اكمل قال بغضب..اطلع يلا بره..مش ناقصه اتكلم مع الصراصير كمان يلا يلا غور من هنا مش رايق السعادي بدل ما ابتلي بواحد وسخ زيك
عدي بصلو بحده وقال..بلاش انت تتكلم عن الوساخه يا تربيه الشوارع يا ابن الركلام
اكمل كان حرفيا دمه بيغلي وعدي مكانش وقته اصلا
ضربو بوكس قوي وقعو على الارض وبقى ينز،،ف من انفو وهجم عليه وهو بيضربو بغل وعن،،ف وبيقول..ابن الركلام ده هيوريكم يا زباله يا كلااب…والله لادفعكم التمن انا هفرجك انت وابوك يا زباله
اسيا اتصدمت كان هيموتو في ايده وهاجم عليه بيضربو بغل دفعتو بكل قوتها بعيد عنو وشدت عدي عليها وكان بيكح جامد وبينز،،ف
قالت بزعيق..انت حيوان هيموت في ايدك ايه اتجننت خلاص
اكمل وقف وقال بغل..البركه فيكم يا ولاد الانصاري..بس وحق كل كلمه بتحرقو بيها قلبي من غير ما يرفلكو جفن..لاخليكم تبكو بدل الدموع دم…وحق القلب اللي مفضلش منو غير اسمو لادفعكم تمن كل حرف بستحملو…ولاخليكم قدام بعض ليل نهار ومتعرفوش تقربو ولا تبعدو
وبص لعدي بحقد وقال..هخليك تشوفها معايا ة في حضني وتوريني رجولتك يا ابن البشوات ….غورو من اوضتي …وزعق جامد وقال…اطلعو بررررره
اسيا للحظات حست بحزن من منظره وحست انهم ذودوها معاه بس بعد ما قال كده قومت عدي وقالت بضيق…. يلا من هنا يا عدي على شويه والنفس هنا هيبقى مسموم
واخدتو وطلعت واكمل قفل الباب بسرعه وهو مش قادر ياخد نفسو جذب شعره بقوه وجسمو كلو بيرتعش وهو بيفتكر كل كلمه بتتقاله
فتح الدرج بتاعو بسرعه وطلع منو علبة اقراص وكب منها على ايده اكتر من حبايه وشربهم دفعه واحده واديه بترتعش ونام على السرير وضم رجليه لبطنه وحاوطهم باديه كأنه بيحضن نفسه وهو مغمص بقوه وبيحاول ينام وبيجاهد علشان دموعه متنزلش
في الوقت ده دخل شخص ملثم من البلكون ومعاه سكين في ايده واتقدم ناحية سرير اكمل
عند سهيله فضلت تمشي بالعربيه زي ما بيقولها علي لحد ما وصلو لحاره صغيره
في بدايتها علي قال..بس اقفي انتي هنا هروح اجيب لنا علبتين واجي في السريع..معاكي فلوس اصلي نسيت المحفظه
سهيله طلعت فلوس ادتهالو و قالت بلهفه….بجد هتجبلي علبه ليا …هات وميهمكش الفلوس انا..انا عايزه كتير معايا
علي ضحك وقال..لو لقيت بقى يا مزتي
ونزل من العربيه وهيه فضلت مستنياه وقت طويل بس مجاش نزلت من العرييه وبقت تلف اول المكان وتسأل عنه وفي الوقت ده الدنيا اتقلبت والكل بقى يجري بصراخ
واتفاجأت بالبوليس حاوط المكان
سهيله كانت واقفه مكانها بتبص للناس اللي بتجري باستغراب ومش فاهمه فيه ايه لحد ما واحد من الظباط مسكها بقوه وقال للعسكري …خد الحلوه دي كمان…. اول مره اشوف المنقبات كمان بيجو هنا جاتكم البلا
سهيله اترعبت وقالت..سيب ايدي لو سمحت عيب انا عملت ايه
الضابط دفعها للعسكري وقال …عملتي ايه..في القسم هنعرفك وهنجبلك المزاج كمان ..وشاور للعسكري جرجرها ورماها في البوكس مع المجرمين وهيه بتصرخ ومرعوبه جدا ووووو
#شيطان_في_بيتي
#الحلقه_الخامسه
حتى المنقبات بقو بتوع مخدر،،ات سهيله كانت بتسمع الجمله دي من كل العساكر والضباط وواقفه وسط المدمنين والتجار وهيه بتبكي ومرعوبه جدا
اتقدم عليها ضابط وقال بغضب…انتي يختي ارفعي الهباب اللي على وشك ده..بلاش قر،،ف امثالك يوسخوه
سهيله بقت تبصلو برعب وقالت بدموع…انا مش هرفع حاجه ..ولو سمحت انا عايزه اكلم اهلي لوسمحتو بقى كفايه انا جايه بالغلط والله العظيم
