منوعات

رواية بقلم سلمى محمد الرابع

ارتدت روكا بيجامتها المفضلة ذات اللون الوردي وعليها رسمة شخصيتها الكرتونية المحببة بسيط وسبونج بوب… سرحت شعرها وجمعته من الخلف على هيئة ضفيرة وغطت شعرها بقبعة صغيرة لينه قمتها مسطحة….حاولت النوم لكن النوم حلف عليها بعدم الاقتراب حتى تشبع بطنها الجائعة… التي أخذت في إصدار أصوات غاضبة تطالب بالطعام..
نهضت من على الفراش وتسللت بهدوء ناحية المطبخ… دون إنارة الضوء فتحت الثلاجة وعلى ضوئها أخرجت علبة من اللبن المبستر وعدة قطع من جبن المثلثات… التهمتهم مباشرة…. وقربت علبة اللبن من فمها لكي تشرب
النور أضاء فجأه… ألتفتت روكا مرعوبة لينسكب اللبن على فمها… ليتم إمساكها بتهمة السطو على الثلاجة
قاسم عندما سمع الأصوات الصادرة من المطبخ لم يكد يتخيل رؤيتها بهذا الشكل المضحك الطفولي… حاول كتم ضحكته بصعوبة متكلما بجدية… مشيرا بأصابعه تجاه علبه اللبن وبقايا علبة المثلثات
أنتي بردو مسمعتيش كلامي أن مفيش عشا ليكي واتسحبتي زي الحرامية واكلتي وانا قولت لأ… إختاري وسيلة عقاب لعدم سمعانك الكلام… يأما الكرباج… يأما انيمك على رجلي وطراخ على وأشار على مؤخرتها… اقترب منها حتى أصبح يفصل بينهم خطوة واحدة… هااا تختاري أنهو…
روكا وجهت له نظرات مرعوبة… لم تستطع فتح فمها بالكلام
امسك قاسم علبة اللبن من يديها ووضعها على الطاولة التي بجانبه… لفت انتباهه القبعة التي ترتديها.. أشار بأصابعه تجاه القبعة قائلاً : أيه ده اللي لبساها
روكا بلجلجة : دي طاقية عجبتني اشترتها وبحب ألبسها
قاسم فلتت منه ضحكة عالية : أنا شكيت لثواني أن الدماغ دي بتفهم شوية بس إجابتك ليا أكدت أن الدماغ دي فاضية ومش معقولة عارفة معنى اللي حطاها فوق راسك… هقولك وهكسب فيكي ثواب… دى اسمها بيريه ولونها والعلامه اللي في نصها… والنوع ده من البريه كان علامة مميزة لشخص اسمه تشي جيفارا… تعرفي مين تشي جيفارا
هزت رأسها بالنفي
قاسم : ممكن تقولي عليه رمز الثورات.. بطل ثوري لكل الشعوب
روكا بنبرة طفولية : لأ معرفهوش… ممكن أمشي
قاسم بحدة مفتعلة: ممكن… قبل التفاتها لكي تنصرف… أمسك أذنيها.. قوليلي قبل ماتمشي أسمك أيه الأول
ردت : روكا
لما سمع ردها… قرص أذنها دون أفلاتها… قائلا بخشونة… قولتي أيه عشان مسمعتش كويس
روكا مطت شفتيها بحركة طفولية: رقية… دبدبت على الارض بقدميها…
