بقلم فريدة احمد الرابع والاخير

واحد تاني قال… بقولك يا وحش احنا متفقين مع رضا البحراوي وحسن شاكوش يجيو يحيو السهرة عاجبينك ولا نغيرهم

يوسف… وانت جايلي دلوقتي تسألني.. علي اساس لو مش عاجبيني هنعرف نجيب غيرهم دلوقتي يعني

صاحبه باندفاع.. وربنا المطرب اللي تشاور عليه اجبهولك في ظرف ساعة بالفلوس اللي يطلبها..ياوحش دااانت لو طلبت عصام صاصا اجبهولك وقتي من السجن ولا يغلي عليك
صاحبه التاني.. يابني ماهو خرج
رد عليه وقال… ياجدع فعلا
وبص ليوسف وقال… لو عايزة نجيبه وقتي

يوسف ابتسم وقال …. ربنا يخليكم ليا يا اجدع اخوات.. عقبال مافرح بيكم
كمل وقالهم … عموما اعملو اللي تعملوه وهاتو اللي تجيبوه.. انا كل الهري ده ماليش فيه اساسا

و بعدها قالهم بتحذير…يعني محدش يسألني في حاجة. مش فاضيلكم ياشوية بقر

غمزولو وقالو…الله يسهلـ..

وقبل مايكملو كان شغل العربية وطلع بيها
………..

تاني يوم
خرجت حورية من البيت بعد ماجهزت، كان موسي مستنيها بالعربية، قربت وركبت ،بصتله وقالت… انا مش فاهمه انت دلوقتي موديني علي فين. انا حتي مش حاجزة في اي مركز تجميل

موسي…لا منا هوديكي عند مرات واحد صاحبي بتشتغل كوافيرة وفاتحة كوافير كبير في المقطم

بصتله حورية وقالت… علي فكرة اسمها ميكاب ارتيست واسمها فاتحة بيوتي سنتر او مركز تجميل او صالون
قاطعها وقال…. انا طول عمري اعرف انه اسمه كوافير.. الاسامي اللي بتقوليها دي. ده لمؤاخذة كلام نسوان مايعة مليش انا فيه
بصتله بغيظ وقالت… طب اطلع

….
في شقة هنا وكريم
دخل كريم، كانت هنا مريحة علي الكنبة بتتفرج علي التلفزيون
قرب وطي باس راسها وقال…عاملة ايه ياحبيبي
كانت حاسة بتعب لانها بقت في شهورها الاخيرة من الحمل. لكن بصتله وقالت ببتسامة… كويسة
..احضرلك عشا
كريم…لا كلت
هنا… طب اعملك حاجة تشربها
ابتسم كريم ليها وقال… انتي قادرة تعملي حاجة يا هنا
ابتسمت هنا وقالت … ماهي ماما بتعملي الاكل وبطلعهولي. مش بعمل حاجة اصلا. وبعدين انا كويسة متقلقش.. هقوم اعملك قهوة
لكن كريم ضمها ليه وقال.. لا خليكي. انا مش عاوز حاجة
وباس راسها وبص للتلفزيون وقال.. بتشوفي ايه
هنا بحماس.. دا فيلم حلو اوي
وبقت تحكيله عليه
وفي وسط ما كانو بيشوفو الفيلم
حست هنا بوجع شديد فقالت بخفوت… كريم الحقني
اتخض وقال… مالك حاسة بإيه
كان الوجع بيزيد عليها بقت تصرخ وتقول… الحقني همو.. وت
شالها كريم بسرعة ونزل حطها في العربية وطلع بيها علي المستشفى. وفي وقت قياسي كان وصل، اما هي فكانت طول الطريق بتصرخ من الوجع لحد ما فقدت الوعي

نزل من العربية شالها وطلع بيها المستشفى وهو قلقان وخايف عليها جدا
…

قدام غرفة الكشف، كان رايح جاي بقلق
لحد ما اخيرا خرج الدكتور وقال..لازم تولد حالا.
لكن كمل بأسف وقال بحزن….بس للاسف في خطورة علي حياتها

