الحلقة 9
اعمى الفكر ام اعمى البصر ؟
تغيرت شخصيه نهى اصبحت تفكر بمفردها لم تعد نهى القديمه التى كانت لا تسير خطوه الا بالرجوع لرؤوف كى تحصل على مشورته فيما تفعله او لا تفعله
فهو رب الاسره رجل البيت القوام عليها واذا امرت المرأه ان تسجد لمخلوقا غير الله عز وجل فلتسجد لزوجها وعلى المرأه ان تلبى طلب زوجها ولو كانت على ظهر جمل
هذا ما ترسخ فى ذهن نهى عن طاعه الزوج كى تفوز بجنه الخلد
لم تعلم قيمتها هى الاخرى وان الله كرمها وجعل القوامه للرجل مسئوليه وليست فخرا وعنجهيه وامتيازا لجنس الرجال فوق جنس النساء
وان ليس مقابل طاعتها مأكلها ومشربها وطلبات البيت المجابه
وانه رجل يكد ويشقى فى عمله يكفى مايجد من شقاء وعناء خارج البيت فلتتحامل هى على نفسها وكل ماحرمت منه فهو على سبيل انها من يجب عليها الاهتمام براحته ومراعاه لظروفه
وهذا هو الرجل الشرقى الانانى الذى وان رأى ان زوجته تضحى لاجله اليوم فغدا يرى ان هذا من حقه وان هذا اقل ماتفعل الا ترى النساء من حولها وكيف هى احوالهن فلتحمد ربها على الاقل هو ليس كبقيه الرجال ليس سبابا لعانا يضربها ويهينها
واصبحت تلك القاعده العامه العريضه من الرجال وان من لا يفعل ذلك هو الشاذ العجيب وكأن حسن المعامله اصبحت أستثناء يوضع تحته الف خط وخط
المهم عوده للاحداث مره اخرى وتحديدا فى مكتب رؤوف حيث يجالس صديق السوء بالطبع ايمن يبث سمومه على هيئه افكار باليه تعلق بها قلبه وصدقها رؤوف خاصه وانها تتناسب مع مافعله حتى الان فى حق زوجته المتفانيه المخلصه طيله عشرون عاما
ايمن : مالك يارؤوف من ساعه الحفله الخيريه اللى كنا فيها وانت متغير
رؤوف : نهى ياسيدى
ايمن : يااااادى نهى ياأخى اخلص من الموال ده بقى وفوق لروحك هيا هتنكد عليك عيشتك كل شويه
رؤوف : ياريت يارتها منكده ولا حتى بتنطق بكلمه ساكته على طول وفى حاجه بتدبرها مش عارف هيا ايه اتغيرت اووى
فين نهى اللى كانت متستحملش ابات ليله زعلان وتفضل تحايل فيا من يومها وهى بتنام بره فى الصاله
قال ايمن مستفسرا بقلق : يعنى هيا ماكلمتكش فى حاجه ابدا من يومها
رؤوف : لاء بدخل واطلع كأنى مجيتش اصلا انت متأكد انها ماشفتنيش فى الحفله مع شيرى
ايمن : انت عارف ان مراتك مابتطقنيش لا ف سما ولا ف ارض وطبعا حاولت ان اخليها بعيد عن الجنينه لكن هيا سابتنى وراحت هناك
رؤوف : نعم وجاى تقولى الكلام ده دلوقتى
ايمن : اطمن اطمن روحت وراها ولما لقتنى وراها رجعت تانى للقاعه وبعديها خرجت بعديها لقيتك انت روحت وراها قلت اكيد ما شفتش حاجه لانها لو اخدت بالها مش بعيد كانت طبطت عليكو
رؤوف : والله يا اخى انا حترت اكتر ووجعتلى دماغى ومش عارف مالها ومستنى لو هيا بدأت تفاتحنى بالكلام يبقى ساعتها اقولها وتخبط راسها فى الحيط بس كده حرق اعصاب ياترى عارفه ولا مش عارفه ااقولها وافرض طلعت مش عارفه يبقى جبت لروحى وجع الدماغ بدرى بدرى
ايمن : انا رأئي انك تقولها وزى ماقولتلك ديتها كام يوم تتقمص وخلاص
رؤوف : تعبت والله يا ايمن يا اخويا وشيرى اليومين دوول طالبتها كترت اووى وانا خلاص مابقتيش طايق