يبتسم على طفولتها… مقررا مع نفسه معاملتها كطفلة حتى تزهق وتمل من تعامله مقررة النضوج… تاركة استهتارها وعدم الإحساس بالمسؤولية
قاسم بلهجة أمر : يلا أمشي
تخرج روكا من الغرفة مسرعة غير مصدقة نفسها أنها نجت من عقابه لها
دخلت غرفتها وأقفلت الباب عليها وبمجرد وضع رأسها على الفراش ذهبت في النوم سريعا
أستيقظ قاسم بعد أذان الفجر…توضأ وصلى ثم أرتدى ملابس الخروج
في غرفة روكا هناك شىء أقلق نومها …لا تدرى ماهو …خرجت من غرفتها وهى تفرك عينيها …رأت قاسم يهم بالخروج من الشقة
روكا وهى تتثائب : رايح فين؟
قاسم : هوصل الحاج يحيي ومراته المطار عشان طالعين عمرة
روكا سألت بفضول: مين دول ؟
قاسم : أهلي وأصحاب البيت اللى ساكن فيه
روكا : هتتأخر
قاسم نظر لها بتركيز : أه هتأخر …بعد ماأطمن انهم سافرو …هفتح ورشة الحاج …الورشة تحت البيت وهشتغل على كام حتة موبيليا المفروض أصحابها يستلموها خلال كام يوم
روكا ردت : خلاص مادام انت هتفضل برا طول النهار …هروح عند بابا وماما أقضى النهار هناك
قاسم رد : أنتي هبلة ….تروحي فين تاني يوم الفرح …ده الناس في الحارة ياكلو وشي لما يشوفو العروسة نازلة من البيت تاني يوم
روكا زمت شفتيها بحركة طفولية : نعممممم …أنا منزلش عشان الناس وأنت بقى هتنزل ليه مش خايف من كلام الناس
قاسم : وهخاف ليه أنا راجل …أعمل اللي أنا عايزه
روكا بسخرية : اااه عشان أنا راجل وانتي بنت ..فعيب وغلط والكلام الاهبل ….والتخلف والتعصب ناحية الانثى …أنت زي ماهتخرج أنا كمان هخرج
قاسم ببرود : مش هتخرجي وهتفضلي قعدة في الشقة ….هتنتظريني لما أجي
روكا ردت بانفعال : وهفضل قعدة لوحدي بين أربع حيطان أكلم نفسي لحد ماسي السيد يشرف
قاسم بابتسامة خبيثة : ومين قال هتقعدي تكلمي نفسك ..
روكا : اومال هعمل أيه غير الكلام مع نفسي
قاسم رد بخبث: هتعملي حاجات كتير …هتنضفي الشقة ….زي ماانتي شايفة متبهدلة …وبعدين هتغسلي الغسيل …أنا حطتلك الكتالوج بتاع تعليمات التشغيل فوقه …وقبل ماتحطي الغسيل في الغسالة هتفرزيه على مرحلتين الابيض لوحده والملون لوحده …فاهمة ولا مش فاهمة
روكا فاغرة الفاه ..غير مستوعبة كلامه : أنا مش فاهمة حاجة …غسيل ايه اللي الابيض لوحده والالوان لوحده
قاسم : باين عليكي هتتعبيني معاكي … وبدل خروجه أقترب منها وقال بلهجة أمر ….تعالي ورايا
روكا ظلت مكانها رافضة التحرك….التفت لها فرآها مازالت وافقة …نادى عليها بزعيق …اتحركي يارقية وألا ..