الضابط قرب عليها بغضب وقال…انتي كمان بتردي ياروح امك قولت اقلعي النقاب ده بدل ما ابهدلك …وبقى يشدو منها بس سهيله بقت ماسكه النقاب ومثبتاه باديها على وشها وبتبكي وبتزعق معاه بس اتصدمت لما شافت منتصر من بعيد قالت ببكا وصراخ…منتصر…منتصررررر
منتصر اتفاجأ بصوتها والتفت وراه واتصدم ببنت منقبه بتناديلو وكان حاسس انو صوت سهيله جري عليها بسرعه وقال بزعيق…مروااان….سيبها
الضابط مروان قال برسميه…منتصر بيه انا كنت عايز اكشف وشها علشان الفيش
منتصر بقى يبص لسهيله بزهول وهيه كانت بتبكي برعب وفاجأتو لما جريت عليه وقفت وراه من غير ما تلمسو وهيه بتبكي بخوف
منتصر اتاكد انها هيه واكان متفاجأ جدا ونفسو يطمنها ويهديها بس كان لازم يفهم ويتعامل برسميه حمحم و قال…البنت دي جايه في ايه
الضابط قال بجديه…. اتمسكت في الحاره المشبوه اللي تم الإبلاغ عنها عند تجار المخدرات واعترفت انها كانت مع زميلها رايحين يجيبو برشام من هناك حضرتك
منتصر اتصدم بشده وقال…سيبها انا اعرفها
الضابط اتصدم وفضل باصصلو ومنتصر قال بغضب..فيه حاجه روح شوف شغلك
وبص لسهيله وقالت …احم اتفضلي معايا على مكتبي
سهيله ابتسمت بدموع وكانت مرتاحه من اول ما شافتو وراحت معاه على المكتب وهيه بتشهق بشده واعصابها باظت على الاخر
في البيت عند اكمل كان نايم بتعب بعد الحبوب اللي خدها ودخل شخص ملثم من الشباك وفي ايده سكين
كان بيقرب من اكمل بحذر واول ما اتأكد انو نايم بدأ يفتش في الاوضه وفي الادراج بسرعع و بيدور على حاجه
بس اتصدم بصوت اكمل بيقول…مفيش حاجه هنا متتعبش نفسك
التفت لاكمل بخوف ورفع السكينه بس اتصدم لما لقاه نايم مكانو متحركش وقال وهو مغمض عينه بهدوء…اطلع قول للي بعتك اني مش شبه ابويا خالص…او بمعنى اصح مش اهبل زيو ..الورقه اللي عايزها مش هنا ومش هيلاقيها
الراجل خاف ولسه هيجري ناحية البلكونه اكمل زعق فيه وقال..تعالى هنا انا مش هأذيك
قعد وطلع فلوس من الدرج ورماها على السرير وقال..خد الفلوس دي واطلع قولو مفيش حاجه هنا ..وشد الباب في ايدك عايز انام
الراجل اخد الفلوس بخوف وهو مستغرب جدا واكمل رجع نام وقال…اطلع من الباب مفيش داعي تنزل تاني على المواسير والفرهده دي…. وقولو في اي وقت يحب يجيب واحد يفتش الاوضه يقولي وانا هستقبله مفيش داعي نتعب الناس معانا
الشاب مشي وطلع من الباب بسرعه زي ما قلو وهو مستغربه جدا
اكمل هز راسو بيأس وابتسم بسخريه ورجع نام تاني
عند فرحه كانت واقفه بغيظ قدام شقة الست اللي لؤي دخل عندها وقالت ..اوووف يا ربي طب اسيبه يتورط الغبي ده علشان يتربى
بس اتنهدت وقالت بضيق…بس يمكن ميعرفش هو دخل فين… والله ما عارفه صعبان عليا على ايه
وخبطت على الباب وهيه مضايقه من نفسها
فتحتلها نفس الست وقالت..نعم يا ست الدكتوره فيه حاجه
فرحه قالت بارتباك..اه..اصل..اصل يا ست تحيه الل..احم..اه قريبي قريبي جيه يزورنا ومخو بعافيه شويه وميلت عليها وقالت بهمس بيني وبينك مجنون وبنعالجه ..خلاني بعمله شاي وسهاني ونزل ومش عارفه الاقيه فقولت يمكن يكون جيه هنا ولا لمحتيه نازل….هو شب حليوه اوي وشعره بني بيلمع كده ولابس تيشرت بني وجينز يعني شكلو مميز لو شوفتيه اكيد هتعرفيه انو مش من هنا
تحيه اتخضت وبصت وراها للؤي الي كان قاعد بارتباك ومش واخد بالو لفرحه اصلا وبيبص للمكان بقلق
تحيه بلعت ريقها بخوف وقالت..مجنون..مجنون خالص يعني
فرحه قالت بسرعه…فوووق الخالص سعات بتهب منو وممكن يخنق اللي قدامه
بلعت ريقها برعب وبعدت وشاورت على لؤي وقالت..هو الشاب اللي هناك ده
فرحه قالت بسرعه..ايوه هو هو ده قريبي..لؤي..
