عشق لا ينتهى بقلم فريدة احمد

تاني يوم

هنا في اوضتها رايحة جاية بغضب بعد ما عرفت السبب اللي تامر طلقها علشانه وان صاحبتها بعتتلو الفويس

هنا في نفسها بغضب وعصبية .. يابنت الكلب . وديني ماهسيبك . لازم اعرفها ازاي تعمل معايا انا كده الحيوااانة

وهي بتتوعدلها

قعدت علي السرير وهي حاسة بالهزيمة دموعها نزلت لما حست انها خسرت تامر خلاص وهي متأكدة انو استحالة يغفرلها الغلط ده

بدأت تراجع نفسها وهي بتندم علي كل اللي عملته وا بتدت تعترف بينها وبين نفسها انها كانت غلط وأنها فعلا كانت مقصرة معاه واهملته وأنها فعلا اللي اديتلو الفرصة يدور علي الاهتمام بره . بس في نفس الوقت خيانته وجعتها ومقدرتش تستحملها . مقدرتش تستحمل انها تتخان وانو يلمس واحدة غيرها . كرامتها مسمحتلهاش تتخان وتعدي الموضوع عادي كده

فضلت تبكي بندم علي حياتها اللي اتخربت وحبها اللي ضيعتو من ايديها بغرورها وكبريأها . تامر حبها الاول والاخير حب طفولتها اللي محبتش غيره ولا شافت غيره في حياتها

مسحت دموعها وقررت انها لازم ترجع حبها ليها حتي لو هتعتذر

..

عند تامر

كان قاعد في مكتبه وهو مرجع ضهره علي الكرسي ومغمض عينه وسرحان

فجأة هنا فتحت باب المكتب ودخلت

قربت عليه .. تامر

تامر فتح عينه اول ماسمع صوتها قال باستغراب .. هنا .. ايه اللي جابك

قام من مكانه وقالها .. لين كويسة

هنا .. ايوا كويسة

وقبل ماتامر يتكلم هنا قالت .. انا جاية

خدت نفس وقالت .. جايه علشان اعتذرلك . انا غلطت في حقك . انا اسفة

تامر .. اسفة علي ايه ياهنا

هنا .. علي الكلام اللي انا قولته وانت سمعته . انا اسفة . قولت كلام مش دريانه بيه في وقت كنت مجروحه فيه منك …. عارفه اني غلطت ياتامر وبعترف

تامر .. مبقاش منو فايده الاعتراف دلوقتي ياهنا

هنا .. يعني ايه .

تامر .. يعني احنا خلاص حكايتنا خلصت

هنا هزت راسها برفض وقالت .. لأ مينفعش تخلص كده . احنا بنحب بعض لازم حبنا ده يكون اقوي من اللي حصل انا غلطت في حقك ومعترفة ب ده زي ماانت كمان غلطت في حقي وخونتني

تامر .. انتي جايه ليه دلوقتي ياهنا

هنا .. جايه اعتذرلك واقولك اني كنت غبية

تامر .. تمام اعتذارك مقبول

هنا .. ردني ياتامر .

ابتسم تامر وقالها .. اردك . ليه هو مش انتي كنتي عايزة تطلقي . مش ده كان طلبك . وانا نفذتلك اللي انتي عايزاه

هنا باندفاع .. بس انا كنت فاكرة

وسكتت

تامر .. كنتي فاكرة ايه . سكتي ليه ماتكملي .

