ماما هي ليه أنت بقا عندك بطن كبيرة!
رديت بإبتسامة
عشان أنا حامل
يعني إيه حامل!
مسكت إيد يزن إبني وحطيتها على بطني وأنا بفهمه بنفس إبتسامتي
يعني هنا في نونو! وكمان كام شهر ويبقا عندك أخت صغيرة
لقيته قال بفرحة كبيرة
يعني هيبقا ليا أخت زي محمد صاحبي!
هزيت راسي بأيوا وهو قرب شوية وقعد يحسس على بطني معداش ثواني ولقيته بيجري على أوضته بسرعة أستغربت بس إستغرابي مدامش كتير ولقيته رجع تاني وهو ماسك في إيديه بطنية وحاول يطلع يقعد جنبي على الكنبة فساعدته ولقيته بيقولي
ماما جوا ديق خليها تطلع تقعد هنا
قالها وهو بيطبطب على الكنبة براحة
مينفعش يا حبيبي تطلع دلوقتي وهي صغيرة جوا مش ديق عليها متخافش
لا طلعيها عشان تعرف تنام!
هي نايمة دلوقتي أصلا وطي صوتك!
قولتها وأنا بهمسله عشان يقول بهمس زي
يعني هي نايمة!
هزيت راسي فقال من تاني
طب الجو برد عليها خليها تتغطى!
ضحكت وخدت البطانية من إيده وقعدته في حضڼي وحطيت البطانية علينا وأنا بقوله
أهو كدا هي اتغطت
أبتسم جامد وهو فرحان ثانية إتنين ولقيته بيقول
هي إسمها إيه!
عايز اسمها يبقا إيه!
حط صباعه تحت بوقه وهو بيفكر وقال مرة واحدة
روح
ليه! بعدين أنت سمعت الإسم د فين أصلا!
سمعته في فيلم وعمو كان بيقول للبنت أنت إسمك روح وأنت روحي عشان كدا نسميها روح وأقولها يا روحي!
يا روحي أنت! طب وهتخلي مين تاني يقولها يا روحي!
رفع صوابعه وهو بيعد بطفولية
أنت وبابا و… بس
وبس طب وعمو طارق وخالو أنس!
قالي بعصبية