مشت مغصوبة وهي تتمتم مع نفسها بغضب
قاسم أشار على الغسالة : الكتالوج أهو ..وسبت الغسيل اهو … هتطلعي الهدوم اللي لونها أبيض لوحدها …والهدوم اللي لونه مش أبيض لوحدها …وهيتغسلو لوحدهم
كلامي أتفهم ولا لسه
روكا بغضب مكتوم : فهمت والله فهمت …أى أوامر تانية قبل ماتمشي
قاسم رد : طبعا في هو أنا لسه قولت حاجة …ندخل على الغدا
روكا بتوسل : أبوس أيدك غدا ايه اللي بتقول عليه ….أنا أصلا مبعرفش أسلق بيضة
قاسم دارى ابتسامته بصعوبة : تتعلمي
روكا ضيقت بين حواجبها بضيق : وهتعلم أزاي
قاسم : أدخلي على النت …قنوات تعليم الطبخ كتير …أختاري الوصفات اللي تحبيها ومتخافيش أنا مش هعترض على أختيارك في الاكل
روكا بتريقة: ومش خايف يجيلك تسمم ولا تلبك معوي
قاسم انفرجت أساريره عن ضحكة خفيفة : هسمى قبل الاكل وهدعي ربنا بالستر وأني أقوم سليم منها …بس أنتي أتعبي نفسك وهزي طولك وأعملي أي حاجة
روكا بابتسامة صفراء : حاضر…أي حاجة تاني …
قاسم رد بهدوء : مفيش أوامر تاني واللي قولت عليه يتنفذ ولو متنفذش هعاقبك يارقية ومحدش هيحوش عنك
ردت بخفوت : أنت اللي جبته لنفسك
قاسم : بتقولي أيه سمعيني
روكا : بقول حاااااضر
خرج قاسم وأغلق الباب خلفه بالمفتاح …حاولت روكا بعد انصرافه فتح الباب ووجدته مغلق من الخارج …فأخذت تسبه وتلعنه
روكا أخذت تتعارك مع نفسها: هو أنت فاكر نفسك أتجوزت خدامة وهتعشلي في دور سى السيد …هتعملي أيه دلوقتي يابت يا روكا …هزت رأسها وأرتسمت على وجهها ابتسامة شريرة … الغسيل أول حاجة هعملها الغسيل ….وقفت أمام الغسالة .
حدثها الجانب الطيب من شخصيتها …بلاش ياروكا ده ممكن يتهور ويضربك فيها
ليرد الجانب المتهور : متخافيش هو بيهدد …لحد دلوقتي معملش حاجة ليكي ..باين عليه بؤ …متخافيش فين روكا الشجاعة
الجانب الطيب : أنا قولتلك بلاش أهو وأستحملي بقى نتيجة أفعالك
روكا أصابت بالتردد والحيرة وفي النهاية أنتصر الجانب المتهور …فلتتحمل نتيجة افعالها المتهورة
#بقلم_سلمى_محمد
طرق قاسم بخفة على باب شقة عم يحيى
قاسم : السلام عليكم
يحيي بدهشة : وعليكم السلام أيه اللي نزلك دلوقتي يابني
قاسم بابتسامة : عشان اوصلكم المطار
يحيى رد : بس يابني ألنهاردة صباحيتك ميصحش تنزل النهاردة
قاسم بابتسامة : الكلام ده كان زمان وبقى موضة قديمة …ومفيش حد هيوصلكم غيري المطار ….جهزتو ولا لسه
يحيى : أحنا جاهزين من بدرى ….نادى على زوجته ….يلا ياكريمة
قاسم دخل الشقة : فين الشنط وقام بحملها
كريمة عند خروجها من غرفتها تفاجأت بوجود قاسم أمامها …خبطت على صدرها ….يانهار …سبت عروستك بردو ونزلت ومصمم على اللي فى دماغك أنك توصلنا لحد المطار
يحيي : خلاص بقى ياكريمة …ماأنتي عارفة قاسم ودماغه الناشفة لما يصمم على حاجة
قام قاسم بتوصيلهم حتى المطار وعندما أطمئن من ركوبهم ….ركب سيارته وذهب الى الحارة وفتح الورشة بنفسه
