زوجة عمر

يتبع
ام الأولاد
حلقة 15
ياسمين مصطفي

انتهى الأمر، مضت أشهر العدة الثلاثة وتمت خطبتي رسميا، هل تسرعت؟ لا أعرف، حزن الأولاد حزنا شديدا.. جلست معهم.. كان يجب أن أتحدث معهم، تثرثر النساء.. انظروا.. تم طلاقها ثم خطبت.. ولا أقسى على النساء من النساء…. إنهم يرجمون الأرملة والمطلقة لو فكرت مجرد تفكير في الزواج وكأنها يجب أن تمـ,ـوت مع من مات وتذهب روحها خلف من رحل… ثم انها لو عاشت وحيدة فإنهن يترصدن لها.. ينصب لها الشباك.. يعدن لها المقاعد ليحسبوا لها الخطوات والأنفاس… ألا لعنة الله على من تحدث في عرض إمراة لا ذنب لها إلا أن كُتب عليها الفراق والألم، لكن لا… لن أفني عمري هباءا.. لن أضيع بعدك يا عمر، اذهب حيث تشاء وتزوج من تحب ولكني سأبقى لأعيش.. لأجلي أولا.. ثم لأجل الأولاد… إن آفة المرأة العربية هي أنها تظن اعتنائها بنفسها جُرم وجريمة، تظن أنها خلقت لتبيت دون عشاء وتعيد دون كساء.. تظل ممسكة بباب الألم وتغلق أبواب الأمل… إننا نصف المجتمع بل أكثر، بنا تقام البيوت.. تقام البيوت على صبر النساء ووالله إننا لنصبر.. نصبر حتى نفنى..
جلست مع الأولاد واقنعتهم فاقتنعوا.. وإن لم يقتنعوا اليوم فغدا سيعلموا… أما كان الصحابة يتسابقون في الزواج من المطلقة والأرملة..رحمة بها وبأبنائها؟.. لكن قل هذا لمجتمعك الذي لا يعرف من الدين سوى التعدد… له شروط يغفلون عنها… يؤمنون ببعض الكتاب ويكفرون ببعض.. لكن لا … لم أُخلق عبثا ولم أُترك سدى ولم أكلف إرضاء الناس عني!
مضى شهران على خطبتي.. لا أشعر أنني سعيدة ولست بالحزينة.. أحن إلى عمر؟ أحيانا.. نسيت أيامنا؟ أبدا… ندمت على تركه؟ مستحيل…
= منى
– نعم يا احمد
= فات شهرين ع الخطوبة.. مش هنتجوز ولا ايه.. احنا كبار مش معقولة هنفضل مخطوبين مثلا
– شهرين مش كفاية.. واحنا عشان كبار مش لازم نستعجل… كله بأوانه
= امتى أوانه
– اصبر….. في موبايل بيرن.. ده موبايلك
= هاتيه لو سمحتي هو ع المكتب
– اتفضل
= ثواني وراجع