ايمن : لاا بقولك ايه ركز الله يخليك عندنا مناقصه مهمه الشهر اللى جاى عايزين نستعدلها كفايه الخساره الاخيره
رؤوف : الا انت ماعرفتش شركه مين اللى كسبت المناقصه اللى فاتت
قال ايمن ممتعضا لاويا شفتيه : شركه وليد المنجى ياسيدى
رؤوف : ايه تصدق العمليه دى كان فيها ان ده طول عمره بيحاربنا وكنا دايما بنغلبه
ايمن : خلينا فى اللى جى احسن ونركز عشان نعوض الخساره
رؤوف: على قولك طظ فى نهى وطظين فى شيري انا هجبها منين ولا منين
ايمن : الله الله لاا يا حلو مش هينفع تقلب على الاتنين كفايه واحده
رؤوف : انت رأيك كده ؟
ايمن : طبعا
رؤوف :خلاص طظ فى نهى وياحلاوه شيري هههههههه
فى المساء قبيل عوده رؤوف للمنزل رن هاتف نهى انها سلوى
سلوى : الو ازيك يانهى انا زعلانه منك خالص
ردت نهى بهدوء : ازيك ياسلوى ليه ربنا مايجبش زعل
سلوى : كده تنسينى الفتره اللى فاتت دى كلها ولا من لقى احبابه ينسى اصحابه
ردت نهى بسخريه : وهما فين احبابى دول
سلوى: جرى ايه انتى هتخزى العين امال مين القمر اللى كان مع رؤوف فى الحفله الخيريه من كام يوم
اندهشت نهى لمعرفه سلوى بالامر وقالت : انتى عرفتى منين ؟؟؟
سلوى : هههههه ماتعرفيش انى ااقدر اعرف كل اخبارك ومن عنيكى ااقدر اقرى افكارك هههه
نهى : همم بقيتى حكيم روحانى يا سلوى
سلوى : طبعا يا بنتى انتى مستهونه بيا ولا ايه
ردت نهى نافيه : لا طبعا بالعكس انا بقيت مؤمنه بيكى جدا وبقدراتك
لم تفهم سلوى ماتقصده نهى واستطردت نهى قائله : انتى كنتى فى الحفله ؟
سلوى بتردد : ااه ااه بس خفت اجى اسلم عليك احسن رؤوف يشوفنى تبقى مصيبه قلت خلينى بعيد احسن
اردات نهى ان توقع سلوى
نهى : بس ايه رأيك فى فستانى الاسود كان لايق عليا ولا مغمقنى اووى رؤوف ماكنش عاجبه
سلوى : ده كان هياكل منك حته تلاقيه كان غيران ولا مغمقك ولا حاجه يا ابيض انت
علمت نهى ان سلوى تكذب وانها لم تكن بالحفل فكانت نهى ترتدى فستانا نبيتى اللون اذن شخص ما اخبرها اما ايمن او شيري وحدسها ينبأها انه ايمن فشخصيه مثل سلوى لاتتماشى مع شخصيه شيري فالمتماثلون يتنافرون كلتاهما يطمعان بمال رؤوف
نهى: انا هقفل دلوقتى يا سلوى رؤوف بيركن تحت
سلوى : طيب بصى فى مناقصه اعلنو عنها واكيد رؤوف هيدخلها همتك معانا
نهى: معاكو ؟ وانتو مين
سلوى : لاء لاء مش ااقصد قصدى يعنى همتك عشان تخسرى رؤوف العمليه دى وكده يبقى فاضل ضربه كمان وتوقع شيري فى شر اعمالها هبقى اتصل بيكى تانى اديكى التفاصيل اوك
نهى : اوك سلام
**********************
حقيقه سلوى
فى اليوم التالى صباحا اتصل عصام بنهى والتى كانت بمفردها
عصام : الو ازيك يانهى عامله ايه؟
نهى: ازيك انت ياعصام وازى خالتو وولادك ؟معلش انا مقصره معاكو
عصام : لا ولايهمك هيا الدنيا كده غصب عنا بتبعدنا عن اللى بنحبهم المهم انا بعت لظابط اعرف نمر تليفونات سلوى وايمن والى مش عارف من حسن الحظ ولا ايه فهم انى عاوز مكالمتهم الاتنين امله سواء مع بعض او مع غيرهم بس لحد دلوقتى مالقيتش مكالمه مابينهم
احتارت نهى : معقول ولا مكالمه واحده ?????