يتبع……

#
#البارت_ال42
#بقلم_فريده_احمد

الرواية كانت وحشاني اوووي وانتو كنتو واحشيني اكتر♥

خرج الدكتور من غرفة الكشف وهو بيقول للممرضين حضرو غرفة العمليات بسرعة، ليتقدم كريم عليه بلهفة ويسأله بحذر وهو ينظر له بقلق…ايه اللي حصل يادكتور
الدكتور باسف….حياتها هي والجنين في خطر..عشان ننقذها لازم تولد حالا.
ليذيد قلق كريم، بلع ريقه وتسرعت ضربات قلبه ليقول بخوف.. يعني ايه يا دكتور، أرجوك قولي حالة مراتي . ايه اللي حصلها
الدكتور … انت اكيد عارف انها عندها امراض مزمنة طول فترة الحمل، ضغطها واطي وعندها انيميا. ودلوقتي المياه نشفت حوالين الجنين.. والجنين لسه نموه مكتملش،لانها لسه في الثامن، بس لازم تولد حالًا، و عايز منك أقرار بالموافقة علي أي قرار أنا هأخده وأنا داخل العملية
كريم بقلق…المهم تكون كويسة يادكتور . اعمل اي حاجة ارجوك
الدكتور… ان شاء الله متقلقش، بس
وسكت وهو مش عارف يقولو ايه
كريم.. بس ايه يادكتور
الدكتور… خليك عارف اني لو اضطريت هضحي بالطفل
كريم… المهم مراتي تبقي بخير
الدكتور…. بإذن الله. ادعيلها
..

وصل موسي امام مركز تجميل كبير جدا في المقطم
وقف بالعربية، اتصل بحازم اللي كان في شغله و اللي اول ما رد عليه قاله … انا قدام المكان اهو يا عم
حازم… هكلم ريم تنزل تقابلكم.. الف مبروك ياصاحبي.
ثم اكمل بتهكم…. متعرفش فرحتلك قد ايه. كأنك اول مرة تعملها
ليرد موسي عليه ويقول …. اذا كنت انا حاسس انها اول مرة.. اصل المرادي تختلف

حازم…دا الموضوع بجد بقا
بص عليها وهي جمبه ومسك كف ايدها وباسه وقال …. جد الجد
وهو بيبصلها بحب قال…. هي اللي دخلت القلب
حازم بحب … ربنا يهنيك ويسعدك ياصاحبي

وبعد ما قفل معاه بص لحورية وقال… مراته هتنزلك دلوقتي
حورية هزت راسها
وهو قال… مش هتجيبي حضن قبل ما تنزلي
حورية…موسي
موسي بسرعه… قلبه

حورية… بطل قلة ادب واتلم
موسي…لا خلاص موعدكيش. احنا فرحنا النهاردة ولا نسيتي..

حورية….شكلك انت اللي ناسي اننا لسه مكتبناش الكتاب
موسي…. كلها كام ساعة وهنكتب امه.. ماتجيبي حضن مقدم مفرقتش من كام ساعة

حورية بتلقائية…. لما نكتب الكتاب ساعتها ابقي خد اللي انتي عايز
وسكتت فجأة لما استوعبت
لكن موسي كان ماصدق، بصلها بوقاحة وقال…طبعا هاخد اللي عايزه.دانا مشتاق بقالي شهور
غمزلها وقال…شكلك ناويالي علي
قاطعته بكسوف وقالت… ولا ناويالك ولا بتاع. انت اللي سافل وقليل ادب اصلا.. دماغك ملهاش غير في الشمال

موسي…. حلالي وحقي

بصتله حورية وقالت بتردد…. هو. هو انت بتحبني بجد
ولا عاوز تتجوزني بس عشا
قاطعها وقال…. عشان بحبك ياحوريتي.. سيبك من الافكار اللي في دماغك دي.
مسك ايديها الاتنين باسهم بحب وقالها، بعد ما رفع ايده علي خدها وبقي يحركها بهدوء…. انتي سحرتيني من اول ما شوفتك.
وهو بيبوس ايديها.. بحبك يا حورية
ابتسم علي نفسه وقال… حبيتك وانا معرفش يعني ايه حب…. وقعتيني يابنت الايه
حورية…. يعني مش هتخزلني
رد بسرعة من غير تفكير…. عمري.. انتي دخلتي قلبي خلاص
حورية… يعني مش هتحن للرمرمة
رجع لطبيعته الوقحة تاني وقال … انا عمري ما كان ليا في الرمرمة. دا نا كنت بجيبهم علي الفرازة
بصتله وهي بتستوعب، لتقول بسخرية… ولما كانو علي الفرازة. كنت بتطلقهم ليه
موسي ببساطة… مادام مزاجي كان بيستفكي كنت هخليهم ليه.. اصلي ما بحبش اجرب الواحدة مرتين

حورية بسخرية… عشان كده كنت مسمي اللي بتعمله ده حلال. بتتجوز كل يومين واحدة. تاخد اللي عايزو وبعدين تسيبها
موسي… مادام في الحلال. ايه اللي يمنع
حورية… مكنتش بتفكر فيها وفي سمعتها؟!
موسي…. عمري ما اخدت واحدة غصب. هما واهاليهم كانو بيبقو طايرين بالجوازة.. وبعدين سمعة ايه.. دا اللي كنت بتجوزها كان بيبقي معروف عنها انها فرز اول.. كنت ارجعها لابوها.. تاني يوم تلاقي العرسان عليها بالطابور