أتى الصنايعية الى الورشة وعند رؤيتهم لقاسم أندهشو ومن حاول التكلم فيهم كان قاسم يزغره بحدة …فيتوقف الكلام قبل الخروج من الفم
#رواية_مكيدة_زواج
صفقت روكا بكلتا يديها بأنتصار عندما أنتهت من الغسيل ونشرته كل قطعتين وتلات قطع بمشبك واحد وارتسمت على شفتيها أبتسامة ظافرة
حدثت نفسها : نروح بقى نعمل الغدا …وضعت أبهامها على جبتها كعلامة للتفكير …مخمخي يابت ياروكا تعملي أيه غدا ….فتحت الفون وتصفحت على النت بعض الوصفات المحتملة للتنفيذ
دخلت المطبخ وشمرت أكمام بيجامتها وربطت شعرها بأيشارب …تنهدت بصوت مسموع : أستعنى على الشقا بالله
فتحت الثلاجة مخرجه جميع محتوياتها …فتحت دواليب المطبخ مفرغة جميع محتوياتها
رأت كيس جمبري موجود في الفريزر …ياحلاوة الجمبري …غدا اليوم هيكون جمبري …وده هيتقشر الاول وبعدين يتسلق ولا يتسلق الاول وبعدين يتقشر …شغلي دماغك ياروكا
بعد أقل من ساعة أنتهت روكا من تحضير الغداء في وقت قياسي ووضعته على السفرة وقامت بتغطيته ….وقفت أمام السفرة للحظات متأملة صنع يديها …فهي أخترعت وصفة طعام من أبتكارها
نظرت الى الطعام وزينت شفتيها أبتسامة منتصرة : صدقي يابت ياروكا أنتي موهوبة ينفعي تفتحي قناة للطبخ
ذهبت الى غرفة الصالون وقررت فتح الشباك لتشاهد الحارة …لما فتحت الشباك تفاجأت بوجود سيدة فى الشباك المقابل
السيدة بابتسامة : صباح الخير ياعروسة بسم الله ماشاء الله زي القمر قاسم عارف ينقي …أنا خالتك أكرام
اندهشت روكا من ترحيبها الحار لها …ردت قائلة : أنا روكا
أكرام بعبوس : هااا أسمك كوكا كوكا
روكا ردت بابتسامة : رقية أسمي رقية
أكرام : عاشت ألاسامي يارقية يابنتي …بصي يابنتي لو محتاجة أى حاجة نادي عليا وأنا هطلعلك …متتكسفيش ده قاسم زي أبني ومرات أبني تبقى بنتي
روكا : حاااضر …طرأت على عقلها فكرة ماكرة ..بقولك هي الورشة بتاعة عم يحيي فين بالظبط …ممكن تقوليلي العنوان بالظبط
أكرام ردت : تحتك بالظبط بس من ناحية المطبخ …ثم أعطتها عنوان المنطقة والورشة بالتفصيل
روكا بابتسامة خبيثة : شكرااا ليكي ياخالتي …
أكرام بابتسامة : العفو يابنتي
روكا : هستئذنك هدخل
أكرام : أتفضلي يابنتي
دخلت روكا وأمسكت تليفونها….دخلت على النت لمعرفة أقرب صيدليه تقوم بتوصيل الطلبات الى المنازل
روكا : لو سمحت عايزه عبوة فوط Kotex وقامت بأملائهم عنوان الورشة …واحد أسمه قاسم هو اللي هيستلم وهيدفع ليكم الفلوس…الحاجة هتوصلي أمتى
العامل : نص ساعة يافندم وطلبك هيوصل ليكي
روكا أغلقت الخط….أنفرجت شفتيها بابتسامة ماكرة …ضاحكة بصوت عالي
وفى الاسفل وصل عامل توصيل الخدمات الخاص بالصيدلية
مندوب الصيدليه باستغراب من العنوان فهي ورشة : السلام عليكم
أحد الصنايعية (حمدي) : وعليكم السلام
المندوب : دي طلبية جاية لواحد أسمه قاسم
