مياده: طيب يا عمو ايه اللي هيحصل يعني لو خرجت دلوقتي
فضل: يا حبيبتي احنا مسلمين ومش هينفع .
صبا: والله يا بابا انا قلت لها كده
مياده: بقى كده يعني انا اللي في الاخر طلعت وحشه قالت كده بعياط مصطنع . وبعدين ما انت هتخرجي مستخبيه في البتاع اللي انت لابساه
فضل :بصي يا مياده يا بنتي انا اكتر واحد محتاج صبا تخرج ان هي فيه ده بس برده ما ينفعش دلوقتي لحد ما تخلص عدتها وبعد كده تخرج انما دلوقتي من غير والدتها لا وكمان انت عارفه ان الناس مش بترحم.
صبا :فعلا يا مياده انا فعلا مش مستعد اتعامل مع حد حاليا صدقيني وجودي جوه البيت مع نفسي واولادي هو ده اكتر شفاء لي.
مياده :بتمثيل انا كنت عايزه بس اساعد
صبا :والله يا اختي
مياده :خلاص سيبونا بقى من الموضوع ده بقول لك ايه يا هدهد يا حبيبتي انت عامله غدا ايه النهارده
صبابضحك: يخرب بيتك انت من يومك وانت مفجوعه
مياده: واعمل ايه يعني ده كمان موضوع الحمل زود الموضوع وبقيت اجوع اكثر
ضحك الجميع عليها وقالت لها هدى: تعالي يا حبيبتي ده انا عامله محشي هتاكلي صوابعك وراه
مياده: الله يا هدهد محشي حبيبتي انت والله . وحطه هدى لمياده طبق محشي علشان تاكل وفعلا اكلت وفضلت مياده تتكلم مع هدى وفضل وصبا ويضحكوا كثير جدا وفضلت مياده ترخم على صبا
صبا: عارفه يا مياده وحياه ربنا لو ما قمتي وخدتي بعضك ومشيتي دلوقتي لا هنفخك وهتصل على احمد كمان اخليه ينفخك
مياده: لا وعلى ايه يا اختي اقوم انا امشي بقى بكرامتي وخلي الطيب احسن
هدى بضحك :طب ما تخليك يا حبيبتي هنا وتباتي معانا النهارده
مياده: اه شكل حضرتك عايزه حماتي تقوم عليا الحرب العالميه الثالثه لا انا الحق بقى لاحسن تشم خبر اني خرجت يلا تصبحي على خير
الجميع وانت من اهله يا حبيبتي وخرجت مياده وذهبت الى منزلها على فكره يا جماعه بيت مياده يعتبر جنب بيت فضل وهدى يعني هم جيران اصلا
وظلت الاحداث كما هي على جميع ابطالنا كلا منهم منهمك في اعماله وحياته وبعد مرور شهرين ونصف تفاجا فضل برقم غريب يتصل به فرد عليه
فضل: الو السلام عليكم ورحمه الله وبركاته مين معايا
مهران: وعليكم السلام ورحمه الله وبركاته كيفك يا حاج فضل اني الحاج مهران الجبالي
فضل: اه اهلا وسهلا بحضرتك خير يا حاج مهران في حاجه
مهران: خير ان شاء الله انا قلت بس اتصل اطمن عليكم واستاذن يعني انه احنا ان شاء الله نيجي عندكم نقدم شبكه ومهر لبنتكم عشان تبقى خطوبه لحد ما باقي الفتره تعدي وكمان الحاجه مرتي عايزه تشوف العروسه وتتشرف بيكم يعني
فضل :والله يا حاج مهران الشرف لينا تشرفونا وقت ما تحبوا طبعا
مهران: ربنا يبارك فيك يا حاج فضل يعني لو مش هضايق حضرتك ناجي بعد بكره ان شاء الله انا والحاجه وولد عيسى وكمان ورد بنتي
فضل: هتنورونا ان شاء الله يا حاج مهران منتظرينكم
مهران: تشكر يا ولد الاصول
واغلق الخط وذهب فضل لكي يخبر زوجته بامر مجيء هؤلاء الناس
هدى :ودول جايين ليه بقى ان شاء الله وجايين يجبرونا على ايه تاني
فضل: ما ينفعش تقولي كده احنا اهل كرم ونرحب باي حد مهما كان هو مين
هدى: ماشي عارفه كده طبعا وان يجي بيتي على راسي من فوق لكن دول بيجوا يكبرونا وخلوا بنتي اتطلقت وسابت جوزها وكمان اجبروها تتجوز ابنهم ويا عالم ابنهم متجوز ولا لا كبير ولا صغير كويس ولا مش كويس
فضل: الراجل بيقول جايين يقدموا شبكه ومهر لبنتك ونشوف الولد ويشوفونا ونتعرف كمان جايب مراته وبنته معاهم
هدى: مرات مين
فضل: ام الولد واخته وتشوفه لو القمر ما عجبناش نحاول نحل الموضوع بشكل ثاني ما يضرش بنتي
هدى: اما اشوف
فضل: طب هتعملي ايه
هدى :هشرفك وهخليهم يعرفوا انهم جايين بيت كرم وبيت اصل كمان
فضل: ربنا يبارك فيك يا ام صبا
هدى: ويبارك لنا فيك يا حبيبي.
