منار : انا هرميله ورق المناقصة ده مش عايزة حاجة من وشه.
طارق : بخبث ، بالعكس دا انتي تقهريه بيه وتاخدي الورق ونستلمها ونزلها السوق علشان تقهره عليها ، ما انتي عارفة مكسبها كبير قد ايه.
منار : معاك حق ..
طارق : بخبث واللي يقهره اكتر بقي انك تتجوزي بجد علشان يتاكد انك مش معبراه ولا هو شاغل تفكيرك.
منار : اتجوز .. ازاي …. ومين …..
طارق : انا … وانا عند كلمتي ومستني اشارة منك.
…….
امينه تجلس علي اريكة الريسبشن وتحضن دنيا ، بعدما روت لها دنيا ماحدث ..
امينه : دي لعبة يابنتي اتلعبت عليكي انتي وجاسر ، علشان يوقعوكي في الغلط ويبعتوا الصور لجاسر علشان يبعدوكم عن بعض.
دنيا : مش عارفة بس ياسمين قالت إن كان في واحد تاني مع فارس ، ممكن يكون هو اللي صورنا وهو بيتهجم عليا.
امينه : اهي ياسمين دي أوس المصايب ..
دنيا : لا ياماما ياسمين اتخدعت من فارس زيي.
امينه : مفيش واحدة تدخل راجل غريب بيتها وتجبله صحبتها علشان يعمل فيها اللى فارس كان عايز يعمله الا لو كانت مش مظبوطة …
دنيا : وهو جاسر هيصدق ويعرف اني مظلومة ..
امينه : هو عارف انك مظلومة ..
دنيا : ازاي هو قالك كدة ..
امينه : جاسر بيحبك ومن كتر حبه ليكي ، حبه عماه ان يشوف الحقيقة ، لكن قلبه مصدق انك مستحيل تعملي كدة.
دنيا : بحزن ، طيب هعمل ايه دلوقتي وهو هيصدقني ويسامحني ..
امينه : بضحكة ، تعملي ايه دلوقتي .. قومي اغسلي وشك والبسي احلي حاجة عندك ..
دنيا : بدهشة ، ليه.
امينه : علشان هنروحله ..
دنيا : بفرح بجد
وطلعت واخدت شاور وارتدت دريس قصير بعض الشئ ..
……….
معتز ذهب إلى جاسر في فيلا دوبلكس في برج على النيل ملك جاسر.
جاسر حكي لمعتز كل حاجة حصلت مع دنيا وفارس ومنار.
جاسر : مش عارف بتحبني ولا بتضحك عليا بس عنيها بتقول انها بتحبني ، قلبي بيقولي كدة حتي افعالها النهاردة اكدتلي كدة ، يبقي ازاي عملت كدة مع فارس عقلي هيتجنن والصور مبتغبش عن بالي لحظة.
معتز : حاجة غريبة فعلا ، كنت اسمعها افهم منها.
جاسر : قاطعه ، مقدرتش دي خيانه يامعتز مش حاجة سهلة اقعد واسمع واتناقش فيها ازااي.
رن هاتف معتز.
معتز : دي ماما امينه.
جاسر : متردش ، اكيد بتتصل عليك علشان انا قافل موبايلي.
معتز : هتزعل كدة ، هرد لو سالت عليك اطمنها بس.
جاسر : طيب بس اوعى تقولها علي مكاني.
معتز : حاضر ..
جاسر قام وطلع التراس وهو بيبص علي منظر النيل قدامه ويستنشق الهواء كانه بيحاول ياخد نفسه.
امينه : ازيك يا معتز جاسر فين وقافل موبايله ليه.
معتز : متقلقيش يا ماما هو معايا.
امينه : عايزة اجيله هو فين.
معتز : هو مضايق شويه ، ممكن ميوافقش ان حضرتك تيجي.
امينه : انا عارفة انه متضايق وجايه وجيباله الحل معايا.
معتز : حل ايه ..
امينه : ابعتلي بس مكانه واوعي تقوله ان انا جاية.
معتز : ممكن يضايق مني لو قلتلك مكانه.
امينه : بضحك ، لا دا مش بعيد يبوسك ويشكرك.
معتز : ضحك ، لو كان كدة ماشي … وبعتلها العنوان …
قفل الهاتف وراح لجاسر ، دي ماما امينه بتطمن عليك وانا طمنتها.
جاسر : اوعي تكون قلتلها مكاني.
معتز : بتوتر ، عيب دا كلام.
جاسر : معتز دي مفهاش هزار.
معتز : عيب ياجدع .. بس المكان هنا تحفه ومنظر النيل يجنن ، مقلتليش انت اشتريت الفيلا الدوبلكس دي امتى.
جاسر : كنت شاريها من زمان في بداية شغلي مع عمي علشان اتجوز فيها ولما ربنا كرمني ركنتها.
معتز : بس دي نضيفه انت كنت بتيجي تتشاقي هنا ولا ايه ..
جاسر : بابتسامة ، عيب عليك هو انا بتاع كدة ، البواب يجيب مراته مرة كل شهر تنضفها ..
رن جرس الباب.
جاسر : بص لمعتز ، مين اللي جاي ده ..
معتز : بتوتر ، دي اكيد مرات البواب هروح افتح …
ذهب معتز ليفتح الباب وجد امينه ودنيا.