حمدي: هو مش موجود دلوقتي … ليكمل قائلا وهو لو كان طلب حاجة كان قال بس هو مبلغناش بحاجة
المندوب : المدام بتاعته هي اللي طلبت وقالت هو اللي هيستلم ويحاسب
حمدي : تمام هات الحاجة …الفلوس كام
المندوب أخذ الحساب وغادر
حمدي أمسك الكيس ولا أراديا عيناه لحظت الموجود بالداخل …امتلكه الفضول اخرج الموجود بداخلها …وعندما اكتشف ماهية هذا الشىء ارجعه مكانه ولا كأنه أصابه عقرب ….وضعه على الطاولة …وهمس بين زملائه …مبررا سبب وجوده في الورشة اليوم تاركا عروسه …ساد جو من اللمز والغمز بينهم وساد جو من الضحك
لما أتى قاسم توقف الكلام ونظر كل واحد فيهم له بابتسامة …لم يفهم معناها
قاسم جاب أخره من نظراتهم له …قائلا بحدة : هو في أيه بالظبط
حمدي : وانت برا المدام طلبت حاجة من الصيدلية والمندوب جابها لحد هنا والحساب عليا نقوط جوازك ياقاسم
قاسم : مدام مين دي اللي طلبت …وحاجة أيه ونقوط ايه اللي بتقول عليه
حمدى بابتسامة رذيلة : العروسة…… والحاجة هتلاقيها على الكيسة اللي فوق الترابيزه هناك وأشار باصابعه على مكانها
قاسم بفضول : فتح الكيس واخرج مابداخله …ليدخله سريعا مرة أخرى …أحمرت عيناه من الغضب
تعالت الاصوات الضاحكة من العاملين
قاسم نظر للموجودين بغيظ: كله على شغله ومسمعش نفس حد فيكم ….خرج من الورشة وهو يكاد ينفجر من الغيظ ….فتح باب الشقة وأغلقه خلفه بعنف ..مناديا بصراخ : روووقية ياروووقية
روكا ببرائة : نعم ياسي قاسم
قاسم لوح بالكيس فى الهواء أمام وجهها : أيه ده
روكا تصنعت الخجل …أقتربت منه وامسكت الكيس …قائلا : شكرااا ليك .
قاسم بغضب : مردتيش عليا
روكا ردت بخجل مصطنع : حاجة محتاجاها ضروري في الفترة دي من الشهر
قاسم : تروحي بعته المندوب على الورشة وسط العمال الرجالة وكل واحد فيهم قال عليا كلمة من تحت لتحت …ياعيني عليه ولا حظه وكلام من ده كتير
روكا نفضت خجلها قائله بحدة : أومال أبعته فين حاجة ومحتاجاها ضرورى وأنت قافل عليا باب الشقة ومش معايا فلوس
قاسم بانفعال: كنت أتصلتي بيا على الفون
روكا أتبعت سياسة الهجوم أفضل من الدفاع: أتصل بيك أزاي ….مش لما يكون معايا نمرة تليفونك الاول أبقى أتصل بيك لما أحتاج أى حاجة …ومتزعقليش عشان أنا مش غلطانة في حاجة …أنت اللي غلطان مش أنا
قاسم أتصدم من ردها الانفعالي فهي عندها حق في كلامها …باب الشقة مغلق عليها من الخارج ولا تمتلك نمرة تليفونه
قاسم بضيق من نفسه: هاتي تليفونك أسجل رقمي عشان لو أحتاجتي أي حاجة
أعطته روكا التليفون وقام بتسجيل رقمه وبعد الانتهاء أعطاه لها مرة أخرى
روكا بابتسامة ماكرة : شكراااا
قاسم قال : أنا هدخل أخد شاور …عايز الغدا جاهز
روكا بلهجة مطيعة : الغدا خلص من بدري وحطيته على السفرة
قاسم بعدم تصديق : ده بجد
روكا : والله بجد باين عليا عندي مواهب في الطبيخ