عصام : انا قلت نراقبهم مده شهر كده وعامه المكالمات اللى عندى حصيله يومين ممكن قريب يتكلمو الله اعلم انتى واثقه انهم على علاقه ببعض؟
نهى: والله ما انا عارفه ياعصام بس كنت شبه متأكده
عصام : لاا خلاص اذا كان كده نراقبهم شهرين تلاته ان شالله 6 شهر ولا يهمك
نهى: طيب وبقيه المكالمات كانت فيها حاجه مريبه
عصام : بالنسبه لايمن لاء مكالماته مابين شغل ومابين ستات وكلام مش محترم بالمره
نهى : ماجبتش حاجه جديده يا عصام
عصام : انا الصراحه ماعرفش واحد بالاخلاق دى ازاى رؤوف يشاركه
نهى : اللى حصل طيب سلوى فى حاجه غريبه بالنسبالها
عصام : سلوى ياستى كانت بتتكلم مع واحد اسمه وليد بالتحريات عرفت انه اسمه وليد المنجى مكالمتهم كتيره وطويله وفى بينهم بيزنس وبيتكلمو عن مناقصه قربت وهتكون ضربه جامده لرؤوف
ده اللى خلانى ماستناش للاخر وقلت اتصل اقولك انا كنت مدى نفسى مهله اسبوع اكون جمعت منكالمات كتير تظهرلنا الحقيقه
شعرت نهى بالصعقه وبتأنيب حاد للضمير فوليد المنجى شبه عدو لزوجها وهاهى سلوى تساعده على النيل منه بالمعلومات التى امدتها بها نهى
نهى: غبيه غبيه ومتسرعه
عصام : مين اللى غبيه ومتسرعه
نهى: هه لاا ابدا مافيش انا متشكره جدا ياعصام مش عارفه اشكرك ازاى
عصام : العفو يانهى انا تحت امرك وهفضل وراهم الاتنين واول مكالمه مابينهم هكلمك فورا
نهى: انت بتحتفظ بالتسجيلات يا عصام
عصام : طبعا ماتقلقيش ولو عايزاهم انا تحت امرك
نهى: لاء بس لو لقيت مكالمه مابين اين وسلوى ممكن ساعتها اخدها ممكن
عصام : ممكن جدا خدى بالك من نفسك يانهى وماتقلقيش على رؤوف الحاجات دى شبه عاديه الشغل دايما فيه منافسه
نهى: طبعا طبعا
اغلقت نهى الهاتف وجلست تفكر عن مدى العلاقه بين سلوى والمدعو وليد المنجى فقد سمعت زوجها يتحدث عنه من قبل ولكن صممت ان تعرف مدى العلاقه بينها وبينه فقررت سؤال سميه علها تملك الاجابه
اتصلت بسميه على الفور
نهى : الو ازيك ياسميه معلش بتصل فى وقت مش مناسب
سميه: ازيك يانهى تصدقى والله كنتى على بالى وكنت هكلمك الليله وحشتينى اووى وانتى تتصلى فى اى وقت انتى فكرانى فى امريكا عندم نهار يبقى عندى ليل
نهى: ههههه لاء ااقصد تكونى مشغوله بالغدا والذى منه
سميه : انا تحت امرك كنتى عايزه حاجه مش عايزه اطول عليكى انتى بتتكلمى دولى
نهى: لا مايهمكيش انا بس كنت عايزه اسألك تعرفى واحد اسمه وليد المنجى وان كان ليه علاقه بسلوى
سميه: علاقه بسلوى!!!!!!! طبعا يابنتى ده طلقيها
نهى: ايه؟؟؟؟!!!!!!!!! طلقيها
سميه: ايوه رجل الاعمال اللى اتطلقت عشان تتجوزه حتى اجهضت نفسها بعد ما كانت حامل من جوزها الاولانى عشان تبقى فاضياله
نهى: نعم!!!!!!!!!!!!!!! اجهضت نفسها
سميه: الموضوع ده سر طبعا انا عرفت بيه لانها كلمتنى بعد ما اجهضت وكانت تعبانه اووى ومخبيه على اهلها فروحتلها اخدتها عندى البيت وقعدت فيه لحد ما قامت
طبعا بررت انها اتجوزت جوزها الاولانى وهيا مش بتحبه وخلاص مش طايقاه ولا طايقه عيال منه فحين انها كانت منمره على وليد وبينهم علاقه وكان موعدها تطلق من جوزها ويتجوزوا اول ما العده تخلص
وده اللى حصل فعلا بس جوازهم ما استمرش كتير سلوى كانت طمعانه فى فلوسه بس وليد مكنش اهبل ولا كان بيحبها اووى يعنى
اختلفو واتطلقوا بعدها بست شهور تقريبا بس بعد ما اخدت مؤخر طلاق نص مليون وكان بالنسبالها ولا حاجه
نهى: انا مش مصدقه اللى بسمعه معقول كل ده يطلع من سلوى
سميه : فاكره يانهى لما كنتى بتقولى عليها طيبه
نهى: كنت هبله فعلا
سميه: انا اللى عرفت سلوى على حقيقتها وعشان كده قولتلك تبعدى عنها
نهى: بس هيا اللى تبعد عنى
سميه : تحبى اكلمها
نهى: لاء اوعى ياسميه اوعى بجد اوعدينى ان كل كلمه نتكلمها تفضل سر مابينا
سميه: ناويه على ايه يانهى
نهى: مش ناويه على حاجه يا سميه انا وكلت ربنا ومسلماله امرى هو خير مولى وخير نصير
سميه: ونعم بالله يانهى ونعم بالله ابقى طمنينى عليكى يا نهى واوعدك كل اللى بينا هيفضل سر
نهى: ربنا يكرمك ياسميه ويباركلك فى ولادك
سميه: ويباركلك فى ولادك انتى كمان يانهى مع السلامه لا اله الا الله
نهى: محمد رسول الله
