فتح خزنة سرية في خزانة الملابس واخد منها سلاحه المرخص ونزل بسرعه على تحت وطاهر والحرس كانوا في انتظاره. وكلهم اتحركوا وابو هند ومامتها واسامه اخو هند كانوا مع رزان في القصر.
خارج القصر طاهر سأل اخوه بقلق: انت عرفت مين اللي خاطفهم؟
طارق وهو بيركب العربيه بسرعه: اخت احلام ساعدتهم يخطفوها هي وهند.
طاهر بصدمة وهو بيركب جنب طارق: اختها معقول!!
طارق بص في تليفونه وقال: دا خط السير اللي اتحركوا عليه والتليفون دلوقتي في المكان ده ولازم نوصلهم في اسرع وقت.
اتحرك طارق بسرعه بعربيته وخلفهم عربيات الحرس.
في المكان اللي مخطوفين فيه احلام وهند.
الاتنين قاعدين جنب بعض بيعيطوا.
هند بخوف: انا خايفه اوي يا احلام ياترى هيعملوا فينا ايه؟
احلام: مش عارفه يا هند.
هند: تفتكري طاهر عرف اننا اتخطفنا.
بصيت قدامي بحزن وقولت: اكيد وزمان طارق عرف هو كمان واكيد هيزعل مني لاني مسمعتش كلامه وخرجت بدون اذنه.
هند ببكاء: انا قولتلك من الاول اللي بتعمليه ده غلط.
احلام ببكاء: انا مكنتش شايفه قدامي غير اختي وابنها.
هند بغضب: معقول بسمه لها يد في خطفنا.
حطيت وشي في الارض وقولت: اكيد.. بسمه خدعتني قبل كده ومش بعيد انها تعملها تاني.
هند: لا يا احلام اكيد بسمه ملهاش علاقه بلي حصل دي مهما كان اختك ومستحيل تعمل فيكي كده!
رديت ببكاء: بتمني يكون ده اللي حصل.
هند بخوف: انا خايفه اوي يا احلام يارب طاهر يعرف بسرعه ويبلغ البوليس وينقذونا.
بصيت قدامي وانا ببكي ومش عارفه هبص في وش طارق ازاي بعد اللي عملته…
… يتبع
هند بغضب: معقول بسمه لها يد في خطفنا.
حطيت وشي في الارض وقولت: اكيد.. بسمه خدعتني قبل كده ومش بعيد انها تعملها تاني.
هند: لا يا احلام اكيد بسمه ملهاش علاقه بلي حصل دي مهما كان اختك ومستحيل تعمل فيكي كده!
رديت ببكاء: بتمني يكون ده اللي حصل.
هند بخوف: انا خايفه اوي يا احلام يارب طاهر يعرف بسرعه ويبلغ البوليس وينقذونا.
بصيت قدامي وانا ببكي ومش عارفه هبص في وش طارق ازاي بعد اللي عملته.
بعد ساعة طارق وصل للمكان اللي فيه التليفون وكان مكان فاضي في وسط صحرا وتليفون احلام وتليفون هند علي الارض.. طاهر اخد التليفونات من على الأرض وبص ل طارق وسأله بدهشة: المكان فاضي مفيش حد هنا! معقول سابوا التليفونات هنا وراحوا مكان تاني؟
طارق بص قدامه بتفكير وقال: هما خطفوهم والتليفونات معاهم وخافوا اننا نعرف مكانهم عن طريق التليفونات وعشان كده حطوا التليفونات في مكان بعيد عن اللي هما فيه دلوقتي.
طاهر بصله بتفكير وقال: وهنعمل ايه دلوقتي؟
فتح طارق تليفونه على خط سير تليفون احلام على الخريطة وكان واضح قدامه التليفون كان موجود في كل مكان وقت قد ايه بالظبط وكان أطول وقت في المكان الواقفين فيه دلوقتي وكان في مكان تاني التليفون كان فيه لمدة نص ساعه! وفهم طارق ان احتمال كبير ان يكون هو ده المكان وقال ل طاهر: احتمال يكونوا في المكان ده.
طاهر اخد تليفون طارق وبص في الخريطه بصدمة وقال: انا عارف المكان ده.
طارق بصله باهتمام وطاهر قال: ده مكان مخزن تبع ناجي وانا وهو كنا شركا فيه.
طارق بصدمة: يعني ناجي اللي خطفهم!
طاهر بغضب: دا هيبقى اخر يوم في عمره النهارده.
واتحركوا بسرعه على العربيه وعربيات الحرس وراهم.
في المكان المخطوفين فيه احلام وهند.
وقف ناجي برا مع الحرس وسألهم: ايه الاخبار؟
الحارس: كله تمام يا باشا وبندخل نطمن عليهم كل شويه.
ناجي: تمام كده.. زمان طارق باشا واخوه هيتجننوا ويعرفوا مكانهم.
الحارس: طب ايه يا باشا مش هتكلمهم وتخلص معاهم قبل ما يعرفوا مكانا.
ناجي بثقة: مستحيل يعرفوا مكانا.. المخزن ده كان بتاعي انا وطاهر ومستحيل يجي في بال طاهر انهم مخطوفين هنا.
الحارس: صح يا باشا بس حضرتك هتكلمهم امتي؟
ناجي: هسبهم يلفوا حوالين نفسهم شويه عشان لما اكلمهم واطلب الفلوس يوافقوا على طول وهما متأكدين انهم مش هيعرفوا يرجعوهم من غيري.
الحارس: تسلم دماغك يا باشا هو ده الكلام…
في المساء داخل المكان المخطوفين فيه.
هند بصت على الشباك وقالت بخوف: احلام الدنيا بقت ليل واحنا لسه على حالنا ده ومفيش حاجة حصلت شكلهم مش هيعرفوا مكانا.