قاسم : هنشوف …مشى تاركا أياها داعيا في سره …مرور الغداء علي خير دون أصابات
ظلت روكا واقفة ناظرة للسفرة بعلامة رضا …فالطعام يبدو شكله جميل وتمنت طعمه يكون مثل شكله
أنتهى قاسم من الاغتسال وأرتدى ملابسه خرج من غرفته …رأى رقية واقفة وابتسامة رضا تزين شفتيها
قاسم سأل بفضول : خير اللهم أجعله خير …ايه اللي مخليكي تبتسمي مع نفسك
روكا ردت بهدوء ولازال على وجهها أثار الابتسام : أصل اول مرة أعمل أكل وببص على شكله لقيته حلو وقولت لنفسي يارب طعمه يبقى زي شكله
قاسم وجه لها نظرات لطيفة : باين علي شكله حلو …وأكيد طعمه هيطلع حلو
جذب قاسم الكرسي وجلس وهي ظلت واقفة
قاسم : مش هتاكلي معايا
روكا ردت بوداعة : هو أنا مسموحلي أقعد
قاسم ضحك بخفة : طبعا …أنا مش مستبد لدرجادي…يلا شدي كرسي وتعالي أقعدي جنبي
…قاسم غرف لنفسه من الصينية الموجودة أمامه
قاسم بفضول : هو أيه ده بالظبط
روكا بابتسامة : ده أختراعي وصفة أنا اللي عملاها
قاسم : أستر يارب …هو لازم تخترعي ….ماكنتي عملتي حاجة أتعملت قبل كده
طب قوليلي المكونات أيه
روكا بابتسامة : خمن وأنت بتاكل
قاسم باستسلام : أمري لله …ووضع أول معلقة في فمه…حاول أخفاء أمتعاضه وأخذ يلوك الطعام داخل في فمه وبلعه بصعوبة
روكا نظرت له بترقب : هاااا ايه رأيك …يجي مني فى الطبخ
قاسم بابتسامة ممتعضة : طبعا يجي منك …لم يستطع أحراجها…لاحظ أنها تتناول السلطة فقط ….مش هتاكلي معايا من وصفتك السرية المجهولة المكونات …بس باين ان فيه جمبري
روكا بابتسامة : كفاية عليا السلطة أصلي مش جعانة ….وتخمينك صح دي قطع جمبري متقطعة صغيرة وعليها سلطة طحينة وحطتها في الفرن
قاسم بصدمة : طاجن أول مرة أسمع عنه ولا أشوفه وباين عليا هحرم أكل جمبري تاني
روكا أختفت ابتسامتها : هو وحش
قاسم : لأ بدا ….قصدي هحرم أكله برا
روكا : طب ماتاكل وقفت أكل ليه
قاسم بلع ريقه بصعوبة : طبعا هاكل منه ….أنهي قاسم طبقه بصعوبة وعندما أنتهي أمتلكه شعور بالغثيان وملامح وجهه أمتعضت
روكا بقلق : مالك ياقاسم وشك أتغير مرة واحدة
قاسم أمسك نفسه عن التقىء: مليش أنا كويس ….أنا هدخل الحمام هغسل أيدي
نهض من مكانه مسرعا متجها ألى الحمام …تقىء قاسم مافي جوفه من طعام …ناظرا لنفسه فى المرأة قائلا …مالك جرالك أيه …صعبت عليك بنظراتها ليك …مقولتش ليه أن الاكل طعمه وحش اوى وميتاكلش…..تستاهل اللي بيجرالك
غسل وجهه وخرج ..وجدها منتظره وعلامات القلق واضحة عليها
روكا بذنب: أنت كنت بترجع ..أنا السببب
قاسم : ولا انتي السبب ولا حاجة هو لازم من الاكل بتاعك ممكن يكون من أى حاجة تانية
أمسك قاسم بطنه مرة واحدة : أه يابطني …ليدخل مسرعا ألى الحمام وظل بالداخل فترة طويلة …متنقلا بين الحوض والتواليت
خرج من الحمام وجهه مصفرا وحبيبات العرق تلمع فوق جبينه مرددا بصوت خافت : همموووووت أكلت الجمبري هتموتني …
