الحلقة 5
رؤوف يعترف
فى المكتب الهندسي جلس رؤوف مهموما
لا يعرف ما الذى حدث لنهى لتتحول فى يوم وليله الى امرأه اخرى يكاد لا يعرفها
سمع طرقا خفيف بعدها دلف ايمن شريكه الى الغرفه
ايمن: ايه يارؤوف مالك من ساعه ماجيت الصبح وانت شكلك متغير وقافل على نفسك خير في ايه
رؤوف: نهى يا ايمن نهى هتتجنينى وتطير برج من عقلى
ايمن: هههههههه نهى يا راجل حرام عليك مراتك دى مافيش اطيب منها
رؤوف: طيبه ماقولتش حاجه بس اليومين دوول حالها غريب مابقتش فاهمها اتقلبت واحده تانيه خاالص مش دى مراتى
عندها نظر اليه ايمن نظره ذات معنى: بطل انت بس تلعب بديلك وهيا هتتعدل معاك تلاقيها حست بحاجه
ارتبك وقتها رؤوف وقال : العب بديلى ايه ياراجل الكلام اللى انت بتقوله ده هوه انا زيك دا انا غلبان
ايمن: عليا انا يا وحش عايز تفهمنى ان مافيش حاجه بينك وبين موظفه العلاقات العامه الحسناء اللى هنا ؟
قال رؤوف بتردد : انسه شيري هيكون بينى وبينها ايه لا طبعا بطل التهيؤات بتاعتك دى الله يكرمك انا مش ناقصك سيبنى فى اللى انا فيه
ايمن: طيب عينى فى عينك كده بذمتك ولا بلاش ذمتك عشان طلعت فالصو وحياه ولادك
رؤوف: لا هاحلف بذمتى اللى مش فالصو على فكره ولا ولادى حل عنى انا مش ناقصك انت كمان
ايمن: امال انت وهيا كنتو بتعملو ايه الساعه عشره بليل هنا ليله الفالنتين
احمر وجهه رؤوف للغايه عندها ظن ان ايمن كان بالمكتب فى تلك الليله وهوه الذى احدث جلبه
ايمن: هههههههههه سكت يعنى ووشك جاب الوان ههههههه طيب خلاص خلاص ماتخفش سيرك فى بير
ااه منك ياشقى
بس فالح بس تقولى قال الله وقال الرسول وقال ايه تدعيلى بالهدايه
عندها نفى رؤوف : لااا انت فاكرنى ماشى معاها فى الحرام ولا ايه لا طبعا انا عندى بنت
ايمن: امال ايه على سنه الله ورسوله
رؤوف : يعنى ………متجوزيين عرفى وجايبلها شقه
ايمن :وعربيه مش كده ماهو مش معقول موظفه علاقات عامه مرتبها مايجيش فى الشهر الف جنيه تركب عربيه سكودا ع الزيرو
لاء وتقولك ببااا جايبهالى هههههه شفت بتكبرك ازاى عاملاك اد ابوها
رؤوف : خلاص خلصت تريقه انا غلطان انى قولتلك بس اوعى تجيب سيره لحد
ايمن: عييب بس تلاقى نهى عارفه على فكره
رؤوف : لااااااااااااااا ما افتكرش نهى نايمه فى العسل نوم ولا يمكن يخطر ببالها الفكره دى
كفايه عليها البيت والولاد والغسيل والطبيخ دى نهى
اااه اللى كانت نهى لكن اليومين اللى فاتو دوول واحده تانيه
تذكر رؤوف فجأه وقال:بقولك هوه سن اليأس بيجى للستات على الخمسين كده مش قبلها صح
ايمن: سن اليأس ايه يابنى دى اصغر منك ولا بست سنين فين هيا وفين اليأس اسمع كلامى تلاقيها شاكه فيك وعشان كده قالبه عليك
