شاكر خاف وقال: الله يخربيتك انتي كده هتدبسيني معاكي.. انا لازم اهرب من هنا بسرعه قبل ما يوصلولي انا كمان ومتجبيش سيرتي قدام الناس دول ليقتلوني زيكم.. هما حذروني من الاول وانا وافقت وانتي وافقتي.
بسمه ملحقتش تتكلم من الصدمة وانا بصتلها بحزن وكنت متوقعه رده واخدت منها التليفون وقولتلها: هاتي التليفون.
بسمه كانت مصدومه من رد شاكر والتليفون وقع من ايديها وانا قربت عشان اخده ولقيته فصل شحن.
احلام: يادي المصيبه يعني كان لازم تضيعي اخر شحن في البطارية على سي زفت هو من امتى كان وقف جنبك عشان يقف دلوقتي!
بسمه وهي بتبكي: بس يا احلام كفايه حرام عليكي انا مش قادرة اتكلم وهموت من الخوف على ابني.
وقفت محتارة ومش عارفه اعمل ايه مرعوبه وهموت من الخوف زي بسمه واكتر وفجأة الباب اتفتح وظهر ملثم ومعاه سلاح وهددنا بيه وقال: مش عايز اسمعلكم صوت.
بسمه بخوف: كان معانا ولد صغير هو فين؟
الملثم: معانا برا هجيبه.
بصتله بخوف وسألته: انتوا عايزين مننا ايه؟ وليه خطفتونا؟؟
الملثم: معنديش اوامر اتكلم معاكم.
وخرج وقبل ما يقفل الباب وراه انا صرخت: طب هات الولد هنا.
بصلي ومردش وبعد اقل من دقيقه لقيته رجع ومعاه ابن بسمه وقالنا: الولد اهو ومش عايز اسمع صوت هنا وبعد شويه هرجعلكم واعرفكم ايه المطلوب منكم. بالظبط.
بسمه اخدت ابنها في حضنها وانا وقفت ابص للشخص الملثم ده بخوف لحد ما خرج وانا قعدت على السرير وبسمه قعدت وهي شايله ابنها وقالت: هنعمل ايه دلوقتي يا احلام؟
بصتلها بغضب: الباشا جوزك قالك ايه بالظبط؟ هيبلغ اننا مخطوفين.
حطت وشها في الارض وقالت: لا مش هيبلغ.
بصتلها بصدمة وقولت: تستاهلي اكتر من اللي بيعمله فيكي يا بسمه صدقيني.
بسمه ببكاء: كفايه يا احلام كفايه.. انا خايفه اوي هنا ومش عارفه الناس دول خطفونا ازاي وليه.. هما مش الحرس بتوع جوزك كانوا تحت البيت! وجوزك يا احلام؟ جوزك معقول هيسبنا مخطوفين كده!
سرحت في طارق اللي مغبش عن تفكيري لحظة واحدة وكنت حاسه اني مطمنه ومتأكدة ان طارق مش هيسيبنا وهيعمل المستحيل عشان ينقذني من الناس دول بس كنت خايفه عليه ومش عايزاهم يضغطوا عليه بيا واكون انا نقطة ضعفه.
اتكلمت بثقة وانا ببص ل بسمه: لا طارق مش هيسيبنا يا بسمه.. طارق اول لما يعرف اني اتخطفت هيعمل المستحيل عشان يوصلي.
