بعدني عنه وحاوط وشي بقلق ولهفه
انا اسف حقيقي مكانش قصدي انك توصلي للمرحله دي بسببي …انا ومامتك بنخاف عليكي من الهواء الطاير لما بنسأل عنك وعن تفاصيلك وعن اصحابك ومشاويرك ومعاد رجوعك وكل الحاجات دي مش علشان انتي صغيره ومش علشان نتحكم فيكي كل ده علشان نحافظ عليكي لانك اغلي ما في حياه مامتك
قرب وشه من وشي وبص في عيوني بحب
واغلي ما في حياتي انا كمان
لما بقولك البسي واسع ولما بقولك غطي شعرك ولما بقولك متضحكيش في الشارع بصوت عالي برضو علشان بخاف عليكي وبغير عليكي من اي نظره!
بتغير عليا!!!!
طبعا
اللي بيغير ده بيحب وانت بتعتبرني اختك
رد بابتسامه خبيثه
وهي الغيره بس للي بيحبوا بعض
الراجل بطبعه بيغير علي اي شخص يخصه سواء مامته اخته حبيبته!
بصيت في عيوني بتساؤل وحيره
وانا بالنسبالك ايه اختك ولا حبيبتك!
اتوتر وبعد عني وهو بيبص في كل مكان إلا عيوني ورجع اتكلم بجديه
اتمني متكونيش زعلانه مني ووعد مني هسيبك من النهارده تختاري كل حاجه في حياتك بدون ما اختارلك انا أو مامتك …تصبحي علي خير
قال جملته بأقصي سرعه وخرج هربان من الاجابه
اخدت نفس عميق واترميت علي السرير بتعب وحيره وشرود
مكنتش قادره احدد انا بالنسباله ايه
مهتم بكل تفصيله في حياتي
عارف عني كل كبيره وصغيره
بحب ايه
بكره ايه
نفسي احقق ايه
لكنه مش محدد انا ابقي مين في حياته
مجرد بنت خاله وزي أخته
ولا حبيبته اللي مستني اللحظه المناسبه
—
علشان يقدر يعبر عن مشاعره نحيتها
صحيت تاني يوم علي صوت الفون بتاعي بيرن
رديت من غير ما اشوف مين
الو
صوفيا النتيجه ظهرت وأحنا نجحنا صافي!
اتنفضت من فوق السرير بفزع وذهول
وحياه امك
والله العظيم انا بجد مش مصدقه
رديت بفرحه وانا برفع راسي للسقف
الحمد لله يارب الحمد لله
انا هقوم افرح ماما وبعدين هكلمك
طب قوليلي الاول عملتي ايه امبارح لما روحتي
رديت بأستعجال
هبقي احكيلك بعدين سلام
قومت نطيت من علي السرير وخرجت من الاوضه بفرحه وحماس وانا بنادي علي ماما
ماما ياماااااما انا نجحت
كانت قاعده علي الكنبه بتقمع باميه
رفعت عيونها وبصلتي بملامح خاليه من اي تعبير بعدها رجعت كملت اللي بتعمله
قربت منها وانا بمط شفايفي بخجل وندم
اممممم شكلك زعلانه مني
ردت بسخريه
لا خالص هو انتي عملتي حاجه تزعل لسمح الله
حطيت وشي في الأرض وانا بفرك ايدي بتوتر
انا اسفه
كانت هتقوم بس مسكت ايديها وبصتلها برجاء
علشان خاطري متزعليش
اتنهدت تنهيده طويلة وهي بتبصلي بعتاب
ينفع الكلام اللي قولتيه امبارح ده يا صوفيا
هزيت راسي وعيوني بتلمع بالدموع
لا ب بس بس..
بس ايه مش هتقوليلي برضو كنتي فين امبارح لحد الساعه ٢ بليل!
كنت مخطوفه
رمت السکينه اللي كانت في ايديها وهي بتبصلي بذهول
نعم مخطوفه!
هزيت راسي ورديت بجديه وملامح خاليه من اي تعبير
ايوه ياماما كنت مخطوفه
بدأت احكيلها كل اللي حصل بالتفصيل وهي قاعده تبصلي وبتعيط بصمت لحد ما خلصت
اخدتني في حضنها وضمتني بكل قوتها وهي بتقولي پخوف
لا لا يا صوفيا انتي مش لازم تعملي كده
رفعت عيوني بتساؤل ودموع
وتيم ياماما هسيبه يتأذي!
تيم ظابط ويقدر يتصرف انما انا مش هضحي بيكي لا
مسكت ايديها و وخلتها تحاوط وشي بين ايديها وانا بتنهد وبرد بهدوء
ماما انا بحب تيم ومش هقدر اسامح نفسي لو حصله اي حاجه صدقيني …مټخافيش عليا أنا هبقي كويسه
انا عارفه انك بتحبيه وهو كمان بيحبك
بيحبني!
وطلب ايدك مني
برقت عيوني وبعدت برأسي ورديت بكل تلقائيه
وحياه امك
قولتله هفكر وارد عليك
رديت بلهفه وفرحه
لا تفكري ايه هو احنا لسه هنفكر
للدرجادي بتحبيه
رديت وانا بتنهد بكل قوتي
اوي ياماما
ردت بحزن
بس بعد اللي هتعمليه هتخسري ثقته وحبه للأبد!
قلبي اتنفض وسكت
مكنتش قادره احدد انا حاسه بأيه
فرحه
حزن
حيره
مشاعر كتير متلغبطه جوايا
مشاعر عكس بعض تماما
الباب خبط
اتنهدت وقومت فتحت