رؤوف : طيب والحل اعمل ايه؟
ايمن : اسمع منى وخد النصيحه
رؤوف : قول يا حكيم زمانك
ايمن : جيبهالها على بلاطه نهى انا اتجوزت وبس واخلص بقى من وجع الدماغ
رؤوف : الله يخرب بيتك اقولها انت اتجننت رسمى انت عايز تخرب بيتى اكيد
قال اقولها قال عشان تقولى طلقنى والحوارات اياها ومش بعيد تسيب البيت والعيال تعرف وتبقى فضيحه ده اللى ناقصنى
ايمن : يابنى انت لسه مش قايل انها مالهاش غير البيت والعيال يبقى خلاص ديتها كام يوم تغضب فيهم وتعمل اللى مابدالها
واللى حواليها هيهدوها ويعقلوها ويقولولها عشان بيتك وعيالك ومعلش استحملى
ومش بعيد هيغلطوها عشان ماحفظتش عليك ويطلعوها هيا اللى غلطانه وتيجى تستسمحك انك تسيبها على ذمتك .ايه رأيك بقى؟؟؟؟؟؟
عندها لمعت عينا رؤوف واسند بظهره الى الكرسى الوثير وقال : تصدق معاك حق وبعدين انا الراجل والشرع ادانى اربعه وانا والحمد لله مقتدر واقدر على بيتين ومش منقصها حاجه
ايمن : الله ينور عليك بس كده
انتبه رؤوف فى الحال لنفسه وقال :طيب ووالولاد ؟؟؟؟؟؟؟؟؟
ايمن : مالهم الولاد ماهم كبروا وماشاء الله فى الجامعه وكلها كام سنه ويتخرجوا ويتجوزوا عيش انت بقى شوف نفسك مش كفايه اللى ضاع من عمرك
رؤوف : ايوه يا ايمن بس هيبوصولى ازاى بعدها بنتى لو حد جه يتقدملها وعرف انى متجوز على امها ممكن يدى لنفسه الحق انه يتجوز عليها هيا كمان
ايمن : بقولك ايه اللى اعرفه ان الست اللى ماتحافظش على جوزها تستاهل اللى يجرالها
وبنتك لو طلعت لامها يبقى تستاهل اللى يجرالها
وبعدين مالك عمال تسود الدنيا فى وشك كده انت ناقص
عيش يارؤوف عيش حياتك والحق اليومين اللى فاضلين من عمرك
ما انت طول الوقت اللى فات كنت محروق عشانهم وخلاص الحمد لله امنت مستقبلهم شوف نفسك واسمع كلام اخوك
هرش رؤوف رأسه ثم هز رأسه : معاك حق بس انا مش هعمل كده طول ما نهى مش عارفه
onceتعرف هامشى فى السيناريو ده وساعتها تعمل اللى تعمله انا هجيب لنفسى وجع الدماغ ليه من دلوقتى
نظر اليه ايمن وقال بتردد : هممم ااااه اااه معاك حق برضه على ايه وجع الدماغ من بدرى طيب انا نازل مشوار دلوقتى ومش راجع مش عاوز حاجه
رؤوف : لا سلامتك ياصاحبى
لاتعليق لدى سوى انه بالفعل ليس بمجتمع ازدواجى فحسب بل ايضا مجتمع ذكورى
ويا ليت توقف الامر عند مسانده الذكور لبعضهم البعض بل زاد الى درجه ان تساند النساء الرجال اما ليطغين على حقوقهن او حقوق مثيلاتهم من النساء
فأم الزوج قد تقف فى وجه زوجه ابنها
بل ان ام الزوجه احيانا قد تقف فى وجه ابنتها
وكلاهما امرأتان
وكلاهما تقفان سويا ضد امرأه مثلهما
ليصبح الناتج يصب فى النهايه فى مصلحه الرجل
وهذا على سبيل المثال وليس الحصر
عجبا !!!!!!!
