قربت اكتر وقعدت على طرف المكتب ورديت بهدوء: ااه طبعا جهزتها.
وبصيت على الورق اللي بيبص عليه وقربت منه اكتر وهو اتوتر شويه وحسيت بيه وهو بيبعد وقال: تمام اول لما رزان تجهز هنتحرك.
رديت وانا قاعده على طرف المكتب قصاده: هنروح فين؟
طارق: انا قولتلك امبارح انك هتسافري مع رزان.
احلام: وانت؟
طارق: انتي عارفه انا عندي شوية شغل هنا لازم اخلصه الأول.
رفعت وشه بإيديا وقولتله: انت بتهرب مني ليه؟ فاكر ان انا هوافق اسافر وابعد عنك.
بصلي اوي وبعدين قام من مكانه وبعد عني وقال: اللي حصل بينا امبارح كان غلط يا احلام.. مكنش لازم يحصل.. انا كنت عايز افضل محافظ عليكي لحد ما اعرف مصيري هيكون ايه.
قربت منه ووقفت وراه وقولتله: اللي حصل ان انت ملكتني يا طارق.. انت شايف ان ده غلط؟ شايف ان في غيرك يستحقني؟؟.
لف بصلي وعينيه كانت بتطلع شرار وانا استغليت غضبه ده واستفزيته اكتر: يعني انت شايف ان في راجل غيرك يستحق يكون هو اللي جوزي مش انت؟
مسكني من دراعي وضغط عليه بكل قوته وانا كنت بتألم وقال بغضب: انتي ملكي انا وبس يا احلام.
ابتسمت وقولتله: وانا مش عايزة اكون لحد غيرك.. سيبني معاك يا طارق متبعدنيش عنك عشان خاطري.
طارق: افهمي انا خايف عليكي.
احلام: وانا مش خايفه طول ما انت معايا.
طارق: لو حصلك حاجة مش هسامح نفسي طول عمري.
احلام: وانا لو سيبتك في ازمتك دي وبعدت عنك مش هسامح نفسي طول عمري.
ابتسم بحب وقال: انتي عنيده ليه؟.
احلام: عشان انت كمان عنيد.
ابتسم وفتح دراعه بحب وانا قربت من حضنه وهو ضمني بكل حنان.
رزان دخلت المكتب علينا واتكسفت لما شافتنا وكانت لسه هتخرج وتقفل الباب بس طارق وقفها.
طارق: رزان استني
رزان: انا اسفه يا ابيه دخلت من غير ما اخبط.
طارق: محصلش حاجة تعالي.
رزان دخلت وانا كنت مكسوفه منها وطارق قالها: جهزتي شنطتك؟
رزان: اه جهزتها.
طارق: تمام الطيارة هتتحرك بعد ساعتين من دلوقتي.. انا واحلام هنيجي نوصلك للمطار.
رزان وهي بتبصلي: احلام مش هتسافر معايا؟
طارق: لا احلام عايزة تستنا معايا ونسافر مع بعض لما اخلص شغلي.
رزان بإبتسامة وهي بتقرب مني: احلام هتوحشيني.
حضنتها بحب: وانتي كمان هتوحشيني اوي.
طارق: ان شاء الله قريب جدا هنجيلك يا رزان متقلقيش.
همست من قلبي: ان شاء الله.
رزان رجعت على اوضتها وطارق قرب مني وقالي: اطلعي جهزي نفسك يلا عشان تيجي معايا وانا بوصل رزان المطار.
هزيت راسي بحماس وخرجت بسرعه وطلعت جهزت وبعد وقت قليل كنا في العربية ووصلنا المطار وطارق اطمن ان طيارة رزان اتحركت واستقرت في الجو واخدني معاه في العربيه وبصلي اوي وقالي: في شخص مهم عايزك تتعرفي عليه.
بصتله بدهشة: مين ده؟.. .
… يتبع
