الاخيره
وصلت سياره الاسعاف وتم نقل فجر الى المستشفى وقام قسم الطوارئ بالاتصال على اهل فجر ، اتصل والد فجر بسلطانه يستنجد بها ذهبت
ـ الحقى يا سلطانه فجر اتقلبت بالعربيه وفى المستشفى دلوقتي
اذدادت دقات قلب سلطانه من الرعب على اختها وشعرت أن لسانها شل لم تستطع الرد على والدها
ـ الو الو سلطانه سمعانى اختك فى المستشفى ومش عارفين مالها هنروحلها انا وامك واخوكى
ـ مستشفى ايه
ـ مستشفى****
ـ طيب انا هروحلها دلوقتي سلام
عادت سلطانه الاتصال بفؤاد واخبرته واتفقوا ان يتقابلوا داخل المستشفى
وبالفعل وصلوا المستشفى جميعاً وذهبوا للطوارئ ووقتها قد انتهى المسعفين من مساعده فجر
وصلوا جميعهم لغرفه الطوارئ وتوقفوا أمامها ووجدوا الطبيب خارج من الغرفه ذهبوا اليه مسرعين يسألونه عن حاله فجر
ـ خير دا دكتور فجر عامله ايه
ـ فجر سليمه مافيهاش اى خدوش او كسور هى بس حصلها حاله اغماء من الخضه وكنا بنحاول نفوقها
ـ الحمد لله طيب ينفع ندخلها
ـ اه طبعاً تقدر تخرج كمان بس حد يعدى على الحسابات الاول
وبالفعل دخلوا لغرفه فحر ليطمأنوا عليها وكانت سليمه إلا من بعض الكدمات بجانب وجهها
اقتربوا منها مسرعين ليتأكدوا من سلامتها تحدثت سلطانه بخوف نابع من داخلها
ـ فجر انتى كويسه فى حاجة وجعاكى
نظرت لها فجر ونظرت فى الجهه الاخرى
تحدث فؤاد محاولا التخفيف عنها
ـ حمد الله على السلامه يا فجر وبإذن الله تقومى بالسلامة وتجيبى الاحسن منها انا بعت ونش يشيلها ويبعتها للتوكيل وماتقلقيش من اى مصاريف
تحدث حماده معترضا
ـ شكرا يا فؤاد مالهاش داعى المصاريف دى كلها ممكن فجر تبعها خرده واللى هيطلع تجيب بيه واحده صغيره بس أنا رأى بلاها عربيات خالص وخصوصاً الفتره دى
وليد : صح انتى جربتى حظك وحطيتى كل فلوسك فى عربيه واهى اتدمرت اهيه ولو جبتى واحده جديده برضو هتعملى بيها حادثه فرأيى تبيعيها خرده وتحافظى على القرشين الباقيين
ـ اه اديهملى انا اجبلك بيهم حتتين صيغه كده والدهب كل شويه سعره بيغلى يعنى كسبانه
تحدث فجر متجاهله حديثهم
ـ اطلعلوا بره وسيبونى لواحدى
سلطانه: فجر اهدى وكل حاجه هتتعوض أهم حاجة صحتك
ـ هههههههههههه ايوه برافو برافو كملى دور الكبيرة العاقله المضحيه وانا الصغيرة المتهورة
وليد : انتى بتقولى ايه سامعه نفسك من امته الكلام ده
كادوا الجميع يتحدثون اوقفتهم سلطانه عن الحديث
ـ لو سمحت اطلعوا بره عايزه اتكلم مع فجر لوحدنا
ـ وانا مش عايزه اتكلم معاكى
ـ مش بمزاجك لو سمحت استنونا بره
انصرف فؤاد وذهب للحسابات لدفع فاتورة المشفى وجلس الباقيين أمام الغرفه
حاول حماده الذهاب معه لكنه رفض بشده فرضخ حماده لكلام فؤاد
فى الداخل وقفت سلطانه أمام فجر وبدأت تتحدث بجديه
ـ فجر انتى شايفه حياتى ازاى شايفانى
ـ شايفه إنك واحده واخده كل حاجه في الحياة ورافضه إن غيرك يبقى زيك
ـ ده كل اللى انتى شايفاه
مش شايفه ابنى المريض بالسكر واللى بصحى بليل كذا مره عشان أتأكد اذا كان كويس ولا لا
فاكره لما جتله غيبوبة السكر وافتكرته
صمتت لم تستطع اكمال حديثها وادمعت عينيها وهى تتذكر تتذكر الموقف ولكنها اكملت حتى تنهى تلك المواجهه
افتكرته مات وقتها اتمنيت ياخدوا كل فلوسى بس يبقى عندى طفل سليم قلقى كل يوم وهو فى المدرسة انتى عمرك ماهتعرفى يعنى ايه احساسي قبل ما انام بليل وانا بدعى ربنا يحرسه واخاف يحصله حاجه وانا نايمه وقتها مش هسامح نفسى هافدى بايه الفلوس ولا فادتنى بايه فى مرض ابنى
واقولك حاجه كمان
انتى فاكره أن الناس فى النادى او التجمعات او الحفلات بيسكتوا فاكره انهم مش بيتهامزوا عليا بكلام يجرحنى اللى تقولك بصلها على ايه واللى تقولك اكيد عملاله عمل واللى تعمل انها بتهزر وتقولى روحتى لأنى شيخ عشان اعمل زيك
انتى فاكره إن الناس سيبانى فى حالى إنتى فاكره إن مجربتيش تسمعى تلقيح الناس بالكلام وهما بيقولوا دى وخداه عشان فلوسه ، بكره يزهق منها ويرميها ، دى شبعه بعد جوعه تقدرى انتى يا فجر تعيشى فى وضع زى ده
جوزى اللى انتى حسدانى عليه انتى عارفه علاقتنا كانت عامله إزاى عارفه كان احساسى ايه وهو عايز يتجوز عليا ولا احساسى ايه وانا حاسه أنى مش ماليه عينه وافضل افكر ليه بيعمل كده تفتكرى يا فجر هتقدرى تستحملى كده ؟؟
كل واحد ربنا مديله ال ٢٤ قيراط بتوعه بس متوزعين بصى لنفسك هل وانا فى سنك كنت بلبس زيك بخرج زيك ؟؟
صمتت فجر تفكر فى حديث سلطانه وتذكرت عندما كانوا اطفال في المدرسة وكم التنمر الذى عانت منه سلطانه وظلت الذكريات تمر فى زهن فجر اقتربت منها سلطانه وضمتها
ـ فجر بلاش تاخدى بالظاهر انتى ماتعرفيش جوه الناس ايه انا مش زعلانه منك خالص بالعكس أنا عارفة انك نفسك تكبرى وتعيشى كويس وعارفه ان جواكى خوف من المستقبل بسبب الماضى اللى عشناه لكن الماضى عدى ومش هيرجع احنا كبرنا ونقدر نعتمد على نفسنا بلاش تفكرى كده تانى
مسحت فجر دموعها وضمت اختها بقوه فحديث سلطانه صحيح هى كانت تخشى ان يعود الماضي مره اخرى
حاولت فجر أن تعتذر من سلطانه لكنها لم تعطيها فرصه للحديث
ـ مش عايزه اسمع كلام عن اللى فات احنا ولاد انهارده خلينا نبص للمستقبل بتعنا وبلاش نفتكر الماضي ولا اللى غلط غلط خلاص مش هنعاتب اتفقنا
ـ اتفقنا