*******************
تكشف الحقائق
فى المساء اتصلت سلوى بنهى لتخبرها بآخر المجريات
سلوى: الو ايوه يا نهى
نهى: ازيك يا سلوى وصلتى لحاجه
سلوى: الاول رؤوف عندك؟
نهى: لاء لسه مجاش تلاقيه مع الهانم
سلوى: المحاميه راحت النهارده الشهر العقارى ومالقتش عقود زواج تانيه باسم رؤوف
نهى: طيب وبعدين وانا هفضل فى الحيره دى لحد امتى انا زهقت خلاص
سلوى : خلاص يبقى مقدمناش الا حل اخير
نهى : ايه هوه
سلوى : انك تفتشى فى حاجته حته حته وان مالقيناش حاجه ان شاء الله ساعتها نروح المكتب عنده ونفتشه
نهى: ايه نروح المكتب ايه يا سلوى الكلام ده ليه يعنى ماتوصلش لكده
سلوى : اسمعى كلامى المعلومات هيا القوه فى الزمن ده لازم تعرفى
عشان تعرفى انتى واقفه فين وعلى انهى ارض ولا انتى عاوزه تقعدى كده حاطه ايدك على خدك طول النهار
وقبل ما يجى بالليل تاخدى المنوم عشان ماتشوفيهوش وهوا راجعلك من حـ,ـضن واحده تانيه كان معاها بكل ذره فى احساسه
قالت نهى باكيه: ارجوكى كفايه ياسلوى كلامك ده بيقطعنى اكتر
انتى بتقيدى النار جوايا اكتر ماهى قايده
فكرك يعنى لما الاقى ورقه عرفى هرتاح ولا حتى لو مالقتش حاجه خالص هيفرق ماهو زى مابتقولى كل ليله راجعلى من حـ,ـضن واحده تانيه
سلوى : ارجوكى يانهى ماتعيطيش ومعلش انا كلامى جامد بس عشان اساعدك
ولاء تفرق تفرق كتير كمان لانه لو كان متجوزها عرفى يبقى مش بعيد يبجح بعد كده وعينى عينك
وتبقى خلاص ثبتت روحها فى حياتك وحياه ولادك
انما لو علاقه ممكن نحاول نرجعه ليكى ونبعده عنها قبل ما الموضوع يقلب بجد ويتجوزها رسمى حتى وترجعى تقولى ياريت اللى جرى ما كان
استطردت سلوى بحزم :المثل بيقول ” ما لا يدرك كله لا يترك كله ”
نهى: معاكى حق طيب انا اعمل ايه دلوقتى
سلوى : استنى اما البيت يفضى خالص وفتشى فى حاجته ولو عايزانى اجى معاكى ننجز مع بعض ماعنديش مانع
نهى : الحاجات مش كتير دا هما شويه اوراق بسيطه كده و الخزنه اللى هنا اظن فاضيه هقوم ادور واجيلك اكلمك تانى فرصه والولاد مشغولين
سلوى: طيب كلمينى هه سلام
قامت نهى واتجهت الى غرفه المكتب وصح ظنها فلم تكن هناك اى اوراق ذات قيمه فعاودت الاتصال بصديقتها سلوى : ايوه يا سلوى
سلوى: هاه يا نهى لقيتى حاجه ؟
نهى: لاء ولا اى حاجه
سلوى: خلاص بكره الجمعه والمكتب اجازه انزلى بدرى الساعه سابعه كده هقابلك هناك نطلع سوا وانتى معاكى المفتاح مش كده
ندور براحتنا وترجعى قبل ما ياخد باله وان سألك قوليه كنت بجيب طلبات ولا بتمشى اوك
نهى: طيب انتى عارفه المكتب فين ؟
سلوى : لاء لاء ادينى العنوان صحيح
املتها نهى عنوان المكتب وبالفعل استيقظت نهى مبكرا من بعد صلاه الفجر وظلت قلقه لم تنام
كانت تشعر بالتردد ولا تريد الذهاب الى مكتب رؤوف
عندها رن هاتفهه بوصول رساله كان رؤوف لازال نائما امسكت هاتفهه فقرأت الرساله ” وحشتنى اووى وكنت الليله جامد اوووووووى اووووووى امووووووووووووه بعشق رجولتك و ***** و ******كلمنى ااول ماتصحى هفضل على ناار ”
(******الفاظ خارجه للغايه تمنعها الرقابه ويمنعها الحياء )
هرب الدم من عروق نهى وشعرت بالارض تميد من تحت اقدامها لم تستوعب ما الذى قرأته
ماتلك الالفاظ التى تخاطبه بها تلك الحقيره لقد ظلت متزوجه منذ مايقرب العشرون عاما لم تنطق بتلك الكلمات
ولا تستطيع نطقها كيف تتحدث لزوجها عن رجولته وفحولته ما تلك المرأه اين تلقت تربيتها بل هل تلقت تربيه اصلا؟؟؟؟؟
