طارق: فيها اني بحبها يا مرام واظن ده سبب كافي اني اتجوزها وتكون ام اولادي وياريت تشيلي الموضوع ده من دماغك عشان انا بحب مراتي.
خطف قلبي بكلامه وكنت عايزة اروح احضنه من الفرحة لما سمعت كلامه عني ورجعت على اوضتي بسرعه وانا فرحانه اوي ومش مصدقه انه بيحبني اوي كده.
لحظات قليله جدا ولقيته بيدخل الاوضه وانا جريت عليه وحضنته جامد اوي وكنت عايزة اقوله مليون بحبك..
ضمني ليه وهو بيبتسم وقالي: حبيبتي متقلقيش انا كويس.
قولت وانا جوه حضنه: انا بحبك اوي طارق بحبك اوي.
كان بيبتسم بسعادة وهو بيضمني وقالي: انا بحبك اكتر.
وفجأة شالني ورفعني عن الارض وانا جوه حضنه وقالي: انا اسف على اللي اتعرضتي ليه النهارده.
رديت بسعادة: مش مهم اي حاجة المهم اني معاك.
ابتسم وقالي: اوعدك انه مش هيتكرر تاني.
احلام: مش محتاج توعدني انا واثقه انك مش هتسمح لحد يأذيني بس لازم تخلي بالك من نفسك انت كمان انا مقدرش اعيش من غيرك.
طارق: بجد يا احلام؟
هزيت راسي بتأكيد وانا مكسوفه منه ومن نظرات عينيه اللي كانت بتلمع بالحب واللهفة وقالي: مش عارف اوصفلك انا بحبك قد ايه.. انا كنت برسمك في خيالي وبتمنى اقابل بنت تكون عفوية وبريئه زيك واول لما قابلتك كنت في حيرة ومش عارف اقرب منك ولا اسيبك تعيشي حياتك في سلام بعيد عني..
احلام: يعني انت ممكن تندم انك اتجوزتني؟
طارق بحزن وهو بيبصلي: مش هكدب عليكي اوقات بحس بالندم اني استعجلت في جوازنا.. انتي ملكيش اي ذنب ان حياتك تتربط بحياة انسان منتظر الموت في كل لحظة.
قلبي وجعني عليه وقولتله بخوف: ليه بتقول كده؟
طارق: لان هي دي الحقيقه يا احلام.. طاهر اخويا الله يرحمه ورطني مع ناس خطيرة جدا وعندهم استعداد يقتلوا اي حد مقابل انهم يلاقوا شنطة الفلوس اللي كانت مع طاهر وكمان في اسرار كتير تخصهم انا عرفتها واللي بيعرف الاسرار دي بتكون نهايته الموت على ايديهم.
حضنته جامد وقولتله: بعد الشر عليكي متقولش كده يا طارق انت بتخوفني.
ضمني لحضنه جامد وقال: متخافيش يا حبيبتي انا مش هسمح لاي حد يأذيكي وبعد اللي حصل النهارده انا قررت انك تسافري انتي ورزان وابعدكم عن هنا.
بعدت عنه بصدمة وقولتله: اسافر فين لا طبعا انا مستحيل ابعد عنك.
طارق: احلام مبقاش ينفع صدقيني انا بعمل كده عشان احافظ على حياتك انتي ملكيش اي ذنب.
احلام: وانت كمان ملكش اي ذنب وانا مش هسيبك ابدا.
طارق: احلام اسمعي الكلام انتي لازم تسافري مع رزان.
احلام باصرار: لو عايزني اسافر يبقى انت كمان تسافر معايا.
طارق: مش هينفع يا احلام لانهم هيوصلوا لمكاني لو روحت اخر الدنيا.. انتي هتسافري مع رزان وانا هفضل هنا.