وفي الصعيد في بلد سوهاج نادى مهران على خادمتهم
مهران: جليله انت يا جليله. جاءت هذه السيده مهروله اليه
جليله: نعم يا سيدي
مهران: فين الحاجه وكمان فين سيدك عيسى
جليله :ست الحاجه فوق في اوضتها وسيدي عيسى لسه داخل دلوقتي من بره وطلع الاوضه وهو كمان.
مهران: طب اطلعي نادم عليهم وعرفيهم اني عاوزهم هنا في المكتب
جليله: حاضر يا سيدي الحاج
ذهبت هذه السيده مهروله لتفعل ما طلب منها بعد وقت قصير جاءت كلا من وهيبه وعيسى الى مهران في المكتب
وهيبه :خير يا حاج في حاجه
دخل عيسى :السلام عليكم ورحمه الله وبركاته
وهيبه ومهران: وعليكم السلام ورحمه الله وبركاته
عيسى :خير يا بوي في حاجه
مهران :خير يا ولدي انا عاوزكم تجهزوا حالكم بعد بكره ان شاء الله وكمان ورده عشان نروح نشوف عروستك يا عيسى ونقدم لها الشبكه والمهر وعشان دي الاصول ولا ايه يا حاجه
وهيبه: طبعا يا حاج هي هتكون اي حد دي هتبقى مرت عيسى الجبالي.
عيسى: طب وانا لازمتي ايه يا بوي في المشوار ده روح انت وامي وورد وبلاش
مهران: وه وه انا بقول هنعمل الاصول يا ولدي ومن الاصول تكون اول واحد رايح ولا ايه
وهيبه :لازم تروح يا ولدي لازم وبعدين انت ليك حق تشوفها وتشوف وشها مرتين من غير نقاب قبل الجواز علشان القبول
رد مهران: وقال موضوع القبول ده منتهي وان شاء الله هيكون في قبول وحتى لو ما فيش هي امراه وهو راجل والجواز عايز كده وبس.
عيسى: اللي تشوفه يا ابوي حاضر
مهران: ربنا يرضى عليك يا ولدي روح شوف ايه اللي وراك وخلصوا علشان تكون مستعد يوم السفر
وخرج عيسى يفعل ما طلب منه والده
مهران :وانت يا حاجه كمان عايزك تجهزي حالك وكمان تجهزي زياره تليق بعيله الجبال وبلغي ورد تجهز حالها عشان هتروح معانا
وهيبه: حاضر يا حاج طمن بالك.
وفعلا مر اليومين دول دون احداث على ابطالنا ولكن في اليوم الثاني بالليل طلبت هدى من صبا
هدى: يا صبا يا بنتي ساعديني
صبا :حاضر يا ماما ايه ده كله
هدى :بدون تفسير دي عزومه لناس وكمان عماتك واعمامك جايين
صبا:يا كل ده طيب حاضر