معتز : ادخلي يا ماما هو في التراس جوه ازيك يا مدام دنيا ، انا هنزل بقى علشان لو مسكني هيقسمني نصين.
امينه : ضحكت طيب ودخلت هي ودنياا.
دنيا : انا خايفة يا ماما.
أمينه : اجمدي .. بس متتكلميش فى الاول لحد ما افهمه.
دنيا : حاضر.
دخلوا ووقفت امينه خلف جاسر ودنيا خلف امينه تنظر للارض.
امينه : بصوت عالي ، هي دي الوصية ياجاسر .
جاسر : التفت بدهشة ، ماما .. ثم نظر لدنيا .. انتوا ايه اللي جابكم هنا وعرفتوا مكانى ازاى ..
بصوت عالي معتز .. يازفت يا معتز واتحرك علشان يدور عليه ، امينه شدته.
امينه : بحدة اقف هنا وانا بكلمك.
جاسر : بضيق وهو يتجاهل دنيا ، نعم.
امينه : بهدوء ، اسمع يابني وافهم الاول متبقاش غشيم في حبك كدة.
جاسر : بص لدنيا ، انتي ايه اللي جابك انتي معندكيش كرامة ولا احساس جايه لايه دنيا عيطت
امينه : بحدة كلمة تانية ورحمة عمك همشي انا ودنيا ومتعرفش لينا مكان ..
جاسر : بحزن ، هتسبيني ياماما علشانها.
امينه : خدته في حضنها وعيطت ، انت ابني ياعبيط ، وشدت دنيا وخدتها في حضنها ودنيا بنتي اللي مخلفتهااش.
ثم جلست على الاريكة.
امينه : بهدوء وهي تجلس في النصف بينهم ، دنيا وقعت في خيه اتنصبت لها من صاحبتها والزفت فارس ، صحبتها ضحكت عليها بحجة أنها نسيت شيت الامتحان واترجتها تروح معاها وهناك الزفت دا كان بيحاول يتهجم عليها وصوروها علشان يبعتولك الصور ..
جاسر : والمفروض اني اصدق الهبل دا ..
امينه : الهبل دا هو اللي حصل ، مسالتش نفسك هي لو راحت بمزاجها وعارفة ان فارس هناك كانوا هيصوروها ليه .. مسالتش نفسك لما عرضت الطلاق على دنيا هي رفضت ليه …
جاسر : هي قالتلك على الطلاق.
امينه : اه وقالتلي علي اللعبة الهبلة بتاعتكم ، اومال مش جواز على الورق.
جاسر : وهي ايه اللي خلاها تخرج اصلا من الكلية من غير ماتعرفني لو كلامها صح ..
دنيا : بعايط ، انا اسفه والله بس قلت البيت قريب مش هكمل ربع ساعة ونرجع.
جاسر : اه يا دوب ، تروحي تتباسي وتحتضني في ربع ساعة صح.
دنيا : لا والله مقربليش ولا باسني هو قرب مني بس انا ضر,بته وخبطته وطلعت اجرى ، والله ماكنت اعرف انه هناك.
جاسر : طيب مقلتليش ليه اللي حصل وانا بكلمك واسالك انتي فين ، كدبتي ليه وقلتي انك في الكلية وانتي اصلا كنتي برة الكلية.
دنيا : ببكاء خفت .. والله العظيم خفت ولما قررت يومها اني اقولك لقيتك بتكلم بنت اسمها سارة وطالع تقابلها .. كنت هقولك والله بس انت اللي مشيت …
جاسر : لا والله وبعدها متكلمتيش ليه .. دا لو كلامك صح فعلا …
دنيا : بكسوف ما انا كل ما اقربلك علشان تهدي واعرف احكيلك كنت بتصدني ..
جاسر : مش مصدقك.
امينه : ما خلاص يا جاسر ، البت هتعملك ايه اكتر من كدة مش كفاية اللي هي فيه .. دي مموته نفسها من العياط ،
ثم غمزتله ، دا بدل ما تاخدها في حضنك وتطبطب عليها ..
دنيا : لا ياماما دا بيروح يطبطب علي البنت اللي في الكافيه .. دا غير منار كمان ..
امينه : ضحكت لجاسر ، طيب طبطب جوه بدل ما تطبطب برة ..
دنيا : لا مبيطبطبش ياماما.
امينة : بصت لجاسر ، كسفتني.
جاسر : قلبه حن وهو بيبص لدنيا ، انا مبطبطبش.
دنيا : ضحكت لجاسر ، لا ..
امينه وقفت علشان تسيبهم لوحدهم وبتصنع : مش عارفة انا نسيت الفستان عند الخياطه لازم اروح اجيبه ليضيع منها في الزحمة.
دنيا : ببلاهه ، لا يا ماما انتي جبتيه ، انا كنت شايفة شنطة معاكي واحنا في الفيلا ..
امينه : يادي الخيبة ، اتلهي واسكتي يادنيا ..
جاسر : رفع حواجبه ووضع يده علي انفه وهو يكتم ضحكته.
امينة : بصت لجاسر ، مش بقولك هبلة انت مبتصدقش ..
ومشيت تجاه الباب وجاسر خلفها.
امينه : طبطبت على كتفه ، ابقي طبطب يا جاسر كسفتني …