روكا اول ماسمعت باب الحمام يفتح جريت مسرعة للإطمئنان عليه
روكا بقلق : مالك ياقاسم شكلك تعبان اوي
قاسم :أمشي من وشي دلوقتي يارقية
روكا برفض : مش همشي ألا لما أطمن عليك
قاسم فقد سيطرته صائحا فيها : غورررري من وشي …باين عليكي جبتيلي نازلة معوية من أختراعاتك المنيلة بنيلة …أنتي ملكيش دخول مطبخ تاني ….تبعدى عن المطبخ نهائي مفهوم كلامي
روكا لمعت عيناها بالدموع : مفهوم…..طب أتصلك بالدكتور
قاسم باعياء : متتصليش بحد أنا هاخد مطهر معوي وهدخل أرتاح شوية ولو مخفتش هروح المستشفي أعمل غسيل معدة
روكا ظلت واقفة مكانها تشعر بالذنب
قاسم أخذ المطهر ونام بعدها مباشرة …أستغرق في النوم مباشرة…مستيقظا بعد عدة ساعات وهو يشعر بالتحسن
قاسم أخذ شاور على السريع…بحث عن الملابس الاضافية الخاصة بالورشة تذكر أنه طلب منها غسل الملابس وملابس العمل كانت من ضمنهم …نادى عليها من داخل الغرفة : ياررررقية ….رررقية
هرولت روكا مسرعة ألى داخل غرفته
روكا عندما رأته أحنت رأسها خجلا : نعممم
قاسم أندهش من تصرفها العفوي بالخجل منه : هاتي هدوم الشغل
روكا باستفسار: أجيبها منين الهدوم دي
قاسم : الهدوم اللي قولتلك أغسليها النهاردة الصبح ..هما كانو غيارين أبيض وغيارين الوان واحد بيج والتاني أزرق …أنا عايزك تجيبيلي الطقم البيج
روكا بلجلجة : هاااا أنت بتقول أيه
قاسم نبرة صوته أصبحت أعلي : أنتي أطرشتي ولا أيه …الهدوم أتغسلت ولا مش أتغلست
روكا بتردد : أيوه سمعت كلامك وغسلت الهدوم
قاسم بصرامة: كويس أنك سمعتي الكلام …روحي هاتي الطقم البيج يلا
روكا بحركات مضطربة وهى واقفة …قائلة بنبرة خافتة : لسه مشلتهمش من على الحبل
قاسم أمتلكه أحساس بوجود شىء غير طبيعي بسبب تصرفاتها …صاح فيها بحدة : روحي جيبي الهدوم من على الحبل وهاتي كمان غيار أبيض معاكي
روكا كانت بتأخر رجل وبتقدم رجل خائفة من رد فعله فهو حتى الان كان صبور لأقصى حد نتيجة تصرفاتها …نزعت الملابس من على الحبل ..سمعت صياح قاسم من داخل الغرفة مستعجلا أياها …بسرعة يارقية
دخلت روكا خائفة الى الغرفة وهي تحمل الملابس بين يديها مكورة أياهم على هيئة كورة
أشار قاسم على السرير …قائلا : حطيهم هنا وأمشي
بمجرد وضعهم على السرير خرجت روكا من الغرفة جري ودخلت الى غرفتها وأغلقت عليها الباب من الداخل
أندهش قاسم من رؤيتها وهي تجري مسرعة كأنها مصدقت …أشتم قاسم رائحة شىء غير طبيعي ..فاتجه ناحية الفراش وقام بفرد الملابس
قاسم فاغر الفاه ناظرا ألى ملابسه غير مصدق مايراه …ليصيح بغضب رووووقية …ده أنتي ليلتك مش هتعدي معايا النهاردة

انت في الصفحة 5 من 9 صفحات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
0

أنت تستخدم إضافة Adblock

انت تستخدم اضافة حجب الاعلانات من فضلك تصفح الموقع من متصفح اخر من موبايلك حتي تقوم بتصفح الموقع بشكل كامل