لؤي التفت لها بسعاده ومش مصدق قرب منهم وقال..فرحه الحمد لله انك جيتي انا….
بس فرحه قاطعتو وقالت بسرعه..انت نزلت ليه انا مش قولتلك متتحركش تعالى معايا
تحيه كانت بتبصلو بخوف وقالت..اه..اه روح مع قريبتك يا اخويا… ربنا يشفيك
لؤي قال بدهشه….ربنا يشفيني…. انتي عرفتي ازاي مين قلك
تحيه قالت بخوف منو..مش مهم يا خويا …المهم تخف ربنا يشفي روح مع الدكتوره يلا
لؤي طلع من عندها باستغراب وبص لتحيه وقال…ايوه يعني مين قلك..هو انا بقى باين عليا ولا ايه
تحيه قالت بحسره..والنبي مش باين ابدا حسره عليك ربنا ياخد بالايد وقفلت الباب
لؤي قال بدهشه… حسره عليا..هو انتي قولتلها ايه
فرحه قالت بغيظ..قولتلها الحقيقه..قولتلها انك مجنون وليس على المريض حرج
لؤي قال بسرعه….لا .انا مش مجنون والله …لسه موصلتش للدرجادي
واتنهد وقال..على العموم شكرا انك طلعتيني
فرحه قالت بغضب..انا كنت خلفتك ونسيتك علشان افضل الف وراك..انت حكايتك ايه يا جدع انت ..شوف بقى لو معاك حاحه عايز تقولها قولها وخلصني يا إما توريني عرض كتافك انا قاعده هنا بالعافيه اصلا متجبليش المشاكل
لؤي اتنهد وقال….شوفي انا لازم اتكلم معاكي..بس مش هنا خوديني على اي مكان مفيهوش اي واحده ست..ولا حتي حاجه مؤنثه ….بصي لو شجره مؤنثه متقعدنيش جمبها
في البيت كانت اسيا بتحط معقم تحت عين عدي بعد ما اكمل ضربو وهو بيقول بغضب…ذودها جدا بني ادم حقير انا مش عارف ازاي هنستحمل الاستفزاز ده ازاي هنعيش وهو معانا في الييت حقيقي تربية شوارع
اسيا قعدت واتنهدت وقالت…يمكن كمان احنا ذودناها زيو..الكلام بتاعنا بيأثر فيه جدا واضح عليه انا..انا خدت بالي لنظراتو واحنا طالعين كان مكسور جدا و
قاطهعا بزهول وقال..انتي بتقولي ايه…انتي معقوله بتشفقي عليه بعد اللي عملو معانا
اسيا اتنهدت وقالت..انا لا بشفق عليه ولا طايقاه بس حسيت كده معرفش ليه…المهم احنا لازم نتصرف وناخد الورقه دي من عندو قبل ما يعمل اي مصيبه
عدي قال بحزن..انا السبب في كل ده
اسيا بصتلو بضيق وقالت…كويس انك عارف كده
ولسه هتمشي مسك ايدها وقال..انتي ..انتي ناويه على ايه..يعني لو حلينا الموضوع ده..هتسامحيني هنكمل في علاقتنا صح
اسيا سحبت ايدها وقالت بسخريه…. ادعي الاول يتحل ..لان السؤال هيبقى هنعمل ايه لو مقدرناش نحلو يا عدي والبركه فيك
قالت كده وخرجت وهو قعد على السرير بحزن
عند عصران كان قاعد في الاوضه بقلق ودخل عندو الشاب اللي كان في اوضة اكمل
عصران اتصدم وقال..انت ازاي داخل من الباب كده الله يخربيتك مخرجتش من البلكونه ليه زي ما دخلت
الشاب قال بتوتر..اصلو يا باشا الجدع نايم في سابع نومه ومحسش بيا فقولت اقابلك بالمره قبل ما امشي