مسحت نهى الرساله فهى لم ترد ان يعرف رؤوف انها رأتها
ولكنها لن تستطيع محو الشعور الذى شعرت به مدى الحياه
عندما تمد امرأه اخرى بحبالها وتنسج خيوطها كالعنكبوت فتعشش فى بيتها بل وبالتحديد فى سريرها بينها وبين زوجها
صممت على طرد العنكبوت وان لزم قـ,ـتله ولكن عليها اولا ان تعرف من هى
سلوى محقه المعلومات هى القوه
فى تمام السابعه ترجلت نهى من سياره الاجره لتجد سياره سلوى تقف اخر الشارع
صعدت نهى الدرج الرخامى الى الدور الثانى اتبعتها سلوى بعد قليل اخرجت نهى مفتاح المكتب الذى ظلت محتفظه به
فتحت الباب ودخلت برفقه سلوى
سلوى : انهى مكتب رؤوف
اشارت لها نهى : ده
دخلت الصديقاتان وبدأتا فى التفتيش على الفور لم تمض الا نصف ساعه بعدها عثرت سلوى على عقد لشقه تقع فى ارقى احياء الاسكندريه مسجله باسم شيري وعقد لسياره حديثه
سلوى :بصى لقيت ايه يانهى
ردت نهى بمراره :بصى انا لقيت ايه صوره عقد الجواز العرفى وفواتير من عند الجواهرجى الاستاذ صارف عليها شبكه بحوالى 50 الف جنيه
سلوى : ماتزعليش روحك اووى كده عقد الشقه اللى كاتبها باسمها بالاضافه للعربيه اللى اشتراهلها يعدو المليون
ردت نهى بحسره : مممممليون
تساقطت عبرات نهى قاطعتها سلوى : ماتعيطيش يا نهى لسه قدامنا كتير
نهى : ايه تانى فاضل ايه تانى ؟؟؟؟؟؟
سلوى : فاضل نعرف هيا مين عشان نحط خطه انتقام صح
نهى: انتقام ازاى
سلوى : نعرف هيا مين الاول تعالى ندور فى ملفات العاملين مش بعيد تكون موظفه هنا
اتجهت سلوى الى غرفه السكرتاريه وبدأت بالبحث فى ملفات العاملين ووجدت ملف شيري الوظيفى
سلوى : مش قلتلك هتطلع موظفه مش هيا دى برضه شيري
طالعت نهى صورتها الواقعه اعلى عقد العمل وقالت : هيا
سلوى: رجاله مايملاش عينها الا التراب دا انتى احلى منها مليون مره
كانت بالفعل نهى اجمل من شيري بمراحل
ومع ذلك قالت نهى : ماطلعش بالجمال يا سلوى طلع بالسفاله وقله الادب الهانم بعتاله رساله الفجر اقسم برب العزه انا مش متخيله ازاى قدرت تقول الالفاظ دى
سلوى : انتى ربنا بيحبك يانهى انا جاتلى خطه جهنميه ما تخرش المايه
نهى: ايه هيا قولى بسرعه
سلوى : مش رؤوف اهم حاجه عنده شغله ودى الحاجه اللى بيتحجج بيها دايما وعرف الهانم من الشغل ده
لاء وصارف عليها دم قلبه وحقك وحق ولادك لحد النهارده ايه رأيك لو خسر كام مناقصه كده وره بعض
وانتى فضلتى وراه لحد مايحكيلك عن مشاكله فى الشغل ساعتها تفضلى تشككيه انه اكيد الموضوع ده حصل بسبب حد غير امين فى المكتب عنده
مين يا رؤوف اللى دخل المكتب قريب؟؟؟؟؟
مافيش غيرها عقدها بيقول انها هنا من حوالى سبع شهور
فى حين ان بقيه الموظفين هنا من سنين تبقى هيا اللى خاينه وهيا اللى بتطلع اسراره بره
وانا من خلال علاقاتى هفضل وراها لحد اما اجيب قرارها ولازم اوقعها فى حاجه تزود ادانتها قدام رؤوف
نهى: هيا فعلا فكره هايله بس اخسر جوزى شغله
سلوى : مش احسن ماتسيبيه للست الهانم تلهف على الجاهز ياعالم يكون فاتحلها حساب فى البنك وتبتدى هيا تسحب منه
فطالما الفلوس دى ضايعه ضايعه ومش هتطولى منها لا انتى ولا ولادك حاجه
يبقى خلاص فى سبيل انك ترجعيه بيته وتخلصى من العقربه دى وبعدين هما مش كتير عمليتين تلاته كده بس لازم يكونوا كبار ووره بعض عشان تبان انها مقصوده
نهى : طيب وانا اعمل ايه اعرف منين ان فى مناقصات كبيره