تحبي اقولك انا… فاكره اني كنت هجيلك راكع وندمان وأبوس ايدك ورجلك علشان ترجعيلي . صح .. بس لأ مش انا يامدام .. انا فعلا عملت كل حاجه علشان تسامحي وترجعي بس متوصلش لأهانة الكرامة

هنا .. بس انا بحبك . انا هتغير علشانك علشان بحبك ردني وهتشوف انا هتغير بجد . انا عارفة اني كنت مقصرة

كملت بعتاب .. بس انتا خونتني ياتامر . عارف يعني ايه .. انا كنت مجروحه منك . علشان كده مكنتش عارفه انا بقول ايه قولت اي كلام في وقت غضب

دموعها نزلت بوجع وكملت .. عارف ياتامر يعني ايه اعرف انك لمست واحدة غيري . صعب . صعب عليا اوي . انت جرحتني . علشان كده انا قولت كلام مش دريانه بيه كنت مجروحه منك اوي . كرامتي كانت وجعاني . شكلي قدام نفسي وقدام صحابي قدام المجتمع كلو . انا اللي جوزها عرف عليها واحدة وخانها معاها . انا اه بظهر اني جامدة و مش فارق معايا خيانتك . بس لأ فارق معايا وموجوعة منك . انت غلطت ياتامر . غلطت فيا ووجعتني

تامر .. مين اللي خلاني مشيت في الغلط مش انتي . عرفت عليكي واحدة ليه مش انتي السبب . طول عمري بحبك ومش شايف غيرك . بس انتي بقا عملتي ايه

قدرتي الحب ده

هز راسه وقال ..

. لأ . بس ضمنتيه . قولتي بيحبني واعمل اللي عايزاه .. انا حبيتك وعشقتك بس مخدتش منك اي حاجه تدل على انك بتحبيني… انا بس اللي حبيتك وانا اللي كنت بدي ومش باخد اي حاجه … .. عموما خلاص الكلام مبقاش ليه لازمة . انا شوفت حياتي . وانتي كمان شوفي حياتك

هنا .. مش فاهمه تقصد ايه .

تامر .. اقصد اني اتجوزت واستقريت خلاص . انتي كمان شوفي حياتك ولو عاوزه تتجوزي اتجوزي حقك

هنا بصدمة.. انت بتقول ايه . انت اتجوزت . اتجوزت عليا

تامر ..بس انا متجوزتش عليكي انا مطلقك ولا نسيتي

هنا بجنون .. يعني ايه . انت بطلقني وبتتجوز عادي . لا لا انت اكيد بتهزر . قولي انك بتهزر ياتامر ومتجوزتش

تامر .. لأ اتجوزت بجد ياهنا

هنا .. بس انت بتحبني وبتعشقني

وحاولت تقرب منو .. انت بتحبني ياتامر.. معقول نسيتني بعدها عنه بهدوء وقالها .. كان . كنت فاكر انك تستاهلي الحب ده .. انا حبيتك بس انتي مكنتيش تستاهلي علشان فعلا انتي واحدة انانيه . وغلطي اني متجوزتش من وقت ما شوفت اهمالك

كنت بقول معلش لسه صغيرة واكلمك وافهمك تاخديني علي قد عقلي تتغيري يومين وتقلبي .. عايزه تدخلي وتخرجي اديكي بقيتي حرة اعملي اللي انتي عايزاه

هنا .. يعني ايه يعني كده خلاص نسيتني نسيت حبنا بتقطع كل حاجه بينا ..

مسكت وشه بكفوفها وقالت…. بصلي ياتامر وقولي انك نسيت.. بصلي ياتامر. بص في عيني وقولي انك مبقتش تحبني

تامر نزل ايديها وقال .. احنا اللي بينا كتير بنت وقرابة مش هنتوه من بعض بس انتي من دلوقتي هنا بنت عمي وام بنتي وبس… عايزة اي حاجه بخصوص لين تكلمي امي وهي هتقولي . لكن احنا مفيش اي كلام بينا بعد كده من دلوقتي في حدود في التعامل .. انتي محرمة عليا دلوقتي دا غير اني بقيت متجوز ..

راح قعد علي كرسي المكتب وقال .. شرفتي يامدام

……..

مساءا

تامر دخل البيت كانو شريف وليلي قاعدين وشكلهم مستنينو

قرب وقعد وقال .. خير يابابا . كلمتني وقولت عاوزني

شريف .. ممكن تفهمنا اللي انتا عملتو ده

تامر .. عملت ايه