لسه هتتكلم قاطعها وقال…بذمتك ده وقته. انسي ياحورية. دا ماضي وراح لحاله خلاص.انا نفسي مش عاوز افتكره .. انا دلوقتي مش عاوز من الدنيا غيرك انتي يا فرسة
ابتسمت بهدوء وهو قال… مش يلا حضن بقا
بصتله حورية بتحذير وهو ابتسم وقال… كلها كام ساعة وهتبقي تحت ايدي
….
فوق كانت ريم بتقفل مع حازم اللي بلغها بوصول موسي وحورية،، بصت لزهرة اللي كانت موجودة عندها في المركز بتعمل شعرها وقالت…. هنزل اقابل موسي وعروسته وصلو تحت
زهرة هزت راسها

ونزلت ريم سلمت عليهم ورحبت بحورية و استقبلتها استقبال حار

موسي اخد عربيته ورجع وحورية طلعت مع ريم

لتتفاجأ بزهرة وبدون مقدمات حضنو بعض بشتياق
حورية… مبسوطة اووي اني شوفتك. متعرفيش وحشاني قد ايه يازوزو
زهرة… مش اكتر مني.
كملت بفرحة… اهو النصيب جمعنا تاني وهنعيش في بلد واحدة.
غمزتلها وقالت… بس قوليلي عرفتي توقعي موسي ازاي
ريم….هي ما شاء الله عليها. بصراحة ليه حق يقع.
زهرة… هو اه واقع لشوشته
كملت وهي بتنبهها… بس خدي بالك منه بردو
رجعت انتبهت للي قالته وقالت… اقصد يعني
حورية… انا عارفة كل حاجة عنه
كملت بقلق… بس هو للدرجادي صيتو مسمع اوي كده
ريم بضحك… احنا بنخاف علي اجوزانا من قعادهم معاه ليكرف عليهم
هي كمان انتبهت لنفسها وقالت… مش قصدنا نخوفك.. بس هي دي الحقيقة.. ينهاري عليا.. انا عمالة اعك ليه.
بصتلها وقالت… لا بس بجد اللي عرفته انه من يوم ما عرفك وهو واقع واقع يعني

زهرة… بصراحة هو واضح اوي انو بيحبك بجد . حمزة قالي انه من وقت ما شافك وهو مش شايف غيرك.لدرجة مكنتش مصدقة ان موسي واحدة تغيره كده..بس لما عرفت ان انتي.عرفت ان عنده حق
..
خرجت منار بنفجان قهوة ل امجد وقربت عليه
اخده امجد وهو بيقولها… تسلم ايدك
منار… انت هتنزل
كان بيحاول يتصل بحد

لاحظت القلق عليه فقالت… مالك يا امجد
امجد وهو بيحاول يعيد الاتصال مرة تانية قال… مش عارف. بكلمهم في البيت من اول اليوم محدش بيرد.. قلقان يكون حد حصله حاجة
منار وهي بتطمنه… بإذن الله خير. هما بس تلاقيهم مشغولين و مسمعوش تليفوناتهم

لكن امجد كان القلق اتمكن منه، ومكنش متطمن ابدا
قال… كريم مبيردش والبت سمر كمان.
وبقي يطلب عمه اللي بردو مردش
امجد كان القلق سيطر عليه، قال… اكيد حصل حاجة. عمي زكريا كمان مبيردش.. لازم انزل القاهرة
واخد مفاتيحه وهو لسه بيحاول يكلمهم في اللحظة دي كانت سمر ردت
امجد بسرعة.. انتو كويسين
مقدرتش سمر تتحكم في نفسها ردت ببكاء وقالت .. هنا بتولد يا امجد وحالتها خطرة اوي
قفل معاها واخد مفاتيحه وهو بيقول ل منار…. لازم انزل القاهرة حالا
منار بقلق… ايه اللي حصل
امجد… هنا مرات كريم تعبت وهي بتولد
منار….ط طب انا هاجي معاك. ثواني هدخل اجهز
امجد… مش هينفع. مفيش وقت. خليكي وهبقي اطمنك
وباس راسها وخرج بسرعة
…….
في المستشفي
كانت بهيرة قاعدة فاتحة المصحف وبتقرأ قران وهي بتبكي بقلق وخوف علي هنا

وزكريا واقف هو كمان قلقان جدا علي بنته. كان حاسس انه هيحصله حاجة. ف هنا بالنسباله الدنيا بحالها. معزتها وغلاوتها كبيرة اوي في قلب ابوها