ما كان هذا!!! أحقا ما رأيت؟ بالطبع أنا أتخيل… يجب أن أكون اتخيل….
– كنت بتكلم مين
= عميل… المهم.. قلتي ايه
– خلاص ماشي.. تحب يبقى امتى الفرح
= بجد؟
– طبعااااا
= ايه رايك ف اول خميس من الشهر الجاي
– ايه ده يعني بعد ١٢ يوم؟
= ايوة
– ممم.. ماشي
= بس في حاجه كده
– ايه؟
= متهيألي احنا كبار على موضوع فرح ده.. مش مهم يا منى افراح
– لا بالنسبة لي مهم.. فرح وشهر عسل كمان امال انت فاكر ايه.. ولا تكون فاكر اني عشان مطلقة ف عادي هتنازل
= هههههه يالهووي.. حقوق المرأة مسلطاكي عليا؟ خلاص حاضر.
– ايوة كده اتظبط
= حاااااضر.. بحبك
– ههههه طيب… انت خارج؟
= ايوة
– طب معلش بقا هتعبك
= وايه الجديد
– كده؟ طب خلاص
= بهزر وانتي عارفة.. قوووولي
– خلي الموبايل ده معاك وبكرة اخده منك
= بتاع مين
– بتاع روان وأنا اخدته منها عشان تذاكر.. ف لو رجعت البيت وهو معايا هتاخده هي تاني… خليه وابقى اقولها ضاع
= ده انتي ام مفترية والله
*******************
= عايزة إيه.. مش خلاص عملت كل اللي انتي عايزاه؟
– لا طبعا لسه
= لسه ايه… الفرح بعد كام يوم
– فرح؟ انتو كمان هتعملوا فرح؟
= طبعا… الهانم مصممة
– قوام عملتها هانم؟
= هانم ايه وزفت ايه.. انا مش مصدق اني هعمل كده.. لو مراتي عرفت بيتي هيتخرب
– مراتك هترجع من السفر بعد شهرين من دلوقتي… تكون انت اتجوزت ورجعت
= بقا هي تسافر ب بنتي العيانة وانا هنا بتجوز عليها؟
– انت هتستهبل؟ ده انت دفتر الجواز العرفي مش بيطلع من جيبك
= ع الاقل عرفي.. لكن رسمي رفرح وكمان غصب عني. كتير بصراحه
– ما هو يا كده يا اما مراتك هتعرف بكل جوازاتك.. هتعرف كمان ان فلوسها اللي انت بتشتغل بيها دي ياما اتسرق منها واتصرف على ستات غيرها.. ساعتها كل حاجة هتضيع منك.. الفلوس.. مراتك.. وطبعا بنتك!
= مكنتش مرتاحلك من اول يوم اشتغلتي فيه عندنا يا ساااارة… . حتى بعد ما اتجوزتك مكنتش مرتاحلك!
– هههههه ده بس عشان تاني مرة تبقى تسمع كلام احساسك يا احمد بيه..
= انا نفسي اعرف بس.. كل ده ليه.. بتكرهيها كل الكره ده ليه
– مش مهم تعرف!

