بنتى الصغيرة

سبتهم ودخلت على بنتي ملقتهاش, حسيت بخوف شديد وجريت على السطح لقتها واقفة وعمالة تشاور للسما, كانت بتشاور لغراب أبيض, شديت البنت من الخوف وبدأت أبص يمين وشمال لقتها بقت سليمة, وكانت بتضحك, نفس ضحكة بنت عمها بالظبط, نزلت سجدت على الأرض ولقيت جوزي بيتصل وبيقولي ان مديره اداله مكافأة لما حكاله ظروفه وان شاء الله هنروح نكشف, وقتها كنت بضحك بهيستريا وقولتله بصوت عالي

“البنت بقت كويسة خلاص, تعالى بقا وهاتلها معاك حاجة حلوة”

ونزلت اتوضيت وسجدت لله سجدة شكر, طول عمري بسمع عن معجزات الصدقة, أول مرة أشوفها في حياتي, وعلى بالليل جت مرات أخو جوزي وطلبت اننا نقعد مع بعض, كانت واقفة قدامي بتترعش, دخلنا الاوضة وانا مش فاهمة فيه ايه وعمالة أدعي ربنا يكون خير..

وبكلام مش مترتب ورعشة كبيرة في الصوت وبكاء مفاجئ قالت:

“لما شوفتك بتعملي كدا مع بنتي استحقرت نفسي أوي, كنت بتمنى أمو,ت ولا إني أعمل فيكي كدا”

بصتلها بتعجب وقولت
“عملتي ايه”

“انا قابلت واحدة عرافة من اسبوع, وحكتلها ان بنتي فاشلة في الدراسة وشالت مادة السنادي عكس بنت عمها اللي نجحت, فطلبت مني حاجة من أطر بنتي وأطر بنتك, وفعلا ودتلها, والله ما كنت أعرف انها هتسحرهم, كنت فاكرة انها هتخليهم الاتنين شطار, بس شكلها عملت سحر والمرض نزل على البنتين”

كنت ببصلها بصدمة كبيرة, لقتها نزلت تبوس على رجلي وتترجاني أسامحها وهي بتقسم انها مكانتش عايزة تأذي بنتي, وانها لما شافت رحمة قلبي ببنتها لعنت نفسها الف مرة ومن امبارح بتبكي وتستغفر, ورغم صدمتي الكبيرة محبتش أكبر الموضوع, اللي اتعلمته كان أكبر منها ومن عملتها..

اللي اتعلمته إن الصدقة عاملة زي المعجزة, وبالأخص صدقة المضطر, صدقة الضيق, الصدقة اللي بتطلع بآخر جنيه معايا, الصدقة اللي بتطلع بعد ما بتخلص كل أسباب الأرض, وقتها ربك بينزل ببركة الصدقة المعجزات, سحر والعياذ بالله غريب اتفك ببركة صدقة 200 جنيه بس, وانا اللي دفعت الاف وبنتي مخفتش غير بالصدقة, انا سامحتها في النهاية لأنها نوعا ما ست بسيطة مش من اللي بيلفوا ويدوروا, وعارفة انها استحالة تعمل كدا مرة تانية, يومها بالليل وعلى إذاعة القرآن الكريم سمعت اللي خلاني أبكي.. سمعت صوت الشيخ بيقول حديث عن الرسول صل الله عليه وسلم..

حديث بيقول:

“داووا مرضاكم بالصدقة”
بقلم: أحمد محمود شرقاوي..
………

لو عندك أي حكاية غريبة أو مخيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..
………
متنساش لو عجبتك القصة تعمل لاف وتعليق برأيك في كومنت..

ومتنساش تمنشن أقرب صديق لك عشان يتابع معانا القصة أو تشاركها مع أصحابك..

وفولو لصفحتي الشخصية لو أول مرة تتابعني عشان يوصلك كل جديد..

بقلم: أحمد محمود شرقاوي