عصران قال بسرعه..المهم عملت ايه لقيت الورقه
قال بارتباك .لا..لا الورقه مش في الاوضه ابدا انا دورت كويس
عصران قال بغضب…كنت متاكد انو مش هيجبها معاه…طيب روح انت ولو حد من الاولاد شافك قولهم انك شغال معايا في المكتب وجيت تطمن عليا …يلا
الشاب مشي وعصران قعد بضيق وغضب وقال..صبرك عليا يا ابن الشوارع
عند اسيا كانت رايحه اوضتها وجات عيونها على اوضة اكمل اتنهدت وهيه بتفتكر منظره بعد الكلام اللي هيه قالتو واللي عدي قالو قربت من اوضتو وكان الباب مش مقفول من جوه لان الراجل الي بعتو عمها خرج منو
فتحت الباب براحه جدا ودخلت على اطراف اصابعها ووقفت جمب سريره واستغربت من الطريقه الي نايم بيها كان ضامم رجليه لصدره زي الاطفال وحاضن نفسو بدرعاتو زي ما يكون حد بيحضنه بقت تبصلو باستغراب وجات عيونها على علبه الحبوب اللي جمبو وقرت اللي عليها ولقتها مهدء..اتنهدت بحزن وغمضت عيونها ولسه هتمشي اتفاجات بصوتو بيقول..انتي كمان جايه تدوري عليها
شيطان في بيتي حصريا بقلم زهرة الربيع
عند سهيله كانت بتبكي جامد في مكتب منتصر وهو جاب لها ميه وقعد على طرف المكتب قدام الكرسي بتاعها وقال …احسن دلوقتي
هزت راسها ب لا وهيه بتشهق ببكا
منتصر اتنهد وقال…حاولي تاخدي نفسك وتهدي شويه مفيش حاجه ملهاش حل
سهيله قالت بدموع….انا.. انا والله ما اعرف حاحه من اللي بيقولوها الضباط بره ابدا …والله
منتصر قال ..طيب اهدي انا عايزك تفهمي اني معاكي هنا ومحدش هيقدر يتعرضلك فلو سمحتى اهدي علشان اعرف افهم منك
سهيله بقت تحاول تهدى ومنتصر قال ..ايه اللي حصل بالظبط
سهيله قالت بدموع وسرعه..انا كنت في عربيتي ورحنا المكان ده … وبعدين نزل يجيب حاجه من الصيدليه وكنت مستنياه و
بس قاطعها منتصر وقال…. براحه على مهلك..كنتي انتي ومين مين اللي نزل
سهيله خدت بالها لكلامها ومكانتش عايزه تجيب سيرة علي وتورطه قالت بسرعه وارتباك…نزلت…قصدي نزلت واحده صاحبتي كنت معاها
منتصر قال بعدم تصديق…صاحبتك..اها…كملي
سهيله قالت بتوتر…. بعد كده قالتلي هتروح صيدليه قريبه..فضلت مستنيها لما اتاخرت نزلت ابص عليها لقيت الناس بتجري والضباط ملو المكان واخدوني معاهم
وانفعلت وقالت بزعيق وبكا …والحيوان اللي بره كان عايز يشوف وشي
منتصر ضحك بخفه وقال…معلش ده اجراء لازم..يعني ضروري نتأكد من شكل المتهم
قالت بصدمه..متهم
منتصر اتنهد وقال…شوفي يا انسه سهيله…المكان اللي كنتي فيه ده منطقه مشبوهه ومعروفه لتجار المخدرات وكل اللي هناك يا اما مدمنين بيتعاطو يا اما تجار بيبيعو…محدش بيروح هناك الا اذا كان واحد من الاتنين دول
