت وهي بتعيط : مش عارفه ي ايمن بجد انا تعبانه اوي..
ايمن مسك وشها بين ايده : مالك بس ي حبيبتي تعبانه مالك نروح للدكتور.
عايده : لا ي ايمن انا عايزه اعيط.. اعيط وبس.
ايمن اخدها فحضنه وباسها و حاول يخرجها من الزعل اللي هي فيه..
عند نسمه..
عمرو وادهم نزلوا يصلوا الجمعه ف المسجد.. و نسمه و هدى صلوا ف البيت.
بعد الصلاة..
ادهم شاف حازم و شريف و ايمن و كلهم وقفوا و سلموا ع بعض..
عمرو شاف سعد خارج من المسجد راح عليه بسرعه: ازيك ي عم سعد..
سعد بابتسامه : الحمدلله ي بني.. انت اي اخبارك.
عمرو : انا كويس اوي.. تعالى ي عم سعد بابا واقف هناك اهو وقال عايزك ف كلمتين.
سعد : خير ي بني ف حاجه..
عمرو بصوت عالي شويه : خيرر.. كله خيررر ي عم سعد
سعد قرب من ادهم..
ادهم : ازيك ي راجل ي طيب..
سعد : الحمدلله ف نعمة.. وكلهم سلموا ع سعد..
سعد : خير ي ابو ايمن.. عمرو قال انك عايزني..
ادهم : كل خير ان شاء الله.. انا كنت عايز اقولك اني عايز انول الشرف واطلب ايد الانسه شهد لعمرو ابني..
عمرو واقف وبيترقب الوضع بتركيز..
سعد : والله مش عارف اقولك اي بس شرفونا انهارده بالليل و نشوف راي البت ولو خير نقرا الفاتحه..
عمرو قلبه بيرقص من الفرحه..
ادهم : تمام ان شاء الله بعد صلاة العشاء هنكون موجودين عندكم..
سعد : ان شاء الله..
و سعد راح ع بيته.. وشريف و ادهم وحازم و عمرو راجعين البيت من نفس الطريق.. وايمن وابنه رحيم راجعوا البيت..