يتبع

ياسمين مصطفي
تفااعلوا وهنزل الجز۽ الاخير

#الحلقة الاخيرة
عقلي كاد ينفجر.. صحيح أنني لم أقع في حب أحمد.. لكن صدمتي فيه كانت مرعبة!! كيف استطاع اقناعي انه لم يتزوج بعد… وضع في طريقي زميلة عمل تخبرني عنه كل ما يريدني ان اعرفه.. رجل اعزب محترم وعصامي… صاحب شركة.. لعنكم الله جميعا!
وماذا عن سارة؟؟ ماذا تريد مني.. لماذا زجت بنفسها في طريق عمر… لماذا تريد من أحمد أن يتزوجني.. ربما لتقطع علينا طريق الرجوع.. لكن لماذا… تقصدني ام تقصد عمر؟؟
*********
– احمد
= نعم
– كتب كتابنا لازم يكون في القاعة مش قبل
= ليه؟؟
– كده وخلاص
= يا منى انا كلمت المأذون وجاي بكرة
– قلت اللي عندي وبراحتك.. لو مش عايز نكمل براحتك
= يا شيخة بطلي جنان… خلاص ماشي ف القاعة!… كلها ٤ أيام.. مفرقتش كتير
– حجزت الفندق عشان شهر العسل
= طبعاااا
– جميل😊
************
– في ايه يا منى… رنيتي عليا وقولتيلي ان روان تعبانة
= ادخل يا عمر مفيش حاجة..
– امال بعتيلي ليييه.. قولي بسرعة قلبي وقع
= هحكيلك…………….
– يااااه!! كل ده؟؟ طب ليه.. ليه عملت كل ده
= مش عارفة… معنديش اي إجابة.. عموما انا عازماك بكرة على فرحي
– فرحك؟؟؟ هتتجوزيه بعد كل ده
= انت لازم تيجي.. لازم تجيب سارة… فهمها انك هترجعلها.. فهمها انكم هتحضروا عشان تضايقوني.. اتصرف
– هاتعملي ايه يا منى
= هتشوف!
***********
= يعني ايه لا اقبل… مش فاهم… منى.. مااالك
– يعني زي ما سمعت يا احمد.. غيرت رايي.. مش موافقة اتجوزك!
= انتي بتهزري صح؟؟.. استهدي بالله
– نورتونا يا جماعة
= والفرح؟ والفندق.. انا صارف دم قلبي
– لا ولسه.. تعالى يا عمر انت والمدام
= ايه اللي بيحصل ده يا عمر
– حبيبتي… حبيبتي يا سارة.. جيباكي عشان اعرفك انه اللي بتخططيله مش نافع للأسف.. كلامكم كله انا سمعته.. مصممة اني اتجوز احمد ليه… سمعتك بتقوليله يصبحني ب علقة ويمسيني ب علقة.. خربتي بيتي الأول… والتاني طلع مش بيتي وانتي اللي وراه.. انتي عايزة مني اييييه!!!
= عايزة احرق قلبك… زي بالظبط ما حرقتي قلبي
– انا؟؟ انا عملتلك ايييه
= جيتي لحد بيتي انتي واخوكي… اخوكي اللي قعدت ٦ سنين احبه. ٦ سنين وانا بحلم باليوم اللي هيتقدملي فيه.. جيتي لحد عندي ورفضتي جوازنا. رفضتيه من غير حتى ما تكلفي نفسك وتقعدي تتكلمي معايا. من غير ما تشوفيني.. اقنعتي عيلتك كلها اني مش مناسبة لمجرد ان بابا وماما متطلقين وبينهم مشاكل… لحد ما انا اكتئبت وهو اتعقد وسافر… وهناك عمل الحادثة ومات… حلفت الف يمين اني هخليكي تتطلقي… اشتغلت مع جوزك وعلقته بيا… وكان سهل جدا اعلقه بيا.. كان سهل اني اجننك او اقتـ,ـلك زي ما قتـ,ـلتيني.. ايوة انتي قتـ,ـليني وقتـ,ـلتيه هو كمان… تستاهلي اكتر من اللي عملته فيكي الف مرة.
– هههههههههههههههههههههههههه ده بجد؟؟؟ كل ده عشان فاكرة اني انا رفضتك؟؟
= في إيه
– لو كنتي جيتي وعاتبتيني.. ياااه.. ده انا دورت على رقمك كتير جدا.. رحتلكم البيت لقيتكم عزلتوا… اخويا كان مريض
= ايه!!!
– كان مريض انفصام… كانت حالته متأخرة، صحيح انكم كنتو بتحبو بعض لكن انتي كنتي عارفاه عن طريق الانترنت مكنتيش عايشة معاه.. مكنتيش تعرفي حالته.. لما جينا البيت.. قعدت مع اهلك لقيتكم طيبين جدا.. خفت عليكي من الحمل التقيل اللي احنا شايلينه من سنين.. وافقت اكون انا اللي رافضة عشان اساعدك انتي.. وفكرت بعدها اجيلك وافهمك لكن حالته ساءت وراح المستشفي وبعدها سافر.. رحتلك البيت لقيتك عزلتي.. رقمك اتقفل.. عيشت ايام بفكر فيكي.. لحد ما مات.. قالوا انتـ,ـحر… انتـ,ـحر لان حالته كانت متدهورة.. سافر ف مركب من ورانا.. عيشت سنة كاملة مكتئبة.. فاكر يا عمر.
= طبعا
– يعني اييييييييه؟
= يعني انتي عملتي ف نفسك كل ده عشان تنتقمي مني.. وانا بريئة من كل حرف انتي قولتيه… لكن انتي مش بريئة.. وانا مش هنتقم منك بالعكس. لازم اشكرك.. عرفتيني حقيقة جوزي… اما انت يا استاذ احمد ف انا بعت كلامك بصوتك للمدام.. وبالهنا والشفا!!!
**********
بعد اسبوعين

– منى
= ايه
– سارة جالها اكتئاب وعرفت انها دخلت مستشفى.. واحمد مراته طالبة الطلاق
= وبعدين
– بحبك.. اظن لازم نرجع يا منى.. اديكي اتاكدتي
= من ايه
– انها هي اللي من الاول كانت ناوية تخطفني.
= وانت بتتخطف عادي كده؟
– يا منى بطلي بقا… انا مكاني ايه عندك؟
= انت مكانك معروف يا عمر عمره ما اتغير
– بجد؟
= بجد…. “حاجات ملهاش لازمه”

تمت

#ياسمين_مصطفى